جاپونيا سۇراپىل داۋىلدى ۇشاقتان باقىلايتىن بولادى

جاپونيادا مەتەورولوگتار سوڭعى 30 جىلدىڭ ىشىندە العاش رەت تايفۋن داۋىلىن ۇشاقتان باقىلايتىن بولادى. بۇل ءىس ولاردىڭ جويقىن تسيكلونداردىڭ ءجۇرۋ ايماعىن ناقتى انىقتاۋىنا مۇمكىندىك بەرەدى. NHK تەلەارناسىنىڭ حابارلاۋىنشا, قازىرگى تاڭدا عالىمدار تايفۋندى سپۋتنيكتىڭ كومەگىمەن باقىلاپ وتىر. وسىنىڭ ارقاسىندا ماماندار جەلدىڭ جىلدامدىعىن, ونىڭ ىشىندەگى اتموسفەرالىق قىسىمىن, تسيكلوننىڭ ءجۇرۋ ايماعىن جانە كۇشىن انىقتاي الادى. الايدا, تەحنولوگيانىڭ دامىعانىنا قاراماستان, جويقىن تايفۋن جايلى ناقتى اقپارات بەرۋ ايتارلىقتاي قيىندىق تۋدىرادى. وسى ماسەلەنى شەشۋ ءۇشىن بىرقاتار ماماندار 2017 جىلدان باستاپ ارنايى ۇشاقتىڭ بورتىنان مونيتورينگ جۇرگىزەتىن بولادى. جاپونيادا مۇنداي ءىس سوڭعى رەت 1980 جىلى اقش اسكەريلەرىنىڭ كومەگىمەن جۇرگىزىلىپتى. الدىن الا مالىمەتتەر بويىنشا تايفۋن داۋىلىن باقىلاۋ كەزىندە ماماندار مىنگەن ۇشاق مۇمكىن بولعان قاشىقتىققا دەيىن جاقىندايدى. وسىدان كەيىن تسيكلون ءجۇرىپ جاتقان جەرگە ارنايى راديوزوند قۇرىلعىسى تاستالادى. ول سۇراپىل جەلدىڭ جۇرەتىن ايماعىن, كۇشىن, قىسىمىن تولىعىمەن انىقتاپ بەرەدى. ايان ءابدۋالي. دەرەك, فوتو: ريا «نوۆوستي».