ءۇش كۇن ىشىندەگى ۇيلەسىم

فۋتبولدان ەۋروپانىڭ كەزەكتى چەمپيوناتى ءوتىپ جاتىر وتكەن جۇما, 10 ماۋسىم كۇنى پاريج تۇبىندەگى سەن-دەني قالاسىنىڭ «ستاد دە فرانس» ستاديونىندا فرانتسيا مەن رۋمىنيا قۇرامالارى اراسىنداعى كەزدەسۋمەن ءوزىنىڭ شىمىلدىعىن تۇرگەن قۇرلىقتىڭ كەزەكتى چەمپيوناتى ەندى عانا ەڭسەلى جولعا ءتۇسىپ كەلەدى. سودان بەرگى ءۇش كۇننىڭ ىشىندە ءۇش توپتاعى كوماندالار 7 ويىن وتكىزىپ ۇلگەردى. وسى ءۇش كۇن ىشىندە كوزگە تۇسكەن ءبىر كورىنىس: ازىرگە بىردە-ءبىر سەنساتسيا ورىن العان جوق, ماتچتار الدىندا كىمدەر فاۆوريت سانالسا, سولار باسىم ءتۇسىپ جاتتى. سونىمەن بىرگە, 6 ۇتىسپەن ورنەكتەلگەن ۇشىراسۋلاردا بىردە-ءبىر ءىرى ەسەپ تىركەلمەدى. مۇنىڭ ءبارى جاساقتاردىڭ ادەپكىدەن ارانداپ قالماۋ ءۇشىن بارىنشا ساق ويناپ جاتقاندارىن بايقاتادى. ەندى وسى 7 ويىننىڭ ءىشىن­دە فۋتبول ماماندارى مەن جان­كۇيەرلەردى مەيلىنشە كوبىرەك كوڭىل اۋدارعىزعان ەكى ماتچقا توقتالىپ وتەيىك. فرانتسيا – رۋمىنيا 2:1. ويىن الدىندا الاڭ يەلەرىنىڭ فا­ۆوريت ەكەنى ايتىلسا دا, فرانتسۋز­دار بۇل اۆانستى ارەڭ-ارەڭ اقتاپ شىقتى. نەگىزى, بۇل شارپىلاسۋ تەڭ اياقتالعاندا, الاڭ ۇستىندە ايقاستىڭ ءادىل باعاسى بەرىلگەندەي بولار ەدى. وسىنىڭ ءوزى-اق قۇرلىقتىڭ بۇل جولعى چەمپيوناتىندا جەڭىسكە جەتۋ كىم-كىم ءۇشىن دە وڭايعا تۇسپەسىن اڭداتىپ بەردى. تاعى ءبىر ەسەپتەن, رۋمىندار دا اسا ءبىر مىقتى ويىن كورسەتە قويعان جوق. ولار تەك ءاربىر تايمنىڭ باستالار كەزىندە عانا ءبىرشاما بەلسەندىلىككە باستى. بۇدان كەيىنگى ۋاقىتتاردا تاس ءتۇيىن قورعانىسقا كوبىرەك كوڭىل ءبولدى. دەگەنمەن, باسىندا ۇيقىلى-وياۋ جۇرگەن فرانتسۋزدار كومانداسىن سەرپىلتىپ جىبەرگەن تاپ وسى قوناقتار بولدى. ولاردىڭ العاشقى تۇتقيىلدان جاساعان وتكىر شابۋىلدارى الاڭ يەلەرىن ەرىكسىز قوزعاۋعا ءتۇسىردى. ءسويتىپ, فرانتسۋزدار بارا-بارا ۇزدىكسىز جورىقتارعا شىعىپ تۇرۋعا كوشتى. وسى تۇستا ولاردا بۇرىنعى جۇلدىزداردىڭ جوق ەكەنى انىق ءبىلىندى. ليدەر رولىنە لايىقتى سانالعان پول پوگبا مەن انتۋان گريزمانن سول سەنىم قىسىمىن كوتەرە المادى. بىراق جاماعات جاسقانشاقتاپ تۇرا قالمادى, ولاردىڭ بۇلايشا ابدىراۋشىلىعى الدىڭعى لەككە ديميتري پايەنى الىپ شىقتى. كوماندانىڭ بارلىق كرەاتيۆى مەن لاپ ەتكەن دۇلەي كۇشتەرىن ءوزىنىڭ بويىنا تارتقان شابۋىلشى ۇزاماي بۇكىل ستاديوننىڭ ارقاسۇيەر ارداعىنا اينالىپ كەتتى. مۇنداي ماڭىزدى ماتچتىڭ قاي-قايسىسىندا دا ستارتتىق قۇرام­نىڭ قانداي بولماعىنا قاتتى ءمان بەرىلەدى. ونىڭ ۇستىنە, ونىڭ ەڭ باستى ۇمىتكەرى سانالىپ وتىرعان فرانتسياعا بىردەن سول مارتەبەنىڭ مانزەلىنەن كورىنۋدىڭ ءمانى جوعارى. ال رۋمىندار الدىندا مۇنداي بيىك بەلەس تۇرعان جوق. سوندىعىنان بولار, ولار ماتچتىڭ باسىنان قارسىلاسىنان ەشبىر تايسالماي, بارىنشا ەركىن وينادى. ولار الاڭعا فرانتسۋزدارعا قاتتى قارسىلىق كورسەتۋدى عانا كوزدەپ شىققان سياقتى. ال چەمپيوناتقا دايىندىق بارىسىندا فرانتسيا 4 جولداستىق كەزدەسۋ وتكىزىپ, سولاردىڭ اربىرىندە 3 گولدان سالدى, الايدا, ەكى دوپتان وتكىزىپ تە العان ەدى. اتالمىش ويىن كەزىندە الاڭ يەلەرى سوندىقتان ارتقا قاراپ الاڭداۋشىلىعىن دا بايقاتپاي تۇرا المادى. وسىنداي ارباسۋ مەن اڭدىسۋى دا بولماي قالعان ماتچتىڭ ءبىرىنشى تايمى ەسەپ اشىلماستان اياقتالدى. ال كەلەسى تايمنىڭ باسىندا رۋمىندار تاعى تىزگىندى الىپ كەتتى. ولار ءبىرشاما ۋاقىت قاقپا اينالاسىندا شەڭبەرلى شەپ قۇرىپ, ءبىراز قىسىم جاساپ كورگەننەن كەيىن فرانتسۋزدار قايتادان ەس جيدى. ويىننىڭ 57-مينۋتىندا پايە بەرگەن ءبىرىنشى بۇرىشتاما ونشاما ءساتتى شىعا قويمادى, بىراق ديميتري قايتقان دوپتى قايىرا تەۋىپ, قاقپا الاڭىنا جەتكىزدى. بۇعان ۇمتىلعان قاقپاشى ايدالاعا كەتتى دە, دوپ وليۆە جيرۋدىڭ باسىنا ءدوپ كەلدى. گول! وسىدان كەيىن فرانتسۋزدار تايلى-تاياعى قالماي اتقا قوناتىنداي كورىنگەن. بىراق ولاي بولمادى. ولاردىڭ ءسال دە بولسا سەرىپپەدەي تارتىلىپ تۇرعان تىزگىندى ءسال بوساتىپ الۋى رۋمىنداردىڭ كەزەكتى شاپقىنشىلىعىنا جول بەرىپ قويدى. مۇنىڭ اقىرى 65-مينۋتتا بوگدان ستانكۋدىڭ پەنالتي ۇرۋىمەن اياقتالدى. ەندى فاۆوريتتەرگە ءبارىن باسىنان باستاۋعا تۋرا كەلدى. تارازى باسى سودان سوڭعى مينۋتتارعا دەيىن تەڭ بولىپ تۇردى. الاڭ يەلەرىن ابىرويسىزدىقتان ساقتاپ قالعان جەڭىس دوبىن پايە 89-مينۋتتا سالدى. كەلەسى, 11 ماۋسىم كۇنى چەمپيوناتتا ءۇش بىردەي ويىن وينالدى. ولاردىڭ العاشقى ەكەۋىندە شۆەيتساريانىڭ البانيانى 1:0, ۋەلستىڭ سلوۆاكيانى 2:1 ەتىپ ۇتقانى بەلگىلى بولدى. بۇدان كەيىن ءتۇن جارىمىندا الاڭعا انگليا جانە رەسەي قۇرامالارى شىقتى. انگليا – رەسەي 1:1. بۇل ويىندا اعىلشىنداردىڭ ءبىرىنشى نومىرمەن وينايتىنىنا ەشكىمنىڭ كۇمانى بولعان جوق. تۇماندى البيون جىگىتتەرى سول ۇمىتكە ءۇزىر بايلاپ, ماتچتىڭ باسىنان زىركىلدەپ العا ۇمتىلدى. ولار قاقپاعا دوپ ۇرۋدى دا تىم كەشەۋىلدەتە قويمادى. ءبىر ايتارلىعى, قارسىلاستارىنىڭ مۇنداي قۋاتتى قارقىنىنا رەسەي­لىكتەر ونشالىقتى قىڭبادى. بۇعان, ءسىرا, كەزدەسۋ باسىنان داربازاشى يگور اكينفەەۆتىڭ سەنىمدى سەيۆتەر جاساۋى اسەر ەتسە كەرەك. رەسەي قۇراماسى اعىلشىنداردىڭ العاشقى اپتىقتارى باسىلعاسىن, وزدەرى دە جورىققا جوسىلا شاپتى. ايتكەنمەن, ءبىرىنشى ويىنداعى سياقتى, مۇندا دا الاڭداعى نەگىزگى وقيعالار ەكىنشى تايمدا ءوتتى. نەگىزىنەن كەزدەسۋ بارىسىندا ايتارلىقتاي باسىمدىق تانىتقان انگليا ەسەپتى تەك 73-مينۋتتا عانا اشا الدى. وندا دا گول ستاندارتتى جاعدايدان سوعىلدى. تورەشىنىڭ قاقپا الاڭى شەبىمەن شەكتەس جەردە بەلگىلەگەن ايىپ دوبىن ەريك دايەر قاقپانىڭ سول جاق بۇرىشىنا توپ ەتكىزدى. اعىلشىندار بۇدان كەيىن ەسەپتى ۇلعايتۋعا بىرنەشە مۇمكىندىك الدى. بىراق ءبارى بوسقا كەتتى. ال تاباندى ويىن كورسەتكەن رەسەي اقىرعى ساتتەردە «ەڭ سوڭعى قاسيەتتى جورىققا» ءبىر كىسى­دەي اتتاندى. ولار ەسەپتى تەڭەس­تىرگەنشە تىنىم تاپپادى. سو­نىڭ ناتيجەسىندە 90+2-مينۋتتا گەورگي ششەننيكوۆتىڭ اياعىنان جەتىپ, قاقپا الدىننان ءوتىپ بارا جاتقان دوپتى كوماندا كاپيتانى ۆاسيلي بەرەزۋتسكي تورعا قاراي باعىتتاپ ۇلگەردى. فانتاستيكا! ەسەپ وسىلاي تەڭەستى. ماۋسىمنىڭ 12-ءى كۇنى حور­ۆاتيا – تۇركيانى, پولشا سول­تۇستىك يرلانديانى 1:0, ال گەرمانيا ۋكراينانى 2:0 ەتىپ ۇتتى. بۇلاردىڭ سوڭعىسىندا نەمىستەر ەكىنشى دوپتى ەڭ سوڭعى ساتتەردە عانا سالا الدى. سەرىك ءپىرنازار, «ەگەمەن قازاقستان»