التىن استىقتى ولكە استانادا

ەل تاۋەلسىزدىگىنىڭ 25 جىلدىعىنا ورايلاستىرىلعان «قۋاتتى وڭىرلەر – قۋاتتى قازاقستان» اكتسياسىنىڭ اياسىندا ەلوردادا وڭىرلەر كۇندەرىنىڭ ۇيىمداستىرىلۋى وسى اپتادا دا جالعاسۋدا. بۇل  جولعى كەزەك­ ­– قوستاناي جانە وڭتۇستىك قازاقستان وبلىستارىندا. سەنبى-جەكسەنبى كۇندەرى استاناداعى جارمەڭكەنىڭ ءبىرى ادەتتەگىدەي قالا اكىمدىگىنىڭ الدىنداعى الاڭدا ۇيىمداستىرىلادى. «قازاقستاندا جاسالعان» دەپ اتالاتىن اۋىلشارۋاشىلىق جارمەڭكەسىنىڭ كورىگىن بۇل كۇندەرى  استاناعا التىن ءدانىن ارقالاپ كەلگەن قوستانايلىقتار قىزدىرماق. وندا وبلىستىڭ جەتەكشى وندىرۋشىلەرىنىڭ جوعارى ساپالى ەكولوگيالىق تازا ونىمدەرى ۇسىنىلاتىن بولادى. 2 كۇن بويىنا وبلىستىڭ 14 اۋدانى مەن 3 قالاسىنىڭ 74 كاسىپورنى 360 توننا كولەمىندە 100-دەن استام ءونىم ءتۇرىن ساتادى. سونىڭ ىشىندە مالدىڭ بارلىق تۇرىنەن 53 توننا ەت, 180 توننا كارتوپ پەن كوكونىس, 14 توننا ءسۇت ونىمدەرى, 10 توننا شۇجىق ونىمدەرى مەن جارتىلاي فابريكات, 15 توننا جارما مەن ماكارون ونىمدەرى, 13 توننا نان-توقاش جانە كونديتەر ونىمدەرى, 250 مىڭ دانا جۇمىرتقا, 45 توننا ۇن بار. بارلىق تاۋارلار استانا قالاسىنىڭ بازارلارىندا قالىپتاسقان ورتاشا باعالاردان تومەن قۇن بويىنشا ۇسىنىلادى. قوستاناي وبلىسىنىڭ كۇندەرىنە وراي كەشە استاناداعى ورتالىق كوممۋنيكاتسيالار قىزمەتىندە ارنايى ءباسپاسوز ءماسليحات ءوتتى. وعان قوستاناي وبلىسى اكىمدىگىنىڭ وكىلدەرى قاتىسىپ, ءوڭىردىڭ تاۋەلسىزدىك جىلدارىندا جەتكەن جەتىستىكتەرىمەن ءبولىستى. ماسەلەن, وبلىس اكىمىنىڭ ورىنباسارى سەرگەي كارپليۋكتىڭ حابارلاۋىنشا, تاۋەلسىزدىك جىلدارى قوستاناي وبلىسى جوعارى كورسەتكىشتەرگە قول جەتكىزدى. اتاپ ايتقاندا, اگرارلىق جانە ونەركاسىپتىك سەكتوردا, تۇرعىن ءۇي قۇرىلىسى جانە الەۋمەتتىك سالالارداعى جەتىستىكتەرى اۋىز تولتىرىپ ايتارلىقتاي. «25 جىلدا 4,5 ملن شارشى مەتر تۇرعىن ءۇي پايدالانۋعا بەرىلدى. الداعى 2 جىلدىڭ ىشىندە 90 مىڭ شارشى مەتر الاڭىمەن 21 ءۇي سالىناتىن بولادى. سونىمەن قوسا, تاۋەلسىزدىك جىلدارى وبلىستىڭ ءبىلىم بەرۋ جانە دەنساۋلىق ساقتاۋ سالاسىنىڭ بيۋدجەتى 15 ەسە, مادەنيەتتىڭ  بيۋدجەتى 9 ەسە جانە سپورت بويىنشا 63 ەسە ءوستى», دەدى س.كارپليۋك. ال ءوز كەزەگىندە اۋىل شارۋاشىلىعى باسقارماسىنىڭ باسشىسى بايبوسىن مۋرزين وبلىستىڭ اگروونەركاسىپتىك كەشەن دامۋىنىڭ وڭ سەرپىنىن, 25 جىل ىشىندە اۋىل شارۋاشىلىعىنىڭ جالپى ءونىمىنىڭ كولەمى 332 ملرد تەڭگەگە جەتكەنىن, بيىلعى جىلعى ەگىندى قوسقاندا 106 ملن توننادان استام استىق جينالعاندىعىن اتاپ ءوتتى. اعىمداعى جىلى 400 جاڭا جۇمىس ورنىن اشا وتىرىپ, جالپى سوماسى 7 ملرد تەڭگەگە 24 ينۆەستيتسيالىق جوبانى پايدالانۋعا بەرۋ جوسپارلانىپ وتىر ەكەن.  ولاردىڭ ەڭ ءىرى دەگەن 4-ەۋى اۋىل شارۋاشىلىعى سالاسىندا جۇزەگە اسىرىلاتىنى ايتىلدى. ءباسپاوز ءماسليحاتىندا سونداي-اق, وبلىستىڭ مادينەت باسقارماسىنىڭ باسشىسى ەرلان قالماقوۆ استانادا وتەتىن قوستاناي وبلىسى كۇندەرى اياسىندا ۇيىمداستىرالاتىن مادەني شارالار تۋرالى ايتىپ بەردى.  جارمەڭكەدەن باسقا استانالىقتار ءوڭىردىڭ مادەني مۇراسىمەن تانىسىپ, رۋحاني ازىق الادى. دينارا بىتىكوۆا, «ەگەمەن قازاقستان»