سالىق تولەۋ ءتارتىبى جەڭىلدەدى

قارجى مينيسترلىگى مەملەكەتتىك كىرىستەر كوميتەتى كورسەتىلەتىن قىزمەت تۇرلەرىنىڭ تۇتىنۋشىلار ءۇشىن جەڭىلدەتىلگەنىن جانە الداعى ۋاقىتتا بۇل جۇمىس ودان ءارى جەتىلدىرە تۇسەتىنىن حابارلادى. اتالعان كوميتەتتىڭ مەملەكەتتىك قىزمەت كورسەتۋ باسقارماسىنىڭ باسشىسى نۇرلان راحىمعاليەۆ بريفينگتە اتاپ وتكەندەي, اسىرەسە, سالىق تولەۋ ءتارتىبى بۇرىنعىمەن سالىستىرعاندا ايتارلىقتاي وڭايلاعان.   قازىرگى تاڭدا قوسىمشا قۇن سالىعىن تولەۋشىنىڭ كۋالىگىن الۋ ءراسىمى ەلەكتروندى جۇيە ارقىلى جۇرگىزىلەدى. سونىمەن قاتار, سالىق تولەۋشىلەردىڭ ءتۇرلى مەكەمەلەرگە قارىزى جوق ەكەندىگى تۋرالى انىقتاما بەرۋ تۋرالى مىندەتىن زاڭدى تۇردە الىپ تاستاعان. قاجەت بولعان جاعدايدا سالىق تولەۋشى ەمەس, مەملەكەتتىك ورگاننىڭ ءوزى ەلەكتروندى ساۋال جولداۋ ارقىلى كوميتەتتىڭ سايتىنان بەرەشەك تۋرالى ءتيىستى مالىمەتتى الادى. «ءبىز ءۇشىن سالىق تولەۋشىلەرمەن ارادا كەرى بايلانىس ورناتۋ وتە ماڭىزدى. ءبىز ولاردىڭ تالاپ-تىلەكتەرىن ءاردايىم نازاردا ۇس­تايمىز. سول ءۇشىن ارنايى ءدوڭ­گەلەك ۇستەلدەر, سەمينارلار وتكى­زەمىز. سالىق تولەۋشىلەردىڭ ۇسى­نىستارىن قابىلداپ, تالداۋ جا­سايمىز», دەدى ن.راحىمعاليەۆ. تاعى ءبىر ايتا كەتەرلىگى, مەم­لەكەتتىك كىرىس كوميتەتى سالىق تولەۋشىلەردىڭ ۇسىنىستارىن, تالاپ-تىلەكتەرى مەن شاعىمدارىن كوميتەتتىڭ web سايتى مەن Whatsapp ءموبيلدى قوسىمشاسى ارقىلى دا قابىلدايدى. سونداي-اق, ءتيىستى ساۋالدارىن كوميتەتتىڭ الەۋمەتتىك جەلىدەگى ارنايى پاراق­شا­­سىنا نەمەسە كوميتەت توراعاسى­نىڭ جەكە بلوگىنا دا جولداي الادى. كوميتەتتىڭ سالىق تولەۋ ءتارتىبىن ودان ءارى وڭتايلاندىرۋعا باعىتتالعان جاڭاشىل قادامى – شاعىن بيزنەسكە شۇعىل كومەك. بۇل قاناتقاقتى جوبا ءدال قازىر تەك كوميتەتتىڭ رەسمي پورتالىندا عانا ىسكە اسىرىلعان. شاعىن بيزنەس وكىلدەرى پورتالدا ونلاين تەستىلەۋگە قاتىسىپ, ءتيىستى سالىق ەسەپتىلىگى سىندى اقپاراتتاردى الا الادى. ارنۇر اسقاروۆ, «ەگەمەن قازاقستان»