ءسىزدىڭ باستامالارىڭىز ءتانتى ەتپەي قويمايدى

قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆقا  جوعارى مارتەبەلى پرەزيدەنت مىرزا! حالىقارالىق مەديا-وكىل جانە الەمدەگى احۋالدىڭ ناشارلاپ كەتۋىنە الاڭداۋشى ازامات رەتىندە سىزگە جانە قازاقستان ۇكىمەتىنە يادرولىق قارۋسىزدانۋ ىسىنە بەرىلگەندىگىڭىز بەن ۇمتىلىسىڭىز ءۇشىن ءوزىمنىڭ ريزاشىلىعىمدى ءبىلدىرۋىم قاجەت دەپ سانايمىن. يادرولىق دەرجاۆانىڭ تۋماسى بولا وتىرىپ مەن بىرنەشە سۋپەردەرجاۆالاردىڭ وسۆ-ءى, وسۆ-ءىى جانە سنۆ سەكىلدى فورۋمداردا ادامداردىڭ جانە قاراپايىم حالىقتىڭ بولاشاق تاعدىرىن شەشەتىن كەلىسسوزدەر جۇرگىزگەن زاماندا ءوسىپ-جەتىلدىم. كەڭەس ودا­عى ىدىراعاننان كەيىن كۇماندى رە­جىمدەرگە يادرولىق قارۋ ساتىپ الۋ­دىڭ بەلگىلى ءبىر مۇمكىندىگى تۋدى. ءسىزدىڭ سەمەي يادرولىق سىناق پوليگونىن جابۋعا باستاماشىلىق تانىتقانىڭىز ءتانتى ەتپەي قويمايدى. بۇل پوليگون وڭىردەگى ادامدار مەن بولاشاق ۇرپاقتىڭ دەنساۋلىعىنا ورنى تولماس وراسان زور زاردابىن تيگىزىپ كەلگەن قارعىس اتقان جەرگە اينالدى. ءبىر قۋانارلىعى, وزىنە پوليگوننىڭ فيزيكالىق تا, پسيحولوگيالىق تا كەرى اسەرىن ايقىن سەزىنگەن كارىپ­بەك كۇيىكوۆ سەكىلدى تالانتتى سۋ­رەتشىلەر قاتال تاعدىرعا قارسى تۇرىپ قانا قويماي, وسىناۋ جان-تۇرشىگەرلىك تاجىريبەنى وزگە الەم­مەن بولىسۋگە قول جەتكىزە الدى. ءسىزدىڭ يادرولىق قارۋسىزدانۋ مەن الەمدە بەيبىتشىلىك پەن تۇراقتىلىقتى ساقتاۋ جولىندا جۇم­ساپ كەلە جاتقان ادام ايتقىسىز كۇش-جىگەرىڭ­ىزدى مويىنداي وتىرىپ, بىرىككەن ۇلتتار ۇيىمى مەن الەمدىك قوعامداستىق قازاقستاندى قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلانۋىمەن قۇتتىقتايدى. بارلىق قۇرلىقتاردىڭ, اسىرەسە, ەۋروپا مەن ازيانىڭ ازاماتتارى الەمگە ءتۇرلى ءادىس-تاسىلدەرمەن, ونىڭ ىشىندە يادرولىق ارسەنال دا بار, قاتەر توندىرگەن نەويمپەرياليستىك كۇشتەر الدىندا ۇرەي-قورقىنىشسىز ءومىر سۇرۋلەرى ءتيىس. كورەگەن شەتەلدىك ساراپشىلار اتوم ەنەرگەتيكاسى مەن تومەن بايىتىلعان ۋران  ەڭبەك ونىمدىلىگى مەن ەكونوميكالىق ءوسىمدى ارتتىرۋ ءۇشىن ءتيىمدى تۇردە پايدالانىلۋى كەرەك ەكەنىن تۇسىنەدى. مەن جاقىندا جاريالانعان «قازاقستان – سەرپىندى ءوسۋ جولىندا» دەگەن ماقالامدى زەرتتەپ, جازۋ كەزىندە ءسىز بەن ءسىزدىڭ كومانداڭىز 2050 جىلعا قاراي قازاقستاندى الەمدەگى اسا دامىعان 30 ەلدىڭ قاتارىنا قوسۋ ءۇشىن جۇزەگە اسىرىپ جاتقان جان-جاقتى قۇرىلىمدىق ساياساتقا كوڭىلىم تولدى. قۇرمەتپەن جانە شىنايى تىلەكتەرمەن, پراشۋن دۋتت, «The Sun Daily» گازەتى رەداكتسيالىق القاسىنىڭ مۇشەسى