تاعى ەكى قازاقستاندىق اتلەت دوپينگپەن قولعا ءتۇسىپ قالدى

حالىقارالىق وليمپيالىق كوميتەت (حوك) بۇكىلالەمدىك دوپينگكە قارسى اگەنتتىكتىڭ (WADA) قولداۋىمەن بەيجىڭ وليمپيالىق ويىندارىنا قاتىسۋشىلاردىڭ دوپينگ-سىنامالارىن تەكسەرۋدى جالعاستىرىپ جاتىر. Informburo.kz-ءتىڭ حابارلاۋىنشا, قازاقستاننىڭ 4 شتانگاشىسى ءۇشىن بۇل تەكسەرىس ناشار ناتيجەمەن اياقتالعان. حوك پەن WADA-نىڭ «قارا تىزىمىنە» ۆلاديمير سەدوۆتان باسقا, تاعى يرينا نەكراسوۆا مەن ماريا گرابوۆەتسكايا دا ءتۇسىپ قالدى. ولاردىڭ ەكەۋى دە 2008 جىلعى وليمپيادادا مەدال يەگەرلەرى اتانعان. اتاپ ايتقاندا, نەكراسوۆا 63 كيلوعا دەيىنگى سالماقتا كۇمىس, ال گرابوۆەتسكايا 75 كيلودان اۋىر سالماقتا قولا مەدالداردىڭ يەگەرلەرى اتانعان. ماماندار «ا» سىناماسىندا ولاردان تىيىم سالىنعان پرەپاراتتار تاپتى. ال بەيجىڭ الامانىنىڭ قورىتىندىسىندا تىزىمگە ىلىنگەن ءتورتىنشى اتلەت - يليا يلين. ەندى شىلدەنىڭ 18-26-سى ارالىعىندا لوزاننادا (شۆەيتساريا) قازاقستان تاراپى وكىلدەرىنىڭ قاتىسۋلارىمەن «ب» سىناماسىن اشۋ پروتسەدۋراسى جۇرگىزىلەدى. بۇدان بۇرىن دوپينگپەن يليا يلين (2008 جىلعى وليمپيادا, 2012 جىلعى وليمپيادا), الماس وتەشوۆ (2015 جىلعى الەم چەمپيوناتى, 4 جىلعا ديسكۆاليفيتسيا الدى), سۆەتلانا پودوبەدوۆا (2012 جىلعى وليمپيادا), ەرمەك ءومىرتاي (2015 جىلعى الەم چەمپيوناتىى, 4 جىلعا  ديسكۆاليفيتسيا الدى), ءزۇلفيا چينشانلو (2012 جىلعى وليمپيادا), جاسۇلان قىدىرباەۆ (ازيانىڭ 2012 جىلعى جاسوسپىرىمدەر چەمپيوناتى, 2015 جىلعى الەم چەمپيوناتى, 8 جىلعا ديسكۆاليفيتسيا الدى), مايا مانەزا (2012 جىلعى وليمپيادا) جانە فاينا سيۆانباەۆا (دوپينگكە قارسى ەرەجەنى ءۇش رەت بۇزعانى ءۇشىن 8 جىلعى ديسكۆاليفيتسيا الدى) قولعا تۇسكەن بولاتىن. جاقىن ارادا ءيليننىڭ, پودوبەدوۆانىڭ, چينشانلو مەن مانەزانىڭ قانداي جازا الاتىندارى بەلگىلى بولادى. ال ۆلاديمير سەدوۆتىڭ ءوزى دوپينگ جانجالىنا قازاقستان قۇراماسىنىڭ باس جاتتىقتىرۋشىسى الەكسەي ني تىكەلەي كىنالى دەپ ەسەپتەيدى. بۇل تۋرالى ول informburo.kz تىلشىسىنە بەرگەن ەكسكليۋزيۆتى سۇحباتىندا ايتىپ بەردى. دامير قوجامقۇل