مەملەكەتتىك ءتىلدى ناسيحاتتاۋعا ارنالعان بايقاۋ مارەگە جەتتى
كەشە مادەنيەت جانە سپورت مينيسترلىگىنىڭ تىلدەردى دامىتۋ جانە قوعامدىق-ساياسي جۇمىس كوميتەتى مەملەكەتتىك ءتىل ساياساتىن بۇقارالىق اقپارات قۇرالدارىندا ناسيحاتتاۋ بەلسەندىلىگىن ارتتىرۋ ماقساتىندا «مەملەكەتتىك ءتىل جانە باق» رەسپۋبليكالىق بايقاۋىنىڭ جەڭىمپازدارىن سالتاناتتى ماراپاتتاۋ ءراسىمىن وتكىزدى.
ماراپاتتاۋ ءراسىمى مادەنيەت جانە سپورت ءمينيسترى ارىستانبەك مۇحامەدي ۇلىنىڭ قۇتتىقتاۋ سوزىمەن اشىلدى. شارا بارىسىندا مينيستر جۋرناليستەردى قول جەتكىزگەن تابىستارى مەن شىعارماشىلىق قىزمەتتەرى ءۇشىن قۇرمەت گراموتالارمەن جانە العىس حاتتارمەن ماراپاتتادى. بايلانىس جانە اقپارات قىزمەتكەرلەرى كۇنىنە وراي ۇيىمداستىرىلعان بۇل شارا ودان ءارى «مەملەكەتتىك ءتىل جانە باق» بايقاۋىنىڭ جەڭىمپازدارىن ماراپاتتاۋمەن جالعاستى.
ايتا كەتەيىك, اتالمىش رەسپۋبليكالىق بايقاۋعا ەل وڭىرلەرىنەن 200-دەن استام ماتەريال كەلىپ ءتۇستى. بايقاۋعا مەملەكەتتىك ءتىلدىڭ قىزمەت ەتۋ اياسىن كەڭەيتۋ مەن مارتەبەسىن نىعايتۋ جانە ونىڭ احۋالى تۋرالى وزەكتى ماتەريالدار جاريالاعان تىلشىلەر عانا قاتىستى.
بايقاۋ «ۇزدىك ماقالا», «ۇزدىك تەلەارنا باعدارلاماسى», «ۇزدىك راديو باعدارلاماسى», «ۇزدىك سايت ماقالاسى» نوميناتسيالارى بويىنشا باعالاندى. ەرەجەگە ساي, كەلىپ تۇسكەن ماتەريالداردى ەلىمىزگە بەلگىلى جۋرناليستەردەن قۇرالعان قازىلار القاسى قاراپ, ءجۇلدەگەرلەردى انىقتادى.
قورىتىندى كەزەڭ بويىنشا, باس جۇلدەنى «ايقىن» رەسپۋبليكالىق قوعامدىق-ساياسي گازەتىنىڭ شولۋشىسى سەيسەن ۇلىقبەكوۆ يەلەندى. 1 ميلليون تەڭگەنىڭ سەرتيفيكاتىن مينيستر ا.مۇحامەدي ۇلىنىڭ ءوزى تابىس ەتتى. «ءۇزدىك ماقالا» نوميناتسياسى بويىنشا 2-ورىندى «يندۋستريالنايا كاراگاندا» گازەتىنىڭ ءتىلشىسى ۆالەنتين شيپۋنوۆ, 3-ورىندى «جەتىسۋ» وبلىستىق گازەتىنىڭ ءتىلشىسى مەرۋەرت مولداعاليەۆا جەڭىپ السا, «ۇزدىك سايت ماقالاسى» نوميناتسياسى بويىنشا 1-ورىندى «قازكونتەنت» اق «e-histori.kz» سايتىنىڭ ءتىلشىسى التىنبەك قۇمىرزاق ۇلى, 2-ورىندى «ۇركەر.كز» سايتىنىڭ ءتىلشىسى نۇرلان قۇمار, 3-ورىندى «اباي.كز» سايتىنىڭ ءتىلشىسى مەڭدوللا شامۇراتوۆ يەلەندى. سونداي-اق, «ۇزدىك تەلەارنا باعدارلاماسى» نوميناتسياسى بويىنشا 1-ورىندى «الماتى» تەلەارناسىنىڭ ءتىلشىسى ءامىربولات قۇسايىن ۇلى, 2-ورىندى «قازاقستان» رترك» اقمولا وبلىستىق تەلەارناسىنىڭ ءتىلشىسى راۋشان سايلاۋقىزى, 3-ورىندى اقتوبە وبلىستىق «ريكا-تۆ» تەلەارناسىنىڭ ءتىلشىسى ءاليا ءشامىشوۆا جەڭىپ السا, «ۇزدىك راديو باعدارلاماسى» نوميناتسياسى بويىنشا 1-ورىندى قازاق راديوسىنىڭ «الماتى» ستۋدياسىنىڭ ءتىلشىسى جۇمابەك اقتوتى, 2-ورىن «حالىق» راديوسىنىڭ ءتىلشىسى راۋشان سىبانجانوۆا, 3-ورىندى قازاق راديوسىنىڭ رەداكتور-شولۋشىسى جانات جانۇزاقوۆ يەلەندى.
ءداستۇرلى تۇردە جىل سايىن وتكىزىلىپ كەلە جاتقان بۇل ءىس-شارا مەملەكەتتىك ءتىلدى ناسيحاتتاۋ بەلسەندىلىگىن ارتتىرىپ, ونىڭ دامۋىنا سەپتىگىن تيگىزەتىنى ءسوزسىز.
راۋشان تاۋىرحانقىزى,
جۋرناليست
