تابيعاتتى لاستاعان

كاسىپورىن 4 ميلليارد 56 ميلليون تەڭگە وتەماقى تولەيدى ءبىر اي بۇرىن «قازتسينك» كومپانياسىنا قاراستى تالوۆ قالدىق قويماسىندا اپات ورىن العانى بەلگىلى. شىعىس قازاقستان وبلىستىق تابيعات قورعاۋ پروكۋراتۋراسى قازىر ريددەر كەن-بايىتۋ كومبيناتى قىزمەتىندەگى ەكولوگيالىق زاڭ تالاپتارىنىڭ ساقتالۋىن تەكسەرۋدە. ەسكە سالا كەتەيىك, قالدىق قويماسىندا 22 مامىردا اينالىمداعى سۋدى شىعارۋ جۇيەسى قۇرىلعىسىنىڭ ءبىر جاعى وپىرىلىپ, ناتيجەسىندە قويمادان اققان توگىندى سۋ فيليپپوۆكا وزەنىنە قۇيىلعان بولاتىن. سۋدىڭ توگىلۋى 22 مامىرداعى ساعات 09:30-دان 25 مامىرداعى ساعات 14.00-گە دەيىن ورىن العان. ريددەر كەن-بايىتۋ كومبيناتى ماركشەيدەر ءبولىمىنىڭ ەسەبىنە سايكەس, قويمادان اققان سۋدىڭ كولەمى 394 452 تەكشە مەتردى قۇرادى. اپات بولعان كۇندەرى وبلىستىق ەكولوگيا دەپارتامەنتىنىڭ ماماندارى وزەننەن بىرنەشە سىناق الدى. الىنعان سىناقتى تالداۋ ناتيجەسىندە سۋ قۇرامىندا ءبىر­قاتار لاستانۋ زات تەكتەرىنىڭ بار ەكە­نى انىقتالدى. وسىعان وراي تابيعات قورعاۋ پروكۋراتۋراسى دەپارتامەنتكە «قازتسينك» جشس-تەن قورشاعان ورتاعا كەلتىرىلگەن زالالدى ءوندىرۋ جانە اپاتتىڭ سەبەبىن انىقتاۋ, زاڭ بۇزۋ­شىلىقتاردى جويۋ تۋرالى ۇسىنىس ەنگىزدى. دەپارتامەنت قورشاعان ورتاعا كەلتىرىلگەن شىعىندى ەسەپتەپ, ونىڭ سوماسى 4 056 237 772 تەڭگە قۇراعانىن انىقتادى. وبلىستىق تابيعات قورعاۋ پروكۋرورى باقىتجان ىزعۇتدينوۆتىڭ ايتۋىنشا, كومپانيا اتالعان قارجىنى ءبىر ايدىڭ ىشىندە بيۋدجەتكە ەرىكتى تۇردە قۇيۋى قاجەت. دۋمان اناش, «ەگەمەن قازاقستان» وسكەمەن