فرانتسيادا ءوتىپ جاتقان فۋتبولدان ەۋروپا چەمپيوناتى توپتىق تۋردى اياقتاعاننان كەيىن ءبىر كۇندىك ءۇزىلىس الىپ, 25 ماۋسىمدا شيرەك فينالدىق پلەي-وفف شايقاستارىن باستاپ كەتتى. وندا سەنبى-جەكسەنبى كۇندەرى 6 ماتچ بولىپ ءوتتى. قالعان ەكى كەزدەسۋ كەشە تۇندە وينالدى. وسىلايشا ورمەكتىڭ جۇزىنەن اۋىپ كەتكەن بىرىنشىلىك ءوزىنىڭ شەشۋشى كەزەڭىنە بەت تۇزەدى.
ءبىز ءسوز ەتكەلى وتىرعان ويىنداردىڭ ىشىندە نەگىزىنەن فاۆوريت سانالعان جاساقتار جارىس جولىن جالعاستىرۋعا قول جەتكىزدى.
بۇل ۇشىراسۋلاردى سەنبى كۇنى شۆەيتساريا – پولشا قۇرامالارى باستاپ بەردى. سەن-ەتەن قالاسىندا وتكەن ويىندا پولياكتار جەڭىستى تىستەرىمەن تارتىپ شىعارعانداي ارەكەتپەن العا اتتادى. كەزدەسۋدىڭ نەگىزگى ۋاقىتى 1:1 بولىپ ءبىتتى. وۆەرتايمدا احۋال وزگەرگەن جوق. پەنالتي سەرياسى جەكپە-جەگىندە ادام ناۆالكانىڭ شاكىرتتەرى 5:4 ەسەبىمەن باسىم ءتۇستى. بەرن بەرەندەرى ويىننان كەيىنگى «لوتەرەيادا» جولدارى بولا بەرمەيتىندەرىن تاعى كورسەتتى. ولار سوڭعى رەت بۇدان تۋرا 10 جىل بۇرىن, 2006 جىلى الەم چەمپيوناتىندا ۋكرايندارعا دا تاپ وسىلاي ۇتىلىپ ەدى.
- شىنى كەرەك, شۆەيتساريالىقتارعا 1/8 فينالعا شىعۋدىڭ ءوزى ۇلكەن ساتتىلىك بولدى. ءبىرىنشى ماتچتا فابيان شەردىڭ تەز گول سوعۋى ارقاسىندا البانداردى جەڭگەن ولار كەلەسى ەكى ماتچتا (رۋمىندارمەن – 1:1, فرانتسۋزدارمەن – 0:0) تەڭ ويناپ, توپتان ەكىنشى بولىپ شىقتى. بىراق جۇرت سۇيسىنەتىندەي ويىندارى بولا قويمادى. بۇلارعا قاراعاندا, پولياكتار ءبىرشاما جاقسى اسەر قالدىردى. ولار ۋكراينانى ايتارلىقتاي ەركىن ۇتتى (1:0), سولتۇستىك يرلانديادان دا ءبىراز ارتىق كورىندى (1:0), ال گەرمانيامەن ايقاستا ءوز قاقپاسى قۇلپىن اشتىرمادى. ەسەپتى كەزدەسۋدە دە ءبىرىنشى بولىپ گول سوقتى. ونى تۋرنير باستالعالى ءبىر جارقىراپ كورىنە الماي كەلگەن روبەرت لەۆاندوۆسكيدىڭ ورنىنا ليدەرلىك تىزگىنىن ۇستاعان ياكۋب بلاششيكوۆسكي 39-مينۋتتا گول سالدى. بىراق پولشا ەكىنشى تايمدا ينيتسياتيۆانى بەرىپ قويدى. بۇل ارالىقتا شۆەيتساريالىقتاردىڭ جورىقتارى قاۋىپتى بولىپ تۇردى. ولار 82-مينۋتتا دجەردان شاكيريدىڭ قايشىلاپ ۇرۋ ارقىلى گول سوعۋىمەن تارازى باسىن دا تەڭەستىردى.
- پاريجدە الاڭعا ۋەلس پەن سولتۇستىك يرلانديانى شاقىرعان كەلەسى ماتچ ءوزىنىڭ بريتانيالىق دەربي تۇرپاتىمەن قويماي, وعان قازىلىق ەتكەن تورەشىلەردىڭ دە البيون جەرىنىڭ وكىلدەرى بولىپ شىعۋىمەن ەرەكشەلەندى. ماتچ تارتىسقا تولى ءوتتى. بىراق ول اسىرە قىزىعىمەن ەمەس, ەكى جاقتى تەكەتىرەسىنىڭ كوپتىگىمەن كوزگە ءتۇستى. ويىن بارىسىندا فاۆوريت سانالعان ۆالليلىكتەر جۇلدىزدارى ارون رەمزي مەن گارەت بەيلدىڭ تاسادا قالىپ قويۋلارى قارسىلاستار ءمۇمكىندىكتەرى ارا سالماعىن تەڭەستىرىپ جىبەرگەندەي اسەر ەتتى. ولار بىرىنەن-ءبىرى اسىپ تۇسە المادى. شاپپا-شاپ ايقاس گارەت ماكاۋليدىڭ 76-مينۋتتا قاقپا الاڭىندا بەيلگە قاراي كولبەي ۇشىپ كەلە جاتقان دوپتىڭ جولىن كەسپەك بولىپ, ونى ءوز تورىنا قاراي سۇڭگىتىپ جىبەرۋىمەن اياقتالدى. وسى اۆتوگول ۋەلستى جەڭىسكە جەتكىزدى. ءسويتىپ, بۇل قۇراما 1958 جىلدان بەرى ءبىرىنشى رەت شيرەك فينالدا ويناۋ قۇرمەتىنە يە بولدى.
- سەنبى كۇنى الاڭعا ەڭ سوڭىنان حورۆاتيا جانە پورتۋگاليا كوماندالارى شىقتى. بۇل ەڭ ءبىر شيەلەنىسكە تولى ماتچ بولدى. كەزدەسۋ الدىندا ەكى جاق تا الدىنا قالايدا كەلەسى كەزەڭگە ءوتۋ مىندەتىن قويدى. توپتا يسپانيا, چەحيا جانە تۇركيا كوماندالارىمەن تالاسقا تۇسكەن حورۆاتتار كۇتپەگەن جەردەن ءبىرىنشى ورىن الدى. ال وعان قاراعاندا, الدەقايدا ءالسىز سانالاتىن ۆەنگريا, يسلانديا جانە اۆستريا فۋتبولشىلارى توبىنا قوسىلعان پورتۋگاليا ءۇش ويىندى دا تەڭ اياقتاپ, 1/8 فينالعا ارەڭ شىقتى. سوندا دا بولسا, اتالمىش ماتچتا ەكى جاقتىڭ مۇمكىندىكتەرى بىردەي سانالدى. بۇعان ماديارلارمەن سوڭعى ويىندا چەمپيونات سورە جازعالى بەرى ءبىرىنشى رەت جۇرت كوڭىلىنەن شىعاتىنداي شىمىر ويىن كورسەتىپ, كومانداسى سوققان ءۇش گولعا دا تۇگەل تىكەلەي قاتىسقان كريشتيانۋ رونالدۋدىڭ بابىنا كەلە باستاۋى باستى سەبەپ بولدى. «ەۋروپا برازيلدەرىنىڭ» كاپيتانى مۇنداي سەنىمنىڭ بەكەر ەمەس ەكەنىن ويىن بارىسىندا اقىرى ءبىر تانىتتى. ءبىر-بىرلەرىن كەزدەسۋ كەلەسىندە الا الماعان باسەكەلەس جۇپ ونىڭ نەگىزگى ۋاقىتىن ەسەپ اشپاعان كۇيى ءتامامدادى. بىراق پورتۋگالدار ويىننىڭ ەندشپيلىندە ەداۋىر بەلسەندى كورىندى. مۇندا باس جاتتىقتىرۋشى فەرناندۋ سانتۋشتىڭ وتكەن كەزدەسۋدە جۇزەگە اسىرعان تاكتيكاسىن قايتا قولدانۋى ۇلكەن ءرول ويناپ كەتتى. اتاپ ايتقاندا, ول رەناتۋ كۋارەجمانى تاعى دا تارتىس قىزىپ جاتقان كەزدە الاڭعا شىعاردى. بۇل جولى نەگىزگى مەرزىم بىتۋگە 3 مينۋت قالعاندا عانا كورىنگەن 18 جاستاعى جارتىلاي قورعاۋشىنىڭ وۆەر-تايم ءۇشىن دايىندالعانى بەلگىلى بولىپ قالدى. ال قوسىمشا ۋاقىتتا الدىڭعى شەپكە كوپ كۇش قوسقان ول بۇعان دەيىن دوماگوي ۆيدانىڭ ءبىر ءوزى-اق ءاربىر وقىس قيمىلدارىن «تۇنشىقتىرىپ» تاستاپ تۇرعان رونالدۋ مەن ءنانيدىڭ جۇكتەرىن بىردەن جەڭىلدەتىپ سالا بەردى. وسى تۇستا پورتۋگاليا قۇراماسى شىنداپ اتقا قوندى. سول جويقىن جورىقتاردىڭ بىرىندە وڭ قاپتالدان قۇيعىتىپ كەلىپ ۇرعان كريشتيانۋدىڭ سوققىسىن حورۆات گولكيپەرى دانيەل سۋباشيچ قايتارىپ ۇلگەردى. بىراق دوپ الدىنا قاراي ءتۇستى. ونى سول كەزدە جۇگىرىپ كەلىپ قالعان كۋارەجما قاقپاعا قاراي تۋرا باعىتتاپ ۇلگەردى. گول! ءسويتىپ, پورتۋگال كومانداسى جەڭىسكە جەتتى.
- جەكسەنبى كۇنى ليوندا يرلانديامەن كۇش سىناسقان فرانتسيا انتۋان گريزمانن 58 جانە 61-مينۋتتاردا سالعان ەكى گولدىڭ ارقاسىندا شيرەك فينالعا باراتىندار ساپىنا قوسىلدى. بىراق بۇل ويىننىڭ بارىسى ولار ءۇشىن وڭاي باستالعان جوق. يرلانديالىقتار كەزدەسۋدىڭ 118-سەكۋندىندا پەنالتيدەن گول سوعىپ, بىردەن العا شىعىپ كەتتى. ول پول پوگبانىڭ ءوز ايىپ الاڭىندا قارسىلاستار شابۋىلشىسىن قاعىپ تۇسىرۋىنە بايلانىستى بەلگىلەندى. وسى جولى روببي برەددي سوققان گول ەۋروپا چەمپيوناتى تاريحىندا ەڭ تەز سوعىلعان ەكىنشى گول بولدى. ال ءبىرىنشى ورىندا 1974 جىلى گوللانديالىق يوحان نەەسكەنستىڭ 87-سەكۋندتا سوققان گولى تۇر. الاڭ يەلەرىنە قارسىلاستارىنىڭ قارسىلىعىن باسىپ, ءوزىن العا شىعارۋ ءۇشىن كوپ تەر توگۋگە تۋرا كەلدى.
- بۇدان كەيىنگى ەكى ويىن دا ءىرى ەسەپتەرمەن اياقتالدى. الدىمەن ليللدە گەرمانيا سلوۆاكيانى 3:0 ەتىپ ۇتتى. وسى ارقىلى نەمىستەر چەمپيوناتتا قاقپاسىن گولدان ساقتاپ قالىپ تۇرعان ۋاقىتىن 360 مينۋتقا جەتكىزدى. ال گولداردى جەروم بواتەنگ (8-مينۋت), ماريو گومەس (43) جانە يۋليان دراكسلەر (63) ءتۇسىردى. 14-مينۋتتا مەسۋت وزيل پەنالتي ۇرا الماي قالدى. شاپقان سايىن ورلەپ كەلە جاتقان بەلگيا قۇراماسى بۇلاردان دا اسىپ ءتۇستى. ول تۋلۋزادا ۆەنگريامەن وتكەن ويىندا 4:0 دەگەن ەسەپتى تىركەدى. بەلگيالىقتار مۇنداي زور باسىمدىققا ويىننىڭ سوڭعى 12 مينۋتى ىشىندە قول جەتكىزدى. ال ەسەپتى ولار 10-مينۋتتا ايىپ دوبىن ۇرۋ بارىسىندا اشقان ەدى. ونى توبي الدەرۆەيرەلد ءتۇسىردى. جەڭىمپازدار ساپىنداعى قالعان گولداردى ميشي باتشۋاي (78), ەدەن ازار (80) جانە ياننيك فەررەيرا-كارراسكو (90+1) سوقتى.
