34 ملن. 790 مىڭ تەڭگە

وسىنشا ايىپپۇل تولەدى قازىر قورشاعان ورتاعا بەيجاي قاراپ, تابيعاتقا قيانات جاسايتىن ءىرى كاسىپورىندار مەن وندىرىستىك مەكەمەلەر كوپ-اق! ولار كومپانيانىڭ الەۋەتىن ارتتىرۋ جولىندا ءونىمدى كوپتەپ وندىرگەنىمەن, اينالاعا زيانىن كەلتىرىپ وتىرعاندارىن قاپەرلەرىنە الا بەرمەيدى. سونداي كاسىپورىننىڭ ءبىرى – اقمولا وبلىسىنداعى «التىن تاۋ كوكشەتاۋ» جاۋاپكەرشىلىگى شەكتەۋلى سەرىكتەستىگى. بۇل مەكەمە تاياۋدا تابيعاتقا وراسان زور زالال كەلتىرۋى سالدارىنان 34 ملن. 790 مىڭ تەڭگە ايىپپۇل تولەدى. وبلىستىق مامانداندىرىلعان تابيعات قورعاۋ پروكۋراتۋراسىنىڭ حابارلاۋىنشا, اتالعان كاسىپورىن ءىرى مولشەردەگى ايىپپۇلدى دەر كەزىندە مەملەكەت قازىناسىنا اۋدارعان. – كاسىپورىننىڭ وندىرىستىك قالدىقتاردى دالاعا توككەنى انىقتالدى. قازىرگى تاڭدا ءبىزدىڭ تاراپىمىزدان ءتيىستى شارالار اتقارىلۋدا. سونىمەن قاتار, تابيعاتقا زيانىن تيگىزگەن وزگە دە مەكەمەلەردى انىقتاپ جاتىرمىز, – دەيدى پروكۋراتۋرا وكىلدەرى. ايتا كەتەيىك, «التىن تاۋ كوكشەتاۋ» سەرىكتەستىگى 2014-2015 جىلدارى ەكولوگيالىق ۇيىمداردىڭ رۇقساتىنسىز وندىرىستىك قالدىق­تارىن اشىق اسپان استىنا توككەن. مامانداردىڭ ەسەبى بويىنشا, 4 مىڭ توننادان اساتىن وندىرىستىك قالدىقتار تابيعات اياسىنا شاشىلعان. سونىمەن قاتار, قازاندىقتارعا جاعاتىن 321 توننا كومىر رۇقسات ەتىلمەگەن جەرگە توگىلگەن. بۇگىندە تابيعاتتى قورعاۋ پروكۋراتۋراسى تاراپىنان ەلىمىزدىڭ ءار وڭىرىندەگى ءوندىرىس وشاقتارى ءجىتى باقىلاۋعا الىنىپ, ولاردىڭ قورشاعان ورتاعا قانشالىقتى زالال كەلتىرىپ جاتقانى تەكسەرىلۋدە. تالعات رايىمبەك, «ەگەمەن قازاقستان»