جەرەبە تارتىلدى

استانادا قازاقستان بوكس فەدەراتسياسى كۋبوگى جارىسىنىڭ جەرەبەسى تارتىلدى. بيىلعى جىلى دا قالىپتاسقان ءداستۇر بويىنشا استانا مەن الماتى قالالارىنىڭ جانە 14 وبلىستىڭ كوماندالارى ءتورت توپقا ءبولىندى. ا توبىنا الماتى, شىعىس قازاق­ستان, سولتۇستىك قازاقستان وبلىستارى مەن الماتى قالاسىنىڭ كومانداسى ءتۇستى. ۆ توبىندا ماڭعىستاۋ, جامبىل, پاۆلودار مەن اقتوبە وبلىستارىنىڭ بوكسشى­لارى شارشى الاڭعا شىعاتىن بولسا, س توبىنداعى جارىسقا قا­را­­عاندى, قىزىلوردا, قوستاناي وبلىستارى مەن استانا قالاسىنىڭ كومانداسى قاتىسادى. D توبىندا وڭتۇستىك قازاقستان, اقمولا, اتى­راۋ مەن باتىس قازاقستان وب­لىستارىنىڭ قۇرامالارى ونەر كورسەتەدى. ا توبىنىڭ ايقاستارى – تالدى­قورعاندا, ۆ توبىنىڭ جەكپە-جەك­تەرى اقتاۋدا وتسە, س توبىنىڭ كوماندالارى – قىزىلوردادا, D توبىنا تۇسكەن وبلىستاردىڭ جا­ساقتارى كوكشەتاۋدا شارشى الاڭعا شىعادى. بۇدان كەيىن 8-11 قىركۇيەك كۇندەرى ا جانە س, ۆ جانە D توبىندا جەڭگەن كو­ماندالار شيرەك فينالدا كەزدەسەدى. ولاردىڭ جەڭگەندەرى جارتىلاي فينالعا شىعادى. مەملەكەتتىك جاتتىقتىرۋشى بولات ابدراحمانوۆ جارىستىڭ ەرەجەسى بويىنشا, ءاربىر كوماندادا 20 بوكسشى بولۋى كەرەك ەكەنىن ايتادى. سونىڭ ىشىندە 10 بوكسشى نەگىزگى قۇرامدا, 10 بىلعارى قولعاپ يەسى رەزەرۆتە بولادى. كومان­دالار كەزدەسكەندە بوكس­شىلار 10 جەكپە-جەك وتكىزەدى. ەگەر كەزدەسۋ 5:5 ەسەبىمەن تەڭ اياق­تالسا, قوسىمشا جەكپە-جەك وتەدى. ونىڭ قاي سالماقتا بولاتىنى جەرەبەدە شەشىلەدى. سول كەزدە ا توبىنىڭ كومانداسى 64 كيلوعا دەيىنگى سال­ماقتاعى بوكسشىسىن, ۆ توبى 56 كيلو, س توبىنىڭ قۇراماسى 81 كي­لوعا دەيىنگى, D توبىنىڭ كومانداسى 69 كيلوعا دەيىنگى سالماقتاعى وكىلىن دايىنداپ قويۋى ءتيىس. جارىستىڭ جارتىلاي فينالى مەن فينالى 14-15 جەلتوقسان كۇن­دەرى وتەدى. فينالدىڭ قاي قالادا بولاتىنى ازىرشە بەلگىسىز. ونى كەيى­­نىرەك قازاقستان بوكس فە­دە­راتسيا­سى حابارلايدى. بيىلعى كۋبوكتىڭ يەگەرىنە 25 ميلليون تەڭگە تابىس ەتىلەدى. بىل­­­تىرعى جارىستا دا كۋبوكتى جەڭىپ العان وڭتۇستىك قازاقستان وبلى­سىنىڭ كومانداسى وسىنشاما سومانى يەلەنگەن بولاتىن. داستان كەنجالين, «ەگەمەن قازاقستان»