نەمەرەسىنىڭ تويىن تەاتردىڭ اقشاسىنا جاساعان ديرەكتور

قازىر قوستاناي وبلىستىق ءى.وماروۆ اتىنداعى قازاق دراما تەاترىنىڭ  بۇرىنعى ديرەكتورى نۇرلان ەرەكەشەۆكە, باس بۋحگالتەر گۇلزادا بەكتۇرسىنوۆاعا جانە كاسسير-بۋحگالتەر مەڭسۇلۋ كۇلتاەۆاعا قاتىستى سوت ءىسى جالعاسۋدا. وندا بەلگىلى بولعانداي, بۇرىنعى ديرەكتور, باس بۋحگالتەر جانە كاسسير-بۋحگالتەر ۇيىمداسىپ, تەاترعا بولىنگەن 163 ميلليون تەڭگەنى تالان-تاراجىعا سالعان. ولار اي سايىن بانكتەن العان قارجىنىڭ ەداۋىر بولىگىن ءبولىسىپ وتىرعان. ونىڭ 80 پايىزى ديرەكتورعا, قالعان 20 پايىزى باس بۋحگالتەر مەن كاسسير-بۋحگالتەرگە تيەسىلى بولعان. سوتتا ءمالىم بولعانداي, بۇرىنعى ديرەكتور 2005 جىلدان 2016 جىلى تەاتردان كەتكەنگە دەيىن ۇيىنە تۇسكى تاماققا بارماعان. وعان تەاتر قارجىسى ەسەبىنەن كابينەتىنە تۇستىك دايىندالعان. ءۇش بولمە ءۇيىنىڭ  كوممۋنالدىق قىزمەتى ءۇشىن تولەمىنىڭ بارلىعى تەاتر ەسەبىنەن تولەنگەن. استاناداعى نەمەرەسىنىڭ ءبىر جاسقا تولۋ تويىنا ءبىر ميلليوننان استام تەڭگە اقشا دا تەاتر ەسەبىنەن جۇمسالعان. قوستانايدان شاقىرىلعان كىسىلەردىڭ پويىزعا  بيلەتى دە تەاتر ەسەبىنەن الىنعان. تەاتر باسشىلارى بيۋدجەت قارجىسىن تالاعانى بىلاي تۇرسىن, سپەكتاكلدەرگە بيلەت ساتۋدان  تۇسەتىن قارجىنى وتىرىك ءوسىرىپ كورسەتىپ كەلگەن.  تەاتر تابىسىنىڭ جوسپارى «ورىندالعاندىقتان» ديرەكتوردىڭ جالاقىسىنا ايىنا 50 پايىزعا دەيىن ۇستەمە اقشا قوسىلعان. ونىڭ سىرتىندا جوسپاردى «ورىنداعان» تەاتر ۇجىمىنا جىلىنا ەكى رەت سىياقى تولەنگەن. بۇل كورسەتىلگەن فاكتىلەر  تەاتر باسشىسى, باس بۋحگالتەرى مەن كاسسيرىنە تاعىلعان ايىپتىڭ وننان ءبىرى عانا دەۋگە بولادى. ءنازيرا جارىمبەتوۆا, قوستاناي