اقىننىڭ جۇلدىزى «جاندى»

ءبىز بۇعان دەيىن دە الماتىدا بىرنەشە جۇلدىزدار اللەيا­سى بار ەكەندىگىن جازعانبىز. ونىڭ العاشقىسى «قازاقفيلم» ۇلت­تىق كينوستۋدياسىندا بولسا, ودان كەيىن «الماتى» شيپاجايىندا دا اشىلعان. ەندىگى ءبىر جۇلدىزدار اللەياسى الماتىلىقتار كوپتەپ جينالاتىن MEGAPark ساۋدا ويىن-ساۋىق ورتالىعىنىڭ كىرەبەرىسىندە ورنالاسقان. ەندى وسى جۇلدىزدار اللەياسىندا اقىن ولجاس سۇلەي­مەنوۆتىڭ اتاۋلى جۇلدىزى بار. دۇيسەنبى كۇنى دۇكەنگە جينال­عان كوپشىلىك كوزى ءتىرى اقىن­دارىنىڭ ىشىندە اتاقتىسى, جازۋ­شى-ادەبيەتتانۋشى, قوعام قايرات­كەرى ولجاس سۇلەيمەنوۆپەن ديدارلاسىپ, قولتاڭبا الىپ, ەرەكشە ساتتەردى باس­تان وتكەردى. وسىناۋ قۋانىشتى وقيعاعا ەلىمىزدىڭ عىلىم, مادەنيەت, ونەر سالاسىنداعى كورنەكتى قاي­رات­كەرلەرى ءاسانالى ءاشىموۆ, مۇرات اۋەزوۆ, تيمۋر سۇلەيمەنوۆ, ەفيم زۋسلين, مايدان ابىشەۆ, سافار ابدۋللو سىندى تانىمال ادامدار ورتاقتاستى. «جۇلدىزدار اللەياسى نارىق­تىق ەكونوميكا جاعدايىندا ۇلكەن دۇكەننىڭ قاسىندا ورنالاسقانى دۇرىس, بۇل قۋانتادى. ويتكەنى, مادەنيەت تە نارىقتىق ەكونومي­كانىڭ زاڭدارىنا باعىنادى. جىل­دارعا سوزىلاتىن ۇلكەن جوبا­لارىم بار. سىزدەردىڭ وسى قۇر­مەت-قوشەمەتتەرىڭىز ماعان شىعار­ماشىلىق قۋات بەرەدى. ەڭ باس­تىسى, ىنتىماق پەن تىنىشتىق بولسىن. ەلiمiز امان بولسىن! الەمنىڭ تۇكپىر-تۇكپىرىن ارالايمىن. مازاسىز كۇن كەشىپ جاتقان ەلدەردە, شيەلەنىستى ايماقتاردا دا بولدىم. مۇنداي جەرلەرگە بارعاننان كەيىن مەنىڭ جازۋعا دەگەن قۇلشىنىسىمنىڭ قۋاتى ارتا تۇسەدى. بارلىقتارىڭىزعا العىسىمدى بىلدىرە وتىرىپ, بۇدان كەيىن دە سىزدەردىڭ قۇر­مەت­تەرىڭىزدىڭ ۇدەسىنەن شىعا­مىن دەپ ۇمىتتەنەمىن», – دەدى ولجاس سۇلەيمەنوۆ. اللەياداعى اتاۋلى جۇلدىزدىڭ اشىلۋىندا ەلىمىزدىڭ تانىمال تۇلعالارى ءسوز الىپ, سالتاناتتى وقيعانىڭ سالماعىن ارتتىردى. «بۇل جۇلدىزدار اللەياسى ۇزاق جاسايدى دەگەن ۇمىتتەمىن. ويتكەنى, ول ولجاس سۇلەيمەنوۆ سياق­تى ادامدارعا ارنالعان. بۇلار – عاسىرلار بويى دامىپ كەلە جاتقان مادەنيەتكە قىزمەت ەتەتىن ادامگەرشىلىكتىڭ جوعارى دارە­جەسىنە يە تۇلعالار ساناتىندا. مۇنىڭ بارلىعى قازاقستاندا عانا ەمەس, بۇكىل جەر شارىندا تىنىش­تىق بولۋى ءۇشىن جاسالىپ وتىرعان يگى ءىس», – دەدى مۇرات اۋەزوۆ. Astana Group پرەزيدەنتىنىڭ مادەنيەت جونىندەگى كەڭەسشىسى ايدىن سۇلتانوۆتىڭ ايتۋىنشا, جۇلدىزدار اللەياسىندا ولجاس سۇلەيمەنوۆتىڭ دە جۇلدىزىن «جاعايىق» دەگەن ۇسىنىستى اكتەر ءاسانالى ءاشىموۆ باستاعان. ولجاس سۇلەيمەنوۆتىڭ جۇل­دىزى ءمارماردان, مىس پەن جەزدەن جاسالىنعان. ولشەمى – 60ح60 سم. الدىمەن جۇلدىزدار اللەياسىندا ەكى دۇركىن وليمپيادا چەمپيو­نى, «دوم» قورىنىڭ باسشىسى ارۋجان سايننىڭ جۇلدىزى جاندى. ارۋجان جۇلدىزىن قايىرىم­دىلىقپەن اينالىساتىن قازاق­ستان­دىق ازاماتتارعا ارنادى. كەيى­نىرەك جۇلدىزدار اللەياسىن وليم­پيادا چەمپيونى, قازاقستان ۆەلوسپورت فەدەراتسياسىنىڭ ۆيتسە-پرە­زيدەنتى الەكساندر ۆينو­كۋروۆتىڭ جۇلدىزى, بيىلعى قىر­كۇيەك ايىندا اكتەر, كينو جانە تەاتر رەجيسسەرى, ستسەناري قويۋشى, ۇستاز ءاسانالى ءاشىموۆتىڭ جۇلدىزى «جاندى». ايناش ەسالي, «ەگەمەن قازاقستان» الماتى