ريددەردە دارىگەرلەر مەن مۇعالىمدەرگە باسپانا بەرىلەدى

قازىرگى تاڭدا ريددەر قالاسى ءۇشىن ەڭ نەگىزگى قاجەتتى ماماندىقتاردىڭ ءبىرى دارىگەر مەن مۇعالىم بولىپ تۇر. وسى ساناتتاعى قاجەتتىلىكتى قامتاماسىز ەتۋ ءۇشىن قالاعا 49 مۇعالىم مەن 12 دارىگەر كەرەك. بۇل تۋرالى وڭىرلىك كوممۋنيكاتسيا قىزمەتىندە وتكەن ءباسپاسوز ءماسليحاتىندا ريددەر قالاسىنىڭ اكىمى جومارت مۇراتوۆ مالىمدەدى. ريددەردىڭ دەنساۋلىق ساقتاۋ مەكەمەلەرىندە 795 مەديتسينا قىزمەتكەرى ەڭبەك ەتەدى. قابىلدانعان شارالارعا قاراماستان, قالادا دارىگەر ماماندارىنا دەگەن تاپشىلىق سەزىلەدى. ريددەر قالاسى اكىمىنىڭ ايتۋىنشا, قالا باسشىلىعى ءتۇرلى باعىتتاعى 12 دارىگەردى جۇمىسپەن قامتۋمەن بىرگە ولاردىڭ تۇرعىن ءۇي ماسەلەسىن دە شەشىپ بەرۋگە دايىن. اسىرەسە, ورتا مەديتسينالىق قىزمەتكەرلەر جەتىسپەيدى. بۇگىندە ريددەر بويىنشا پەداگوگيكا ماماندارىنىڭ جالپى سانى 484 ادامدى قۇرايدى. ولاردىڭ ىشىندە 84 مۇعالىم – زەينەتكەرلىك جاستا. بيىل زاڭدى دەمالىسقا 40 ادام شىقتى. جالپى ءبىلىم بەرۋ مەكتەپتەرىندەگى پەداگوگتارعا دەگەن سۇرانىس 30 ادامعا جەتسە, مەكتەپكە دەيىنگى مەكەمەلەرگە 19 مامان كەرەك. «ءبىز مۇعالىمدەردىڭ تاپشىلىعىن انىق سەزىپ ءجۇرمىز. ولاردىڭ اراسىندا باستاۋىش سىنىپ مۇعالىمدەرى مەن ءپان مۇعالىمدەرى, مۋزىكا ءپانىنىڭ مۇعالىمىنە دەيىن جەتىسپەيدى. سونىمەن قاتار, بىزگە دارىگەرلەر دە كەرەك. ءبىز شاھارىمىزدا ءومىر سۇرۋگە قولايلى جاعداي جاساي وتىرىپ, وسى تاپشىلىقتى ەڭسەرۋدەمىز. سوندىقتان, قالامىزعا كەلگەن ءار مۇعالىم مەن دارىگەردى قولداۋعا ءازىرمىز», – دەدى جومارت مۇراتوۆ. دۋمان اناش. دەرەك, فوتو: شىعىس قازاقستان وڭىرلىك كوممۋنيكاتسيالىق قىزمەتى.