جاڭا پرەپارات

وتاندىق فارماتسەۆتيكاعا سونى سەرپىن اكەلەدى قاراعاندىلىق عالىمدار تاعى ءبىر بىرەگەي ءدارى ويلاپ تاپ­تى. «تسيتوفات» دەپ اتالاتىن پرەپارات قازىر نازارباەۆ ۋني­ۆەرسيتەتتىڭ مەديتسينالىق ور­تالىعىندا كلينيكالىق سىناق­تان وتكىزىلۋدە. جاڭا ءدارىنى جاساپ شىعارۋدى الدىمەن قولعا العان – بەلگىلى عالىم, حيميا عىلىمدارىنىڭ دوكتورى, اكادەميك, مەملەكەتتىك سىيلىقتىڭ لاۋرەاتى, قاراعاندى مەملەكەتتىك تەحنيكالىق ۋنيۆەر­سيتەتىنىڭ رەكتورى ارىستان عازاليەۆ. ارىستان ماۋلەن ۇلى پرە­پاراتتى جاساپ شىعارۋ جو­لىنداعى جۇمىستارىن, ءتىپتى, وسىدان شيرەك عاسىرداي بۇرىن, ۇعا ورگانيكالىق سينتەز ءجا­نە كومىر حيمياسى ينستيتۋتى ديرەكتورىنىڭ ورىنباسارى قىزمەتىن اتقارىپ ءجۇر­گەن شاعىندا باستاعان ەكەن. قىزمەتى اۋىسسا دا ماقساتىنان تانباعان عالىم بۇل جۇمىسقا قارمتۋ جانىنداعى عىلىمي-زەرتتەۋ ينستيتۋتىنىڭ حيميك عالىمدارىن, ماگيسترانتتارى مەن ستۋدەنتتەرىن دە تارتقان. عالىمداردىڭ ايتۋىنشا, جاڭا پرەپارات وتاندىق فار­ماتسەۆتيكا سالاسىنا سونى سەرپىن بەرۋى ءتيىس. «تسيتوفات» بۇگىنگى قوعامدا الەۋمەتتىك دەرت­كە اينالعان باۋىر اۋرۋلارىن ەمدەيدى. ونىڭ ۇستىنە, باعاسى دا قاراپايىم حالىق ءۇشىن قىمبات بولمايدى. ويتكەنى, ءدارى قازاقستاننىڭ وڭتۇستىك وڭىرلەرىندە وسەتىن وسىمدىك – تەرموپسيستەن جاسالادى ەكەن. كلينيكالىق سىناقتار ءبىر­نەشە ايعا سوزىلۋى مۇمكىن. سەبەبى, قانشا دەگەنمەن, كۇنى ەرتەڭ ادام اعزاسىنا سىڭىرىلەتىن زات بولعاندىقتان, ونى جان-جاقتى تەكسەرۋدەن وتكىزۋ ءاب­دەن كەرەك. ءساتىن سالىپ, وڭ ءنا­تيجە بەرىپ جاتسا, ءدارىحانا سورە­لەرىندەگى يمپورت دارىلەردىڭ ءبىرازىن وسى قاراعاندىلىق پرەپارات ىعىستىرۋى عاجاپ ەمەس. قايرات ءابىلدينوۆ, «ەگەمەن قازاقستان» قاراعاندى