مادەنيەت جانە سپورت ءمينيسترى وليمپيادا چەمپيونىن قۇتتىقتادى

مادەنيەت جانە سپورت ءمينيسترى ارىستانبەك مۇحامەدي ۇلى وتاندىق بوكس قۇراماسىنىڭ كاپيتانى دانيار ەلەۋسىنوۆتى ريو-دە-جانەيروداعى وليمپيادانىڭ جەڭىمپازى اتانۋىمەن قۇتتىقتادى. بۇل تۋرالى اتالعان مينيسترلىكتىڭ ءباسپاسوز قىزمەتى حابارلادى. ءوز قۇتتىقتاۋ حاتىندا مينيستر دانيار ەلەۋسىنوۆتىڭ جەڭىسى ەلىمىزدىڭ ميلليونداعان ازاماتى ءۇشىن قۋانىشتى ءسات بولعانىن اتاپ ءوتتى. «قۇرمەتتى دانيار مارات ۇلى! قازاق ەلىنىڭ ءتول سپورتىنا اينالعان بوكستان وليمپيادا چەمپيونى اتانۋىڭىزبەن شىن جۇرەكتەن قۇتتىقتايمىن! بۇل جەڭىسىڭىز ءسىزدىڭ كۇشىڭىز بەن شەبەرلىگىڭىزگە سەنگەن ەلىمىزدىڭ ميلليونداعان ازاماتى ءۇشىن قۋانىشتى ءسات بولدى. بۇكىل الەم حالقىنىڭ الدىندا اتى ايگىلى قارسىلاستارىڭىزدى تىزە بۇكتىرىپ, شىن مىقتىلىعىڭىزدى مويىنداتا ءبىلدىڭىز. ال, ءبىز ءسىز سياقتى باتىرلارىمىزدىڭ ارقاسىندا شىنايى ماقتانىش سەزىمىنە بولەندىك. ءسىز سەكىلدى جۇرەكتى, بىلەكتى ازاماتتارىمىز باردا قازاقستاننىڭ ءانۇرانى بارشا ادامزاتتىڭ الدىندا ءالى تالاي رەت شىرقالىپ, تۋى كوككە كوتەرىلەتىنىنە نىق سەنىمدىمىن. قازاق حالقىنىڭ دارا ۇلدارى باستاعان كوماندا ارقاشان تەك جەڭىس تۇعىرىنان كورىنەدى دەگەن ويدامىن», – دەپ حاتىندا ارىستانبەك مۇحامەدي ۇلى. ايدار ورىسباەۆ