قازاق كۇرەسىنىڭ قارىمى

بيىل قىتايدا دۇنيەجۇزىلىك قازاق كۇرەسى فەدەراتسياسىنىڭ ۇيىمداستىرۋىمەن قازاق كۇرەسىنەن الەم چەمپيوناتىنىڭ جالاۋى جەلبىرەيدى. الەمدىك دودا ىلە-قازاق اۆتونوميالى وبلىسى موڭعولكۇرە اۋدانىندا قىركۇيەك ايىنىڭ 21-25 ارالىعىندا وتەدى. وسى كۇندەرى تورتكۇل دۇنيەنىڭ ءتورت بۇرىشىنان ءتول كۇرەسىمىزدەن وتەتىن چەمپيوناتقا ءوز ەلدەرىندە جاۋىرىنىن جەرگە تيگىزبەي جۇرگەن بالۋاندار جينالىپ, كۇش سىناسادى. دۇنيەجۇزىلىك قازاق كۇرەسى فەدەراتسياسىنىڭ پرەزيدەنتى سەرىك توكەەۆتىڭ ايتۋىنشا, بيىلعى چەم­پيوناتقا العاش رەت بەس قۇر­لىقتىڭ بالۋاندارى قاتىسادى. سونىڭ ىشىندە قازاق كۇرەسى جاقسى تانىلىپ ۇلگەرگەن ازيا مەن ەۋروپا ەلدەرىنەن باسقا, افريكا, امەريكا مەن اۆستراليا قۇرلىعىنان بالۋاندار بار. بيىلعى بەلدەسۋگە جاسىل قۇرلىقتىڭ بالۋان­دارى دا قاتىسامىز دەپ وتىنىشتەرىن بەرىپ وتىر. بۇعان دەيىن اۆستراليانىڭ سپورتشىلارى قازاق كۇرەسىنەن جارىستارعا قاتىسىپ كورمەگەن ەدى. بۇل جاسىل قۇرلىقتا ءتول كۇرەسىمىزگە دەگەن قىزىعۋشىلىقتىڭ ارتىپ كەلە جاتقانىن كورسەتەدى. ال الەم چەمپيوناتى وتەتىن قىتاي ەلىندە قازاق كۇرەسىنە دەگەن كوزقاراس وزگەرگەن. سونىڭ ءبىر دالەلى رەتىندە وسى ەلدە ۇلتتىق كۇرەسىمىزدەن چەم­پيوناتتار مەن تۋرنيرلەردىڭ ءجيى وتكىزىلە باستاعانىن ايتۋعا بولادى. جاقىندا ەلىمىزگە تاعى ءبىر قۋانىشتى حابار كەلىپ جەتتى. قى­تايدا دۇنيەجۇزىلىك قازاق كۇرەسى فەدەراتسياسىنىڭ ىستەگەن جۇمى­سىنىڭ ارقاسىندا شىڭجاڭ-ۇيعىر اۆتونوميالى اۋدانىنىڭ 10 اۋدانىندا, ىلە-قازاق اۆتونوميالى وبلىسىنىڭ 3 قالاسىندا قازاق كۇرەسىنەن فەدەراتسيالار اشىلدى. «ءبىز قىتايداعى اعايىنعا العىس ايتامىز. بۇعان ەلدەگى كۇرەس دەسە دەلەبەسى قوزاتىن قاۋىم قۋانىپ قالدى. قىتايداعى قانداستارىمىز الەم چەمپيوناتىنىڭ شىعىنىن دا وزدەرى كوتەرىپ وتىر. وسى جەردە قىتايدىڭ شۇار-داعى جوعارى لاۋازىم يەسى اسحات كەرىمباي مىرزاعا, ىلە-قازاق اۆتونوميالى وبلىسىنىڭ بۇرىنعى اكىمى قىزايجان سەيىلقوجا ۇلىنا العىسىمىز ەرەكشە. بۇل ازاماتتار ءتول كۇرەسىمىزدەن جارىستاردىڭ وتۋىنە قولدان كەلگەنشە كومەكتەسىپ, قولداۋ كورسەتىپ كەلەدى. سونىمەن بىرگە, التايدىڭ ار جاعىنداعى اعايىننىڭ اراسىندا قازاق كۇرە­سىنەن جارىستار ۇيىمداستىرۋعا اتسالىسىپ جۇرگەن باۋىرىمىز سەرىك كەنەنبايدىڭ ەڭبەگى ەرەن. ول قىتايدا سوڭعى ەكى جىلدا ءبىراز جۇمىستار جاساپ, ۇلتتىق كۇرەسىمىزدىڭ جالاۋىن جەلبىرەتتى. بيىلعى دوداعا دايىندىقتى دا وسى باۋىرىمىز اتقارىپ ءجۇر. قىتايدا افريكا مەن ازيا ەلدەرىنەن كەلە­تىن بالۋانداردىڭ, سپورت دەلە­گاتسيالارىنىڭ بارلىق جول شىعىنىن دا وزدەرىمىز كوتەرەمىز دەپ جاتىر. بۇل, ارينە, ىلە-قازاق اۆتونوميالى وبلىسى موڭعولكۇرە اۋدانى باسشىلارىنىڭ قازاق كۇرەسىنە دەگەن قامقورلىعىن ءبىل­دىرەدى», – دەدى سەرىك ادام ۇلى. ونىڭ ايتۋىنشا, الەم چەمپيوناتى كەزىندە قازاق كۇرەسىنەن عىلىمي كونفەرەنتسيا وتەدى. وعان ءتول كۇرەسىمىزدى زەرتتەپ, زەردەلەپ جۇرگەن ماماندار قاتىسىپ, قازاق كۇرەسى تۋرالى بايانداما جاسايدى. بيىلعى الەم چەمپيوناتى وسىمەن التىنشى رەت جالاۋىن كوتەرەدى. ول العاش رەت 2006 جىلى الماتى قالاسىندا وتسە, ودان كەيىن رەسەيدىڭ ور قالاسىندا, 2010 جىلى استانادا, 2013 جىلى بەلا­رۋستىڭ مينسك قالاسىندا ءوتتى. ال سوڭعى رەت الەمدىك دودا رەسەيدىڭ ورىنبور قالاسىندا وتكىزىلدى. داستان كەنجالين, «ەگەمەن قازاقستان»