كەڭەسىپ پىشكەن تون كەلتە بولمايدى

قازىرگى كەزدە قۇقىق قورعاۋ ورگاندارىنىڭ جانىندا كونسۋلتاتيۆتىك كەڭەستەر جۇمىس ىستەيدى. سونداي ءبىر كەڭەس باس اسكەري پروكۋراتۋرانىڭ جانىنان قۇرىلعان بولاتىن. ونىڭ نەگىزگى مىندەتىنە ەلىمىزدىڭ اسكەري قۇرىلىمدارىنداعى زاڭدىلىقتى نىعايتۋ, اسكەري پروكۋراتۋرا ورگاندارىنىڭ اسكەري قاۋىم جانە ۇكىمەتتىك ەمەس ۇيىمدارمەن قارىم-قاتىناستى دامىتۋ كىرەدى. مۇنىڭ ءمان-جايىن تەرەڭىرەك ءبىلۋ ءۇشىن وسى كەڭەسكە جەتەكشىلىك ەتەتىن پارلامەنت ءماجىلىسىنىڭ دەپۋتاتى, گەنەرال-لەيتەنانت اباي تاسبولاتوۆقا جولىقتىق. – اباي بولەكباي ۇلى, اسكەري پروكۋرا­تۋرا اسكەري ءتارتىپتى نىعايتۋ مەن قۇقىق بۇزۋشىلىقتى تومەندەتۋ بويىنشا تىڭعىلىقتى جۇمىس جۇرگىزىپ كەلەمىز دەپ ءجيى ايتادى. ەندەشە, بۇل رەتتە باس اسكەري پروكۋراتۋرا جانىنداعى زاڭدىلىقتى قامتاماسىز ەتۋ جونىندەگى كونسۋلتاتيۆتىك كەڭەستىڭ اتقاراتىن ءرولى قانداي بولماق؟ – ءرولى زور. ويتكەنى, كونسۋلتاتيۆتىك كەڭەس – قازاقستان رەسپۋبليكاسىنىڭ قارۋلى كۇشتەرىندە, باسقا اسكەرلەرى مەن اسكە­ري قۇرىلىمدارىنداعى جاعدايعا ساراپ­تاما جاساپ, كەمشىن تۇستاردى انىق­تاپ, پرو­كۋراتۋرا ورگاندارىنىڭ ءىس-ارەكەتىن جەتىل­دىرۋ بويىنشا ۇسىنىستار ازىرلەيتىن باس اسكەري پروكۋراتۋرانىڭ كونسۋلتاتيۆتىك كەڭەستىك ورگانى بولىپ تابىلادى. مەملەكەت باسشىسىنىڭ تاپسىرماسى بويىنشا بۇل كۇندەرى مۇنداي كەڭەستەر بارلىق قۇقىق قورعاۋ ورگاندارىندا قۇرىلعان. ولار ءبىرىنشى كەزەكتە ەلىمىزدىڭ قارۋلى كۇشتەرى, باسقا اسكەرلەرى مەن اسكەري قۇرىلىمدارى اسكەريلەرىنىڭ قۇقىق قورعاۋ جۇيەسىنە دەگەن سەنىمدى ارتتىرۋعا ىقپال جاساۋ مەن قۇقىقتىق مەملەكەتتى دامىتۋدا ۇكىمەتتىك ەمەس ۇيىمداردىڭ ءرولىن نىعايتۋعا نەگىزدەلگەن. بۇدان بولەك كەڭەس پروكۋراتۋرا ورگاندارىنىڭ ءىس-ارەكەتىن جەتىلدىرۋ بويىنشا ۇسىنىستار دايىنداپ, اسكەريلەردىڭ قۇقىقتىق ءبىلىمىن ارتتىرۋ مەن اسكەري قۇرىلىمداردا زاڭدىلىقتى قامتاماسىز ەتۋ بويىنشا كۇردەلى ءارى وزەكتى ماسەلەلەردى قاراپ, باسقا دا مىندەتتەردى ورىن­دايدى. كەڭەس قۇرامىنا ەلىمىزدىڭ دەپۋ­تات­تارى, اسكەري پروكۋراتۋرا, ۇكىمەتتىك ەمەس ۇيىمدار, ارداگەرلەر كەڭەستەرى مەن بۇقارا­لىق اقپارات قۇرالدارىنىڭ وكىلدەرى كىرەدى. – كونسۋلتاتيۆتىك كەڭەس بۇعان دەيىن زاڭدىلىقتى قامتاماسىز ەتۋ ماسەلەلەرى بويىنشا قىزمەت جاساعان قوعامدىق كە­ڭەستى الماستىرىپ وتىر ەكەن. ەندى بۇ­لار­دىڭ اراسىنداعى جۇمىستا ايتار­لىق­تاي ايىرماشىلىقتار بولاتىن شىعار؟ – بۇل ەكى كەڭەستىڭ اراسىندا قاندايدا ءبىر وزگەشەلىك بولادى دەپ ايتۋعا كەلمەس. ونىڭ اتاۋىن اۋىستىرۋعا 2015 جىلدىڭ 2 قاراشاسىندا جارىق كورگەن «قوعامدىق كەڭەستەر تۋرالى» زاڭ بولىپ وتىر. بۇل زاڭ مەملەكەت باسشىسىنىڭ بەس ينستيتۋتتىق رەفورماسىن جۇزەگە اسىرۋ بويىنشا «100 ناقتى قادام» – ۇلت جوسپارى جانە «نۇر وتان» پارتياسىنىڭ 2015-2025 جىلدارعا ارنالعان جەمقورلىققا قارسى ءىس-ارەكەت باعدارلاماسىن ورىنداۋ بويىنشا ازىرلەنىپ, قابىلداندى. مەملەكەتتىك ورگاندار مەن اكىمدەر جانىنداعى قوعامدىق كەڭەستەردىڭ ءرولىن زاڭدىق مارتەبە مەن وكىلەتتىك بەرىپ كۇشەيتۋ ۇلت جوسپارىنىڭ 99-شى قادامىندا كورىنىس تاپقان. قوعامدىق كەڭەستەر مينيسترلىكتەر, ۇكىمەت قۇرامىنا كىرمەيتىن ورتالىق اتقارۋ­شى ورگاندار, سونداي-اق, وكىلەتتىگى بويىنشا ۇكىمەتتىك ەمەس ۇيىمدار جانە ازاماتتارمەن جۇمىس جاسايتىن جەرگىلىكتى مەملەكەتتىك باسقارۋ ورگاندارى جانىنان قۇرىلىپ, كونسۋلتاتيۆتى-كەڭەستىك جانە بايقاۋشى ورگاندار بولىپ قىزمەت ەتەدى. – كونسۋلتاتيۆتىك كەڭەستىڭ قۇرىلۋىنداعى ماقساتتاردىڭ ءبىرى – اسكەري پروكۋراتۋرا ورگاندارىنىڭ ۇكىمەتتىك ەمەس ۇيىمدار جانە اسكەري قاۋىممەن قارىم-قاتىناستاردى دامىتۋ بولىپ تابىلادى ەكەن. بۇل قانداي تۇرعىدا ءجۇزەگە اسىرىلادى؟ – قازىرگى كەزدە اتالعان ورگاننىڭ ايماقتارداعى كوشپەلى وتىرىستارىن وتكىزۋ, شالعايداعى اسكەري بولىمشەلەرگە تانىسۋ ساپارلارىنا شىعۋ كەڭىنەن قولعا الىنعان. اتاپ ايتساق, كەڭەس مۇشەلەرىنىڭ پەتروپاۆل, ششۋچينسك, اقتاۋ, اقمولا, الماتى, وسكەمەن, زايسان, قاراعاندى جانە ت.ب. گارنيزونداردا اسكەري قىزمەتشىلەر جانە ولاردىڭ وتباسى مۇشەلەرىمەن كەزدەسۋلەرى ءوتىپ, ونداعى زاڭدىلىق پەن قۇقىقتىق ءتارتىپتىڭ جاي-كۇيى تالقىلاندى. سونىمەن قاتار, قوعامدىق قابىلداۋلار جۇرگىزىلىپ, بۇقارالىق اقپارات قۇرالدارىنىڭ وكىلدەرى­مەن تۇراقتى كەزدەسۋلەر وتكىزىلىپ تۇرادى. جۋىردا عانا اسكەري قىزمەتشىلەر مەن ولاردىڭ وتباسى مۇشەلەرىن الەۋمەتتىك قامسىزداندىرۋ جۇيەسىن جەتىلدىرۋ بويىنشا قورعانىس مينيسترلىگىمەن قابىلدانعان شارالار تۋرالى ماسەلەنى, اسكەري پوليتسيا ينستيتۋتىن نىعايتۋ ماسەلەلەرىمەن بىرىكتىرىپ كەڭەس وتىرىسىندا قاراپ, ءتيىستى ۇسىنىمدار بەرىلدى. – ال ەندى وسى كونسۋلتاتيۆتىك كەڭەستىڭ وتىرىستارىندا قانداي وزەكتى ماسەلەلەر قاراستىرىلادى؟ ونىڭ ناتيجەسى بولا ما؟ – ءبىزدىڭ كۇن تارتىبىندە تۇرعان, ياعني قاراستىراتىن ماسەلەلەرىمىزدىڭ تۇيتكىلدى ەكەنى ءسوزسىز. ماسەلەن, كەڭەستىڭ ءبىر وتىرى­سىندا ءبىز جەمقورلىق ماسەلەسىنە, اسىرەسە, ونىڭ مەملەكەتتىك ساتىپ الۋ سالاسىندا ورىن الۋىنا ەرەكشە نازار اۋداردىق. وسى رەتتە مەملەكەتتىك قورعانىس تاپسىرىسى مەن اسكەردىڭ ماتەريالدىق-تەحنيكالىق قامتا­ماسىز ەتىلۋىنە جاۋاپ بەرەتىن مەملەكەتتىك وكىلەتتى ورگان قۇرۋ جايىندا باستاما كوتەر­دىك. كەڭەس مۇشەلەرى ايتقانداي, بۇل, ەڭ الدى­مەن, اسكەري شارۋاشىلىق جۇيەسىندە جەم­قورلىقتى جويۋعا ىقپال ەتىپ, اسكەرگە قاجەتتى جوعارى ساپالى ونىمدەردى جەتكىزۋدە كومانديرلەردىڭ ىنتاسىن ارتتىرادى. – اڭگىمەڭىزگە راحمەت. اڭگىمەلەسكەن الەكساندر تاسبولاتوۆ, «ەگەمەن قازاقستان»