ارزان بيلەت العىڭىز كەلسە...

كەشە ورتالىق كوممۋنيكاتسيالار قىزمەتىندە «استانا ەكسپو-2017» ۇلتتىق كومپانياسى» اق باسقارما توراعاسىنىڭ ورىنباسارى ەربول شورمانوۆ ءباسپاسوز ءماسليحاتىن وتكىزدى. وندا وسى ماۋسىم ايىنىڭ 10-ىنان باستاپ كورمەگە كىرۋ بيلەتتەرى ساتىلا باستاعانى جونىندە ايتىلدى. بۇگىندە قۇرىلىس جۇمىستارى قارقىن­دى ءجۇرىپ جاتقانىنا توقتالعان باسقارما ءتور­اعاسىنىڭ ورىنباسارى, ەكسپو-2017 حالىقارالىق كورمەسىنە قاتىساتىن ەلدەر وسى جىلدىڭ سوڭىنا قاراي كورمە اۋماعىنداعى پاۆيلوندارىنا ونىمدەرىن تولتىرا باس­تايتىنىن جەتكىزدى. «ەكسپو كورمەسى – تاۋەلسىز قازاقستاننىڭ تاريحىنداعى ەڭ ءىرى جو­با بولعاندىقتان, جاۋاپكەرشىلىگى جوعارى. بۇل جوبانى ابىرويمەن جۇزەگە اسىرعىمىز كەلەدى. قازىر كورمەنىڭ دايىندىعى قارقىندى ءجۇرىپ جاتىر. قۇرىلىس جۇمىستارى دا كەس­تەگە ساي ورىندالىپ كەلەدى. سوندىقتان, وسى جىلدىڭ سوڭىندا حالىقارالىق كورمەگە قا­تىسۋىن راستاعان مەملەكەتتەردىڭ پاۆيل­ونىن وزدەرىنە تاپسىرامىز. ول ەلدەر وسى جىلدىڭ سوڭىنان باستاپ پاۆيلوندارىن تولتىرا باستايدى», دەدى ە.شورمانوۆ. قازىرگى كۇنگە دەيىن 90 ەل مەن 15 حا­لىق­­­ارالىق ءىرى ۇيىم استاناداعى كورمەگە قاتىساتىنىن راستاپتى. سونداي-اق, 70 ەلدىڭ كوميسسارلارى انىقتالىپ, 50 كەلىسىمشارتقا قول قويىلىپتى. ال ەندى شارانىڭ نەگىزگى ماقساتىنا كوشەر بولساق, 10 ماۋسىم كۇنى, ياعني كورمەنىڭ اشىلۋىنا تۋرا ءبىر جىل قال­عاندا بيلەتتەر ساتىلىمعا ءتۇستى. كورمەنىڭ رەسمي سايتىنا كىرىپ, ەلەكتروندى بيلەت تە ساتىپ الۋعا بولادى. وسى جىلدىڭ 10-20 ماۋسىم ارالىعىنداعى پرومو كەزەڭدە ەكسپو-2017 حالىقارالىق كورمەسىنىڭ ەڭ ارزان بيلەتى 2 000 تەڭگە بولادى. ياعني, پروما كەزەڭدە بيلەت قۇنى 50 پايىزعا دەيىن ارزانداعان. ارنايى كۇندەردىڭ ەڭ ارزان بيلەتى 12 مىڭ تەڭگە بولادى. سونداي-اق, ۇلتتىق مەرەكەلەر قارساڭىندا دا كورمە بيلەتتەرى «كوشپەلى» ساۋداعا تۇسەدى ەكەن. ايتسە دە, قازىر ساتىپ العان بيلەتتى كەيىن ناقتى داتاسى بار بيلەتكە اۋىستىرۋ كەرەك. ياعني, 2017 جىلدىڭ 1 اقپانىنان باس­­­تاپ كورمەنىڭ رەسمي سايتىنداعى جەكە كابينەتىڭىزدەن, بولماسا, رەسمي سايتتان بيلەت اۋىستىرىپ الۋعا بولادى. ال 2016 جىلدىڭ 1 قىركۇيەگىنەن باستاپ ەلىمىزدىڭ تۇكپىر-تۇكپىرىندە ەكسپو كورمەسىنىڭ بي­لەتتەرىن ساتاتىن وفلاين-كاسسالار اشىلادى. ءبىر ادام 50 بيلەتتەن ارتىق الا المايتىن تالاپ بار. «ءبىز ساتىلىمدى بىرنەشە كەزەڭگە بولدىك. ءبىرىنشى پرومو كەزەڭ 10 ماۋ­سىمنان 10 شىلدەگە دەيىنگى ۋاقىتتى قامتيدى. سونداي-اق, 2017 جىلدىڭ 9 ماۋسىمىنا دەيىن الدىن الا ساتىلىم وتەدى. ال كورمە باستالعان كەزدە, ياعني 2017 جىل­دىڭ 10 ماۋسىمىنان باستاپ باسقا باعا بەل­گىلەنىپ وتىر. قازىرگى ۋاقىتتى پرومو كەزەڭ دەپ اتادىق. وسى كەزەڭدە بيلەتتەر ارزان باعامەن ساتىلادى. بيلەتتەردى 10 ماۋسىمنان 20 ماۋسىمعا دەيىن 50 پايىزدىق جەڭىلدىكپەن الاسىزدار», دەدى بۇل جونىندە «استانا ەكسپو-2017» ۇك» اق قوعاممەن باي­­لانىس دەپارتامەنتىنىڭ باس مەنەدجەرى اقسۇلۋ ارزىقۇلوۆا. بۇعان قوسا, بيلەتتەردىڭ بىرنەشە ءتۇرى بار. ولار اشىق داتالى. ياعني, كۇنى بەلگىلەنبەگەن جانە كۇنى بەلگىلەنگەن, سونىمەن قاتار, جۇمىس كۇندەرى جانە دەمالىس كۇندەرىنە ارنالعان بيلەتتەر بولىپ بولىنەدى ەكەن. ولار ەكى ءتۇرلى باعامەن ۇسىنىلىپ وتىر. سونداي-اق, كورمەگە بيلەتتەردى ساتۋ دا بىرنەشە كەزەڭگە ءبولىنىپتى. بۇلارمەن بىرگە, بەلگىلى كەزدە بيلەتتەردىڭ قۇنى وسەدى ەكەن. «2017 جىلدىڭ ماۋسىمىنان باستاپ باعا 30-35 پايىزعا وسەدى. مىسالى, كۇنى بەلگىلەنگەن بيلەت جۇمىس كۇندەرى 2 مىڭ تەڭگەدەن, دەمالىس كۇندەرى 3 مىڭ تەڭگەدەن, ال كۇنى بەلگىلەنبەگەن بيلەتتەر جۇمىس كۇندەرى 3 مىڭ تەڭگەدەن, دەمالىس كۇندەرى 4 مىڭ تەڭگەدەن ساتىلادى. سونداي-اق, ارنايى كۇن­دەر قاراستىرىلعان. كورمەنىڭ اشىلۋ (10 ماۋسىم) جانە جابىلۋ (10 قىركۇيەك) سالتاناتى كۇنى, 6 – شىلدە استانا كۇنى, 30 تامىز – كونستيتۋتسيا كۇنىندە بيلەت قۇنى الدەقايدا جوعارى بولادى», دەدى باس مەنەدجەر. تاعى ءبىر بەلگىلى بولعانى 2017 جىلعى ماۋسىمنىڭ 10-ى مەن قىركۇيەكتىڭ 10-ى ارالىعىندا وتەتىن ەكسپو حالىقارالىق كورمەسىنە 100 ەل, 10-نان استام حالىقارالىق ۇيىم, يننوۆاتسيالىق تەحنولوگيالار سالا­سىنداعى 10 وزىق كومپانيا قاتىسادى دەگەن ءۇمىت بار ەكەن. جالپى العاندا, كورمە شامامەن 5 ميلليون رەت تاماشالانىپ, ەكى ميلليوننان استام ادام كەلەدى ەكەن. سوندىقتان, اۋقىمدى شارانى وتكىزۋدىڭ قاۋىپسىزدىك شارالارى دا پىسىقتالىپ جاتقان كورىنەدى. ماۋسىمنىڭ 10-ى كۇنى www.tickets.expo2017astana.com سايتىندا ەكسپو-2017 كورمەسىنىڭ بيلەتتەرىن ون-لاين رەجىمدە ساتۋ باستالعانى بەلگىلى. كونكۋرستىق كوميس­سيانىڭ شەشىمىمەن رەسەيلىك «Kassir.com» كومپانياسى بيلەت ساتۋشى رەسمي وپەراتور رەتىندە بەل­گىلەندى. شارا بارىسىندا الەۋ­مەتتىك جەلىدە كەڭىنەن تالقىلانىپ جاتقان وسى ماسەلەگە قاتىستى دا تۇسىنىكتەمە بە­رىلدى. «استانا ەكسپو-2017» ۇلتتىق كوم­پانياسى وسى ۋاقىتقا دەيىن بيلەت ساتاتىن قازاقستاندىق كومپانيا­نى قۇرىپ, بيلەت ساتۋ جۇمىسىنا دايىنداۋعا بولاتىن ەدى. الايدا, حالىقارالىق كورمەلەر بيۋروسى ءتيىستى تالاپتاردى قويىپ وتىر. وسىنى ۇمىت­پاۋ قاجەت. سول تالاپتارعا سايكەس, بي­­لەت ساتاتىن كومپانيانىڭ حالىقارالىق جوبالاردى ىسكە اسىرۋ تاجىريبەسى بولۋى شارت. وكى­نىشكە قاراي, بىزدە ونداي كومپانيا جوق بولىپ شىقتى. ال اقشا ەشقايدا كەتپەيدى. سەبەبى, قازاقستاندا اتالعان كوم­پانيانىڭ فيليالى جۇمىس ىستەيدى», دەدى ە.شورمانوۆ. نۇرباي ەلمۇراتوۆ, «ەگەمەن قازاقستان»