ءماجىلىستىڭ جاڭا توراعاسى سايلاندى

كەشە پارلامەنت ءماجىلىسىنىڭ كەزەكتى جالپى وتىرىسى بولىپ, وندا ەكى ماسەلە قارالدى. ءبىرىنشى كەزەكتە حالىق قالاۋ­لى­لارى ءماجىلىستىڭ بۇرىنعى ءتور­اعاسى باقتىقوجا ءىزمۇحام­بەتوۆتىڭ «ارداگەرلەر ۇيىمى» رەس­پۋبليكالىق قوعامدىق بىرلەستىگى ورتالىق كەڭەسىنىڭ توراعاسى بولىپ سايلانۋىنا بايلانىستى ءوز ەر­كىمەن ورنىنان ءتۇسۋى تۋرالى ماسە­لەنى قاراپ, ءبىراۋىزدان قولداۋ ءبىلدىردى. وسىدان كەيىن پالاتا وتىرىسىنا توراعالىق ەتۋدى ءماجىلىس ءتورا­عا­سىنىڭ ورىنباسارى گۇلميرا يسيم­باەۆا جالعاستىرىپ, دەپۋ­تاتتارعا كۇن تارتىبىندەگى ەكىنشى ماسەلەنى جاريا ەتتى. ول – پارلامەنت ءماجىلىسىنىڭ جاڭا توراعاسىن سايلاۋ. زاڭ بويىنشا پالاتا توراعالىعىنا كانديداتتى ءماجىلىس دەپۋتاتتارى ۇسىنادى. ءسوز العان دەپۋتات قۋانىش سۇل­تانوۆ ماجىلىستەگى «نۇر وتان» پارتياسى فراكتسياسىنىڭ تاپسىرۋىمەن قازاقستان رەسپۋب­ليكاسى پار­لامەنتى ءماجىلىسىنىڭ توراعالىعىنا ءبىر عانا دەپۋتاتتىڭ, ياعني نۇرلان نىعماتۋليننىڭ كانديداتۋراسىن ۇسىندى. ودان ءارى ق.سۇلتانوۆ ن.نىعماتۋليننىڭ ءومىربايان بەت­تەرىنە شولۋ جاساپ ءوتتى. باسقا كانديدات ۇسىنىل­ماعاندىقتان, گ.يسيمباەۆا ن.نىعماتۋليننىڭ كانديداتۋراسىن تالقىلاۋدى ۇسىندى. العاشقى ءسوز كانديداتتى ۇسىنۋشى قۋانىش سۇلتانوۆقا بەرىلدى. نۇرلان زايروللا ۇلى ەلباسى نۇرسۇلتان نازارباەۆتىڭ ەلىمىزدىڭ ەڭ جاۋاپتى ماسەلەلەرىن شەشۋدە زور سەنىم كورسەتىپ جۇرگەن ارىپتەستەرىنىڭ بىرەگەيى. ول مەملەكەتىمىزدىڭ قۇرىلىسى مەن قۋاتتانۋى باعىتىندا پرەزيدەنت تاپسىرعان اسا ماڭىزدى لاۋازىمدىق قىزمەتتەردى ابىرويمەن اتقارىپ, قايراتىنا بەدەل قوسىپ وسۋمەن كەلە جاتقان تۇلعا. ەكىنشىدەن, ءبىزدىڭ ۇسىنعان كانديداتىمىز وڭىرلەر مەن مەملەكەت باسقارۋ ءىسىنىڭ كۇردەلى ءارى مول تاجىريبەلى مەكتەبىنەن ءوتىپ, ەل تىنىسىن, جاعدايىن ءبىلىپ, شىڭدالىپ كەمەلدەنگەن, ەلىمىزگە تانىمال مەملەكەت قايراتكەرى. ۇشىنشىدەن, ن.نازارباەۆتىڭ قوعامىمىزدىڭ ساپاسىن وزگەرتەتىن بەس ينستيتۋتتىق رەفورماسى, «100 ناقتى قادامى» ءبىزدىڭ بارلىعىمىزدىڭ الدىمىزعا, اسىرەسە, ۇكىمەتكە, پارلامەنتكە, سوت بيلىگىنە, بارلىق مەملەكەتتىك ينستيتۋتتارعا جاڭا مىندەتتەر قويىپ وتىر. ن.نىعماتۋلين – ەلباسىنىڭ وسى ستراتەگياسىنىڭ جۇزەگە اسىرىلۋىنىڭ مازمۇنى مەن تەتىگىن بىلەتىن ادام. ول جاڭالىققا, قانداي دا دامۋ مەن وزگەرىستەرگە سەزىمتال, مۇمكىن بولاتىن داعدارىستاردىڭ الدىن الۋعا قابىلەتتى. پارلامەنت جۇمىسىن ۇتىمدى ۇيىمداستىرۋعا شەبەر, شىمىر, شيراق باسشى, دەي كەلىپ, ارىپتەستەرىنەن ونىڭ كانديداتۋراسىن قولداۋدى ءوتىندى. ودان كەيىن ءسوزدى دەپۋتات, «اق جول» پارتياسى فراكتسياسىنىڭ باسشىسى ازات پەرۋاشەۆ الدى. ول وسىدان 4 جىل بۇرىن ن.نىعماتۋليننىڭ ءماجىلىستىڭ بەسىنشى شاقىرىلىمىندا توراعا بولعانىن ەسكە الىپ, ونىڭ پارلامەنتاريزمگە دەموكراتيالىق داستۇرلەر اكەلگەنىن اتاپ ءوتتى. ن.نىعماتۋلين پىكىرسايىستارعا تىكەلەي ارالاسىپ, وڭ شەشىمدەردىڭ قابىلدانۋىنا يگى ىقپال ەتىپ وتىردى. فراكتسيالاردىڭ پىكىرلەرى مەن ۇسىنىستارىنىڭ ايتىلۋىنا دا جاعداي تۋعىزدى, دەي كەلىپ, كانديداتۋرانى قولدايتىنىن جەتكىزدى. حالىقتىق كوممۋنيس­تەر پارتياسى فراكتسياسىنىڭ جەتەكشىسى ۆلاديسلاۆ كوسارەۆ تە ن.نىعماتۋليننىڭ كانديداتۋراسىن قولداپ سويلەدى. ول وتكەن شاقىرىلىمدا ءوزىن سپيكەر رەتىندە تاماشا قىرىنان كورسەتە ءبىلدى. زاڭ جوباسىن جەتكىلىكتى دارەجەدە دايىنداماي اكەلگەن ۇكىمەت مۇشەلەرىن نۇرلان زايروللا ۇلى مىنبەردەن ءتۇسىرىپ جىبەرىپ وتىردى. وسىنىڭ ءوزى پارلامەنتتە جوعارى دەڭگەيلى ىسكەر احۋال قالىپتاستىرعان ەدى, دەدى ول. دەپۋتات نۇرتاي سابيليانوۆ تا ءوزىنىڭ سوزىندە ن.نىعماتۋليننىڭ كانديداتۋراسى توراعالىققا ابدەن لايىقتى ەكەنىن اتاپ ايتتى. ودان ءارى ءماجىلىس جاسىرىن داۋىس بەرۋدى وتكىزەتىن جانە ونىڭ ناتيجەسىن انىقتايتىن 7 ادامدىق ساناق كوميسسياسىن سايلادى. جاسىرىن دا­ۋىس بەرۋ ۇدەرىسىنە 20 مينوتتىك ءۇزىلىس جاريالاندى. ساناق كوميسسياسىنىڭ توراعالىعىنا سايلانعان اسقار بازارباەۆ جاسىرىن داۋىس بەرۋ ناتيجەسىندە نۇرلان نىعماتۋليننىڭ ءماجىلىس توراعاسى بولىپ سايلانعانىن جاريالادى. ونىڭ كانديداتۋراسىن جاقتاپ سايلاۋعا قاتىسقان 102 دەپۋتاتتىڭ ءبارى دەرلىك داۋىس بەرگەنى بەلگىلى بولدى. وتىرىس قورىتىندىسىندا جاڭا توراعا ن.نىعماتۋلين ءوزىن ءبىراۋىزدان سايلاعان ارىپتەستەرىنە العىسىن ايتتى. بۇل – مەن ءۇشىن ۇلكەن مارتەبە ءارى ۇلكەن جاۋاپكەرشىلىك. الداعى ۋاقىتتا ەلباسى نۇرسۇلتان نازارباەۆتىڭ جانە سىزدەردىڭ سەنىمدەرىڭىزدى اقتاۋ, ءماجىلىستىڭ جۇمىسىن ودان ءارى كۇشەيتۋ جولىندا بارلىق كۇش-جىگەرىمدى, تاجىريبەمدى اياماي جۇمسايتىنىما سەندىرەمىن, دەدى ول. جاقسىباي سامرات, «ەگەمەن قازاقستان»