گەرمانياداعى ماڭىزدى كەزدەسۋلەر

جاقىندا ەكسپو-2017 حالىقارالىق مامانداندىرىلعان كورمەسىنىڭ كوميسسارى ءراپىل جوشىباەۆتىڭ گەرمانياعا جۇمىس ساپارى بولدى. ونىڭ شەڭبەرىندە كوميسسار بۋندەستاگ دەپۋتاتتارىمەن, گەرمانيانىڭ جەتەكشى قوعامدىق-ساياسي جانە ەكونوميكالىق توپتار وكىلدەرىمەن, گفر-دە وقيتىن قازاقستاندىق ستۋدەنتتەرمەن كەزدەستى. بۋندەستاگتا ر.جوشىباەۆ نەمىس پارلامەنتشىسى يۋرگەن كليمكە مەن قازاقستاننىڭ گەرمانياداعى ەلشىلىگى ۇيىمداستىرعان ەكسپو-2017-ءنىڭ قارساڭىندا قازاقستاننىڭ ءتۋريزمى مەن ەكونوميكاسىن دامىتۋ» تاقىرىبىنداعى روۋد-شوۋعا قاتىستى. ءوزىنىڭ سوزىندە كوميسسار جينالعان اۋديتوريانى استانادا وتەتىن ەكسپو كورمەسىنە دايىندىق باعىتىندا جۇرگىزىلىپ جاتقان جۇمىستارمەن, ەلدە جۇزەگە اسىرىلۋ ۇستىندەگى رەفورمالارمەن جانە قازاقستاندا ءتۋريزمدى دامىتۋ باعىتىنداعى ءىس-شارالارمەن تانىستىردى. يۋ.كليمكە, ءوز كەزەگىندە, قازاق­ستان گەرمانيانىڭ ورتالىق ازيا­داعى ماڭىزدى ساياسي جانە ساۋدا-ەكو­نوميكالىق سەرىكتەسى بولىپ تابىلاتىنىن اتاپ كورسەتتى. سونداي-اق, ول ەكسپو-2017-گە قاتىسۋ ەكىجاقتى قارىم-قاتىناستىڭ بارلىق كەشەنىن دامىتۋعا سونى سەرپىن بەرەتىنىن ايتتى. «استانا ەكسپو-2017» ۇك» اق-تىڭ وكىلدەرى مەن قازاقستاننىڭ جەتەك­شى تۋريستىك وپەراتورلارى شاراعا قاتىسۋشىلاردى ەكسپو-2017-ءنىڭ تۋريستىك ونىمدەرى تۋرالى قۇلاعدار ەتتى. تۇساۋكەسەر مەن ودان كەيىن بولعان پىكىر الماسۋلار نەمىس تاراپىنىڭ ۇلكەن قىزىعۋشىلىعىن تۋعىزدى. شارا بارىسىندا گەرمانيانىڭ ەكسپو-2017-گە قاتىساتىنى تۋرالى شارتقا سالتاناتتى تۇردە قول قويۋ ءراسىمى بولدى. قۇجاتقا قازاقستان تاراپىنان كورمە كوميسسارى ءراپىل جوشىباەۆ, ال گەرمانيا تاراپىنان نەمىس پاۆيلونىنىڭ باس كوميسسارى, گفر ەكونوميكا جانە ەنەرگەتيكا مينيسترلىگىنىڭ وكىلەتتى وكىلى ديتەر شميتتس قول قويدى. اتالعان كەلىسىمنىڭ ماڭىزى مەن جوعارى ءمانىن گەرمانيادا وقيتىن قازاقستاندىق ستۋدەنتتەر فلەش-موب وتكىزۋ ارقىلى ءبىلدىردى. روۋد-شوۋدىڭ قورىتىندىسى بويىنشا ءباسپاسوز ءماسليحاتى ءوتىپ, ونىڭ بارىسىندا ەكسپو-2017 كوميسسارى نەمىس جۋرناليستەرىنىڭ سۇراقتارىنا جاۋاپ بەردى. ساپار شەڭبەرىندە, سونداي-اق, ر.جوشىباەۆتىڭ بۋندەستاگ دەپۋتاتى گەنريح تسەرتيكپەن, قازاقستان-گەر­مانيا ىسكەرلىك كەڭەسىنىڭ تەڭ توراعاسى پەتەر تيلسپەن, گەرمانيا ەكونوميكاسى شىعىس كوميتەتىنىڭ وڭىرلىك ديرەكتورى ەدۋارد كينسبرۋننەرمەن, كارلسرۋە قالاسىنداعى ساۋدا-ونەر­كاسىپ پالاتاسى ء(سوپ) سىرتقى ساۋ­دا كوميتەتىنىڭ باسشىسى روبەرت حۋبەرمەن جانە «Funkwerk» كومپا­نياسىنىڭ باسقارۋشى ديرەكتورى ميحاەل ۆيمانمەن, نەمىستىڭ «DENA» ەنەرگەتيكالىق اگەنتتىگىنىڭ, قازاقستان-گەرمانيا ىسكەرلىك كەڭەسىنىڭ, گفر ءسوپ-ءىنىڭ سىرتقى ساۋدا جونىندەگى كوميتەتىنىڭ, «EREN» كومپانياسىنىڭ باسشىلىعىمەن ەكىجاقتى كەزدەسۋلەرى ءوتتى. كەزدەسۋلەر بارىسىندا تاراپتار اتالعان ۇيىمدار مەن كومپانيالاردىڭ بىرىككەن جوبالارعا قاتىسۋى, نەمىس اۆتوكونتسەرىندەرىن ەكسپو-2017 كور­مەسىنە تارتۋ مۇمكىندىكتەرى ماسە­لەلەرىن تالقىلادى. سونىمەن قاتار, 2017 جىلى فرانكفۋرتتەن استاناعا قاتىنايتىن اۆيارەيستەردىڭ جيىلىگىن ارتتىرۋ جايى ءسوز بولدى. سونداي-اق, قازاقستاننىڭ گەرما­نياداعى ەلشىلىگىندە 30-دان استام نەمىس كومپانيالارى وكىلدەرىنىڭ قاتى­سۋىمەن ەكسپو-2017 تاقىرىبىندا دوڭگەلەك ۇستەل ۇيىمداستىرىلدى. شارا كەزىندە كورمەنىڭ ۇيىمداستىرۋ-تەحنيكالىق سيپاتتاعى ماسەلەلەرى مەن ەكىجاقتى ىنتىماقتاستىقتىڭ قايتالاما جانە بالامالى ەنەرگيا سالاسىنداعى ىنتىماقتاستىعىنىڭ پەرسپەكتيۆالارى قارالدى. ساۋلەبەك ءبىرجان