«دارانىڭ» ءدارۋى

وسكەمەندە مۇمكىندىگى شەكتەۋلى بالالارعا كەشەندى كومەك كورسەتىلەدى وسكەمەندە مۇمكىندىگى شەكتەۋلى بالالارعا ارنالعان ورتالىق اشىلدى. حالىقارالىق بالالاردى قورعاۋ كۇنىنە وراي تۇساۋى كەسىلگەن بۇل نىسان – شىعىس قازاقستان وڭىرىندەگى ون ەكىنشى پسيحولوگيالىق-پەداگوگيكالىق كوررەكتسيالاۋ ورتالىعى بولىپ وتىر. وبلىس اكىمدىگى جانە «Samruk-KazynaTrust» الەۋمەتتىك جوبالاردى دامىتۋ قورىنىڭ قولداۋىمەن «دارا» قايىرىمدىلىق قورى اراسىنداعى مەموراندۋم شەڭبەرىندە ورتالىققا جوندەۋ جۇرگىزىلىپ, كابينەتتەر تولىعىمەن جاراقتاندىرىلدى جانە ماماندار دايارلاندى. وسكەمەن قالاسىندا تۇڭعىش رەت اشىلعان اۋقىمدى پسيحولوگيالىق-پەداگوگيكالىق تۇزەتۋ ورتالىعى «دارا» قورىنىڭ «ءبارىمىز بىردەيمىز!» رەسپۋبليكالىق جوباسى شەڭبەرىندەگى جەكە باستاماسى ەكەنىن ايتقان ابزال. كەمباعال بالالارعا كەدەرگىسىز ورتا قۇرۋ جانە ونى قاجەتتى جابدىقتارمەن جاراقتاندىرۋعا جوبا اياسىندا 20 ميلليون تەڭگەگە جۋىق قارجى بولىنگەن. قالاداعى №46 ورتا مەكتەپتىڭ جانىنان قۇرىلعان كوررەكتسيا­لاۋ ورتالىعىندا مۇمكىندىگى شەكتەۋلى بالالار مەن ولاردىڭ اتا-انالارى دەفەكتولوگ, پسيحو­لوگ, لوگوپەد, فيزيوتەراپەۆت, ماسساج, تيفلوپەداگوگ سىندى مامانداردىڭ كاسىبي كومەگىن الا الادى. اتالعان ورتالىق جىلىنا فيزيكالىق دامۋىندا ءتۇرلى كەدەرگىلەر كەزدەسكەن 300-گە جۋىق بالاعا تۇرعىنجايلارى بويىنشا ءتۇرلى قىزمەت تۇرلەرىن تەگىن كورسەتپەك. – بالالار – ءبىزدىڭ قۋا­نى­شىمىز, بولاشاعىمىز. بۇل – كاسىپكەرلەردى عانا ەمەس, بارشا قازاقستاندىق قوعامدى مەيىرىم­دىلىككە ۇندەگەن شارا بولىپ وتىر. شىعىسقازاقستاندىق بالالارعا وسىنداي كەرەمەت سىي جاساعان جاندارعا ايرىقشا العىس ايتامىن. قايىرىمدىلىقتى كوزدەگەن جارقىن شارالار كوپ بولعان سا­يىن, ءبىزدىڭ جۇرەگىمىزگە دە جىلىلىق مولىنان ۇيالاي تۇسەدى. بالالارعا قۋانىش سىيلاپ, ومىرىمىزدە شاتتىق كوبەيەدى, – دەدى ورتالىق قىزمەتىمەن تانىسقان وبلىس اكىمى دانيال احمەتوۆ. «دارا» قورىنىڭ قۇرىلتاي­شى­سى گۇلنار دوساەۆا وسىنداي كابينەتتەردىڭ استانا, الماتى, اقتوبە, قوستاناي, تاراز جانە ماڭ­عىس­تاۋدا پايدالانۋعا بەرىلگە­نىن, كەلەشەكتە بارلىق وبلىس ورتالىقتارىندا اشۋدى جوسپارلاپ وتىرعانىن ايتىپ, بالالار مەن اتا-انالاردى جاڭا نىساننىڭ اشىلۋىمەن قۇتتىقتادى. قازىرگى كەزدە وڭىردە 700-گە جۋىق مۇمكىندىگى شەكتەۋلى بالا­عا قىزمەت كورسەتەتىن 11 پسيحو­لوگيالىق-پەداگوگيكالىق كوررەكتسيالاۋ ورتالىعى جۇمىس ىستەيدى. وندا مۇگەدەك بالالارعا كەشەندى كومەك كورسەتىلىپ, پسيحولوگيالىق-پەداگوگيكالىق تۇزەتۋ جانە وڭالتۋ جۇمىستارى جۇرگىزىلەدى, اتا-انالارعا كەڭەس بەرىلەدى. وبلىس ورتالىعىندا 4 مىڭنان استام مۇمكىندىگى شەكتەۋلى بالا تۇرادى. ولاردىڭ قوعامعا ساتىمەن بەيىمدەلۋى جانە ساپالى ءبىلىم الۋىنا جاعداي جاساۋ, كەدەرگىسىز ورتا قۇرۋ ءۇشىن وسكەمەندە ەرەكشە بالالارعا ارنالعان 100 ورىندىق ينتەرنات سالىنىپ جاتقانىن ايتا كەتكەن ءلازىم. دۋمان اناش, «ەگەمەن قازاقستان» وسكەمەن