ءسالافيزمدى ناسيحاتتاۋعا توسقاۋىل قويامىز - ەرمەكباەۆ

بۇگىن ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ ورتالىق كوممۋنيكاتسيالار قىزمەتىندە بريفينگ وتكىزىپ, ەكستەرميزممەن كۇرەس ماسەلەسى تۋرالى بىرقاتار ماڭىزدى مالىمدەمە جاسادى. سونىمەن قاتار ول سالافيزم اعىمىنا قاتىستى پوزيتسياسىن دا اشىق ايتتى. ءمينيستردىڭ ايتۋىنشا, سالافيزم – قازاقستان قوعامى ءۇشىن جات, بىراق ۇيىم ەمەس, اعىم بولعاندىقتان ونى زاڭدىق جولمەن تىيا المايمىز. ءبىز ەرمەكباەۆتىڭ سوزدەرىنەن بىرنەشە ماڭىزدى تسيتاتا بەرىپ وتىرمىز.   قازاقستان ءۇشىن سالافيزم قابىلداۋعا كەلمەيتىن, دەسترۋكتيۆتى اعىم دەپ سانايمىز. ونىڭ سىرتتان كەلگەن يدەولوگيا ەكەنىن ايتۋىمىز كەرەك. وعان قارسى ازاماتتاردىڭ سانى كوبەيۋ ۇستىندە. قازاقستان قوعامى جالپى العاندا راديكاليمزگە اپاراتىن بوتەن سەنىمگە تەرىس كوزقاراس ۇستانىپ وتىر. بۇگىندە سالافيزم جولىنا تۇسكەن ادامدار سانى ازايعانى بايقالادى. جانە قازاقستاندا ولاردىڭ ۇيىمداسقان قۇرىلىمى جوق. ءبىز سالافيزم يدەولوگياسىن ناسيحاتتايتىن ينتەرنەت-سايتتاردىڭ, ادەبيەتتىڭ تارالۋىنا توسقاۋىل قوياتىن بولامىز. زاڭدىق تۇرعىدان تىيىم سالۋسىز-اق قازاقستان قوعامىنىڭ بۇل اعىمنىڭ ەتەك جايۋىنا جول بەرمەۋگە سانا-سەزىمى جەتەدى. قازاقستاندا 23 تەررورلىق جانە ەكسترەميستىك ۇيىمدارعا تىيىم سالىنعان. الايدا, سالافيزم ۇيىم ەمەس, ول – ءدىني اعىم, كوزقاراستار جۇيەسى. شاريعاتپەن ءومىر سۇرەتىن كەيبىر ەلدەردە سالافيزمگە جاقىن ءدىني اعىمدار ءداستۇرلى سەنىم رەتىندە قابىلدانۋى مۇمكىن. ال قازاقستانعا كەلەر بولساق, قازىرگى زاماننىڭ تەولوگتارى ءسالافيزمنىڭ ءبىز ءۇشىن دەسترۋكتيۆتى ەكەنىن ايتادى. سالافيزم جولىنا تۇسكەندەر ءوز يدەيالارىن ۇلتتىق داستۇردەن, مادەني-رۋحاني قۇندىلىقتاردان جوعارى قويادى. ولاردىڭ ويىنشا, ەڭ ءادىل قوعام – قاتاڭ ءدىني پرينتسيپتەر نەگىزىندە قۇرىلعان مەملەكەت. بىراق وزدەرى مۇنى اشىق ايتپايدى. قازىرگى كەزدە سالافيزم يدەيالارى يسلام الەمىندەگى بەدەلدى تۇلعالار, وزىق ويلى يسلام ويشىلدارى تاراپىنان سىنعا ۇشىراۋدا. ءدىن سالاسىنداعى جۇمىستاردى ۇيلەستىرۋ ءۇشىن ۇكىمەت جانىنان ۆەدومستۆوارالىق كوميسسيا قۇرىلادى. وسى ورايدا مينيسترلىك ءدىندى تەرىس ماقساتتارعا پايدالانۋعا ۇمتىلاتىن كەز كەلگەن ارەكەتكە جول بەرمەۋ ءۇشىن بارلىق شارالاردى قابىلدايدى. ءدىني ەكسترەميزم مەن تەرروريزمنىڭ الدىن الۋ جۇمىستارى نەگىزگى 2 باعىتتا – جالپى پروفيلاكتيكا جانە ماقساتتى رەابيليتاتسيالاۋ جۇمىستارى ارقىلى جۇرەتىن بولادى. جالپى پروفيلاكتيكا قوعامدا ءدىني ەكسترەميستىك يدەولوگياعا قارسى احۋال قالىپتاستىرۋدى, دىنگە قىزىعۋشىلىق تانىتاتىن تۇرعىنداردىڭ ساۋاتىن كوتەرۋدى كوزدەيتىن بولادى.  ماقساتتى رەابيليتاتسيا ەكسترەميستىك اعىمدارعا ەرگەن ادامداردى تەولوگيالىق تۇرعىدان ءداستۇرلى سەنىمگە قايتارۋ ماقساتىندا جەكە جۇمىستار جۇرگىزۋ ارقىلى ىسكە اسادى. بۇل باعىتتا كولونيالاردا جازالارىن وتەۋشىلەرگە ەرەكشە نازار اۋدارىلادى.