جۇرەگىن 17 اي ارقالاعان...

اقش-تا ستەن لاركين ەسىمدى 25 جاستاعى جىگىت 17 اي بويى جۇرەكسىز ءومىر ءسۇرىپ كەلگەن ەكەن. دارىگەرلەر ماڭىزدى ورگاننىڭ ورنىنا ارنايى اپپارات قويعان. پاتسيەنت ونى سومكەسىنە سالىپ ارقالاپ ءجۇرىپتى. وسىدان 10 جىل بۇرىن اعاسى ەكەۋىنە «وتباسىلىق كارديوميوپاتيا» دەگەن دياگنوز قويىلعان. ول – تۇقىم قۋالايتىن ميو­كارد دەرتى. ادامنىڭ 10-20 جاس ارالىعىندا جۇرەگى سىر بە­رىپ, جۇمىس ىستەۋىن توقتاتادى. 2014 جىلدىڭ جەلتوقسان ايىندا لاركيننىڭ وسى ورگانىن الىپ تاستاپتى. ماماندار ونىڭ ورنىنا جاساندى جۇرەك قويىپ, سالماعى 6 كيلو بولاتىن SynCardia Freedom Portable Driver اپپاراتىنا جالعاعان. ول ادام اعزاسىندا قان اينالىم جۇيەسىن قامتاماسىز ەتەدى. وسى اعزاعا بايلانىستى ايىق­پاس دەرتكە شالدىققاندار ءۇشىن بۇل – تاپتىرماس قۇرىلعى. جۇرەكتىڭ قىزمەتىن تولىعىمەن اتقارا الادى. SynCardia Freedom Portable Driver 2014 جىلى بۇكىل كلينيكالىق سىناقتاردان ءساتتى وتكەن. ال سول جىلى اۆس­تراليادا حيرۋرگ ماماندارى دۇنيەجۇزىندە العاشقى بولىپ جاساندى جۇرەكتى ءۇش ادامعا قويىپتى. ءبارى ساتىمەن جۇزەگە اسقانى عالىمداردى ەرىكسىز تاڭعالدىردى. جاڭا تەحنولوگيالار ورگانداردى اۋىستىرۋ كەزىندە ادام ءومىرىن كەم دەگەندە 30 پايىزعا دەيىن ساقتايدى. قازىرگى تاڭدا الەمدە كوپتە­گەن ادام ورگان اۋىستىرۋدان قيىندىق كورۋدە. مالىمەتتەر بويىنشا, ءبىر عانا اقش-تا ترانسپلانتاتسيا ءۇشىن 121 مىڭ ادام كەزەكتە تۇر. ال بۇل ءىستى دەر كەزىندە جۇزەگە اسىرا الماۋدىڭ سالدارىنان كۇنىنە ورتاشا ەسەپپەن 22 ادام قايتىس بولادى ەكەن. ايان ءابدۋالي, «ەگەمەن قازاقستان»