امەريكادا جۋرناليست ايەل تىكەلەي ەفير كەزىندە سوققىعا جىعىلدى

اقش-تىڭ پەنسيلۆانيا شتاتىنداعى فيلادەلفيا قالاسى كوشەلەرىنىڭ بىرىندە رەپورتاج جۇرگىزىپ تۇرعان امەريكانىڭ يسپان ءتىلدى «تەلەمۋندو-62» تەلەارناسىنىڭ جۋرناليست قىزى تۋرا تىكەلەي ەفير حابارى بارىسىندا سوققىعا جىعىلدى. Fox News تەلەارناسى اتاپ كورسەتكەندەي, يريس دەلگادو قۇرامىندا قانتى كوپ سالقىنداتىلعان سۋسىندارعا سالىناتىن سالىقتارعا ارنالعان رەپورتاج جۇرگىزىپ تۇرعان. جەرگىلىكتى ءبىر ايەل سول كەزدە قايتا-قايتا ءجۋرناليستىڭ نازارىن وزىنە اۋدارماقشى بولادى. الايدا, ءتىلشىنىڭ وزىنە كوڭىل بولمەگەنىنە كوزى جەتىپ, بۇعان اشۋ بىلدىرگەن ول قولىن قۇلاشتاپ تۇرىپ سىلتەيدى. سول ساتتە ايەلدىڭ جۇدىرىعى ءجۋرناليستىڭ بەتىنە سارت ەتىپ تيگەنىن تەلەارنا كورەرمەندەرىنىڭ ءبارى كوردى. ءتۇسىرۋ توبى سول بويدا بۇزاقى ايەلدىڭ الدىنا تۇرا قالىپ, ونىڭ بۇدان ءارى شابۋىل جاساۋىنا جول بەرمەيدى. ارتىنشا پوليتسيا كەلىپ, ايەلدى الىپ كەتەدى. كەيىن بەلگىلى بولعانداي, ول جۇرتپەن شايقاسىپ, شابۋىل جاسايتىن مىنەز-قۇلقىمەن, قورشاعان ورتاعا زيانىن تيگىزىپ جۇرەتىن تىرلىگىمەن بۇرىننان جەرگىلىكتى پوليتسيانىڭ ەسەبىندە تۇرادى ەكەن. «تەلەمۋندو-62» تەلەارناسىنىڭ اقپارىنشا, يريس دەلگادو ءوزى سەبەپكەر بولماعان ۇرىستىڭ ءبىرىنشى رەت قۇربانىنا اينالىپ وتىر. قازىر ونىڭ جاعدايى جاقسى, بىراق باستان كەشكەن وقيعاسىنا قاراي تارتقان جان ازابىنان ارىلىپ, ءوز-وزىنە كەلۋى ءۇشىن ءالى ءبىراز ۋاقىت كەرەك. تالعات رايىمبەك. دەرەك, فوتو: Fox News.