فۋتبول. امەريكا كۋبوگى. برازيليا شيرەك فينالعا شىعا المادى

اقش-تا فۋتبولدان ءوتىپ جاتقان امەريكا كۋبوگى جارىسىندا كوماندالار توپتىق تۋرنيردەگى سوڭعى ماتچتارىن وتكىزىپ جاتىر. ا توبىندا اقش پەن كولۋمبيا شيرەك فينالعا شىقتى. الاڭ يەلەرى ءۇشىنشى كەزدەسۋىندە پاراگۆاي قۇراماسىن 1:0 ەسەبىمەن جەڭسە, كولۋمبيا ويدا جوقتا كوستا-ريكا كومانداسىنان ەسە جىبەردى. وسى ويىنعا دەيىن وڭتۇستىك امەريكانىڭ قۇراماسى شيرەك فينالدىڭ ماسەلەسىن شەشىپ قويعان بولاتىن. سوندىقتان كولۋمبيا ءۇشىن ماتچ اسا ماڭىزدى بولعان جوق. بۇل كەزدەسۋ وتە شيەلەنىستى جاعدايدا ءوتتى.  وندا كولۋمبيالىق فابرا قارسىلاستار قاقپاسىنا گول سوعىپ قويماي, ءوز قاقپاسىنا دا دوپ سوقتى. سونىڭ كەسىرىنەن ءبىرىنشى تايمنىڭ سوڭىندا كوستا-ريكا 2:1 ەسەبىمەن العا شىقتى. ال 58 مينۋتتا كوستا-ريكالىقتار ءۇشىنشى دوپتى تورعا تۋلاتىپ, ويىن سوڭىنا دەيىن جەڭىستى قولدان بەرمەۋگە تىرىستى. ماتچتىڭ 73 مينۋتىندا كولۋمبيا ەسەپتى ءبىر عانا گولعا قىسقارتتى. باسقاعا شاماسى كەلمەدى. ۆ توبىندا پەرۋ جانكۇيەرلەرىنە «توسىن سىي» جاسادى. ولار برازيليانى 1:0 ەسەبىمەن جەڭىپ, شيرەك فينالعا شىقتى. كەزدەسۋدە باس تورەشى پەرۋاندىقتاردىڭ قولمەن سوققان دوبىن ساناپ جىبەردى. سونىڭ كەسىرىنەن «پەنتاكامپەوندار» جارىس جولىنان شىعىپ قالدى. وسى توپتا پەرۋ مەن ەكۆادور كەلەسى اينالىمعا شىقتى. ەكۆادور گايتيدى 4:0 ەسەبىمەن ۇتتى. ەرتەڭ س توبىنىڭ ويىندارى بولادى. مەكسيكا ۆەنەسۋەلامەن, ۋرۋگۆاي يامايكامەن كەزدەسەدى. بۇل ماتچتار ەشتەڭەنى شەشپەيدى. ويتكەنى, مەكسيكا مەن ۆەنەسۋەلا 6 ۇپايدان جيناپ, كەلەسى اينالىمعا شىعىپ قويعان. ودان كەيىن D توبىنىڭ سوڭعى كەزدەسۋلەرى وتەدى. وندا چيلي مەن پاناما قۇرامالارىنىڭ اراسىندا ناعىز تارتىس بولايىن دەپ تۇر. ەكى كوماندانىڭ دا 3 ۇپايى بار. ارگەنتينادا 6 ۇپاي. ولار شيرەك فينالدىڭ ماسەلەسىن وتكەن تۋردا شەشكەن. ەندى چيلي بوليۆيانى جەڭسە ¼ فينالعا جولى اشىلادى. ال پاناماعا كەلەسى اينالىمعا شىعۋ ءۇشىن «البيسەلەستە» قۇراماسىن جەڭۋ كەرەك. ول ارينە, وڭاي ەمەس. قىسقاسى, امەريكا كۋبوگى ءتۋرنيرى ەۋروپا چەمپيوناتى سياقتى قىزىقتى جانە تارتىستى ءوتىپ جاتىر. كەشەگى پەرۋ – برازيليا ماتچتىندا وينىشىنىڭ قولمەن سوققان گولىنان كەيىن تارتىس ودان سايىن قىزا ءتۇستى. تۋرنيردە ا جانە ۆ توبىنىڭ ويىندارىنان كەيىن شيرەك فينالعا شىققان كوماندالار قارسىلاستارىن انىقتادى. ¼ فينالدا اقش ەكۆادورمەن, پەرۋ كولۋمبيامەن كەزدەسەدى. تاعى ەكى ويىندا كەزدەسەتىن كوماندالار ەرتەڭ انىقتالادى. داستان كەنجالين. فوتو: telegraf.com.ua ۆيدەو: vkontakte الەۋمەتتىك جەلىسى.