«قازتسينك» قىزمەتكەرلەرىمەن كەزدەستى
تاياۋدا «قازتسينك» جشس قىزمەتكەرلەرى وسكەمەندەگى «ءۇمىت» بالالار ءۇيىنىڭ تاربيەلەنۋشىلەرىمەن كەزدەسۋ وتكىزدى. ەلىمىزدەگى ءىرى مەتاللۋرگيالىق كەشەننىڭ ماماندارى بالالارمەن سۇحباتتى قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ جاستىق شاعىندا قاراعاندى مەتاللۋرگيالىق كومبيناتىندا شىڭدالىپ, ءومىردىڭ ۇلكەن بەلەسىنەن وتكەنىنەن, شىعىس قازاقستان وڭىرىنە كەلگەن جۇمىس ساپارلارىندا جەرگىلىكتى مەتاللۋرگتەرمەن ءجيى جۇزدەسەتىنىنەن باستادى.
جالپى, بۇل كەزدەسۋ «ءۇمىت» ءۇيىنىڭ تاربيەلەنۋشىلەرىنە ءۇمىت سىيلاعان جارقىن كەزدەسۋ بولدى. ءتۇستى مەتاللۋرگيا ءوندىرىسىنىڭ مايتالماندارى جاستاردىڭ كەلەشەگىنە ازىق بولارلىق كاسىپ, بولاشاقتا ماڭدايىن جارقىراتاتىن ماماندىق تاڭداۋ تۋرالى اڭگىمە شەرتتى.
– ادام الدىنا بيىك, بىراق ورىندالاتىن ماقساتتار قويۋى كەرەك. قازىرگى داعدارىس كەزەڭىندە قانداي كاسىپورىندار اعىسقا قارسى تالماي ءجۇزىپ كەلە جاتقانىن قاراڭىزدار. ولاردىڭ اراسىندا ءبىزدىڭ كومپانيامىز دا بار. ءيا, ءبىز ءدال قازىرگى ۋاقىتتا الەمدەگى ءتۇستى مەتالل قۇنىنىڭ تومەندەۋىن باستان وتكەرۋدەمىز. بىراق شىعارىلاتىن ونىمدەردىڭ ارتۇرلىلىگىنىڭ ارقاسىندا, كاسىپورىننىڭ جاعدايى تۇراقتى. كىرىستىڭ 60 پايىزىن تۇراقتى سۇرانىسقا يە التىن ءوندىرىسى بەرەدى. «قازتسينك» – قازاقستانداعى قۇندى مەتالداردىڭ ءىرى ءوندىرۋشىسى. سوندىقتان, قازىرگىدەي قيىن ساتتە كاسىپورىننىڭ تۇراقتى جۇمىس ىستەۋى ەكونوميكامىز ءۇشىن وتە ماڭىزدى, – دەدى «قازتسينك» جشس-نىڭ اكىمشىلىك ماسەلەلەر جونىندەگى اتقارۋشى ديرەكتورى اندرەي لازارەۆ.
اندرەي ءپاۆلوۆيچتىڭ ايتۋىنشا, قانداي قيىندىق تۋسا دا «قازتسينك» قىزمەتكەرلەرىن قىسقارتپايدى. بۇگىندە كاسىپورىندا 350 باعىتتاعى ماماندىق يەلەرىنەن قۇرالعان 25 مىڭ ادام جۇمىس ىستەيدى. الىپ كاسىپورىنمەن ارىپتەس بولىپ وتىرعان ءتۇرلى سالاداعى مەردىگەر-سەرىكتەستىكتەر دە جەتەرلىك. بۇل كەزدەسۋدە «ۇمىتتىكتەر» كومپانيانىڭ جەتىستىكتەرى مەن ءمۇمكىندىكتەرى تۋرالى ءفيلمدى تاماشالادى. كاسىپورىننىڭ جاستار كەڭەسىنىڭ بەلسەندىلەرى ۆيكتوريا گروحوتوۆا مەن ارتۋر مىشاگين «قازتسينكتە» جۇمىس ىستەۋگە قالاي كەلۋگە بولاتىندىعىن ءاڭگىمەلەدى. ولاردىڭ ايتۋىنشا, كەز كەلگەن جاسقا جۇمىسقا دەگەن قۇلشىنىسپەن بىرگە ءبىلىم دە قاجەت. سوندىقتان, شىعىس قازاقستان وبلىسىنىڭ ورتا جانە جوعارى وقۋ ورىندارىمەن, ونىڭ ىشىندە وسكەمەندەگى د.سەرىكباەۆ اتىنداعى شىعىس قازاقستان مەملەكەتتىك تەحنيكالىق ۋنيۆەرسيتەتىمەن, پوليتەحنيكالىق جانە گۋمانيتارلىق-تەحنيكالىق, ريددەردەگى اگرارلىق-تەحنيكالىق جانە كوپ سالالى, زىريانداعى اگرارلى-تەحنيكالىق, قۇرىلىس جانە كولىك كوللەدجدەرىمەن تىعىز ارىپتەستىك بايلانىس ورناتقان. كومپانيا ۋنيۆەرسيتەتتەردەگى «ءتۇستى مەتاللۋرگيا», «تاۋ-كەن ماركشەيدەر ءىسى», «ءتۇستى مەتالدى بايىتۋ» جانە تاعى باسقا ماماندىقتار دايارلايتىن فاكۋلتەتتەردەگى ستۋدەنتتەردى وقۋ مەرزىمىندە-اق تاڭداپ, ماقساتتى باعدارلامالاردى ىسكە قوسادى. وسكەمەن مەتاللۋرگيالىق كەشەنىندە 2011 جىلدان بەرى شقمتۋ كافەدراسىنىڭ فيليالى جۇمىس ىستەيدى. اتالعان كافەدرادا وقۋ ۇدەرىسى ۋنيۆەرسيتەتتەگى وقۋ باعدارلاماسىمەن قاتار ءجۇرگىزىلەدى. ياعني, ءىى كۋرستا ستۋدەنتتەردى ىرىكتەپ السا, ءىىى-ءىV كۋرستا قوسىمشا دايارلاۋ باعدارلاماسىمەن فيليالدا وقىتىلا باستايدى. ستۋدەنتتەر مىندەتتى تۇردە تەحنيكالىق اعىلشىن ءتىلىن مەڭگەرەدى. ءىىى كۋرستان كەيىن بولاشاق ماماندار وندىرىستىك تاجىريبەدەن وتەدى. وقۋ ۋاقىتىندا ولارعا شاكىرتاقى تولەنەدى. وقۋدى اياقتاعان كەزدە ستۋدەنتتەر ديپلوممەن بىرگە كومپانياداعى جۇمىس ورنىنا كەپىلدىك بەرەتىن كافەدرا فيليالىنىڭ سەرتيفيكاتىنا يە بولادى. فيليالداعى وقىتۋدى «قازتسينكتىڭ» ۇزدىك ماماندارى جۇرگىزەدى.
كومپانيانىڭ ەڭبەك رەسۋرستارى باسقارماسىنىڭ باستىعى ماريا كۋيموۆانىڭ ايتۋىنشا, ماماندىقتى كاسىپورىنداعى جۇمىس ۇدەرىسى بارىسىندا الۋعا دا بولادى. ياعني, ولار قوعامعا قاجەتتى نەمەسە قىزىقتى شىعارماشىلىق مۇمكىندىكتەردى كەڭىنەن جۇزەگە اسىرۋدى قولدايدى. ماريا الەكساندروۆنا بالالار ساۋالىنا وراي, كاسىپورىندا مەتاللۋرگ پەن قورىتۋشى سۇرانىسقا يە ماماندىقتار قاتارىنا جاتاتىنىن ايتتى. بۇل ماماندىقتان ءارى قاراي قىزمەتتىك وسۋگە قول جەتكىزۋگە بولادى. ويتكەنى, ولار ءوندىرىستىڭ بارلىق تەحنولوگيالىق ۇدەرىسىن بىلەدى.
مەتاللۋرگتىڭ مىقتى ادام بولعانى ابزال. جۇمىس اۋىر, بىراق وندا قارا كۇشتىڭ يەسى بولۋ ازدىق ەتەدى. ىشكى رۋحاني وزەگى بارلىق قيىندىقتاردى ەڭسەرەرلىكتەي شىدامدى, شىڭدالا تۇسۋگە بەيىم جان عانا مەتاللۋرگ بولا الادى, دەدى ا.لازارەۆ. بۇل ءسوزدى ءوزىنىڭ «قازتسينكتەگى» ەڭبەك جولى تۋرالى ايتىپ بەرگەن «نۇر وتان» پارتيا ۇيىمىنىڭ توراعاسى, وسكەمەن قالاسى ءماسليحاتىنىڭ دەپۋتاتى نۇرلان وماربەكوۆ تە قوستادى. ۋنيۆەرسيتەتتى «مەتاللۋرگيا» ماماندىعى بويىنشا بىتىرگەن سوڭ بالقىتۋشى بولىپ جۇمىسقا ورنالاسقان ول العاشقى كۇندەرى قاتتى شارشاعانى سونشالىق, ۇيگە كەلگەنىندە كەلەسى كەزەككە دەيىن دەل-سال بولىپ ۇيىقتايتىنىن, بىرتە-بىرتە اۋىر جۇمىسقا كوندىگىپ, تسەح, بريگادا مەن جۇمىسشىلار ءومىرىنىڭ بولىنبەس ءبىر بولشەگىنە اينالىپ كەتكەنىن جەتكىزدى. سونداي-اق, اۋىر جۇمىسقا جاقسى ەڭبەكاقى تولەنەتىنىن, بىرتىندەپ تابىسىن پاتەر, كەيىن كولىك ساتىپ الۋعا جيناقتاعانىن, قوعامدىق ومىرگە بەلسەنە ارالاسا باستاعانىن ايتتى.
سوندىقتان, اۋىر جۇمىستان قورقۋدىڭ قاجەتى جوق. باستىسى, العاشقى ايدا شىدامدىلىق تانىتۋ. ونىڭ ۇستىنە بۇگىنگى مىرىش ءوندىرىسى ءبىز جۇمىستى باستاعان كەزگە قاراعاندا ساپا, اۆتوماتتىلىق جاعىنان ايتارلىقتاي ءوستى, دەدى مەتاللۋرگتەر اراسىنان دەپۋتات اتانعان ن.وماربەكوۆ.
ال قىزمەتكەرلەردى وقىتۋ جانە دامىتۋ باسقارماسىنىڭ باستىعى سۆەتلانا پلوتنيكوۆا كاسىپورىندا قاتاڭ ءتارتىپتىڭ ساقتالاتىندىعىن, جاۋاپكەرشىلىك تانىتپاعاندار مەن جامان ادەتتەرگە اۋەس جاندار جۇمىستان شەتتەتىلەتىنىن دە جاسىرمادى.
– ارينە, كازارماداعىداي ءاسكەري ءتارتىپ دەپ ويلاۋدىڭ قاجەتى جوق. ءتارتىپ ۇلكەن جاۋاپكەرشىلىكتى سەزىندىرەدى. جۇمىسقا ادام تىنىعىپ, ساۋ سانامەن كەلۋى ءتيىس. ءايتپەسە, جاراقاتتانىپ قالۋىڭ, ءوزىڭنىڭ, بولماسا وزگە ارىپتەستەرىڭنىڭ ومىرىنە قاۋىپ ءتونۋى مۇمكىن. ەڭ باستىسى, ەڭبەك, ەڭبەك ءبارىن جەڭبەك, – دەدى اندرەي لازارەۆ.
كەزدەسۋدىڭ «ءۇمىت» ءۇيىنىڭ بالالارىنا جاقسى اسەر قالدىرعانى بولار, ولار مەتاللۋرگيالىق كەشەنمەن تانىسۋ ءۇشىن ساياحات ۇيىمداستىرۋدى ءوتىندى. ايتا كەتەلىك, قازىر بالالار ۇيىندە 200 تاربيەلەنۋشى بولسا, ولاردىڭ 30-ى بيىل 9-11 سىنىپتاردى اياقتايدى. كومپانيا جەتەكشىلەرى بالالاردىڭ ارمان-ماقساتتارىن تىڭداپ, ولاردىڭ وقۋ وقىپ, كاسىپورىنعا جۇمىسقا كەلۋلەرىنە, باتىل شەشىم قابىلداعان بالالارعا قاجەتتى جاعداي جاساۋعا بارلىق مۇمكىندىكتەردىڭ بارلىعىن جەتكىزدى. «ءۇمىت» ءۇيى بالالارىنىڭ ءۇمىتىن وياتقان وسى كەزدەسۋ تالاي بالانىڭ جۇرەگىنە وت جاققانى انىق. ولاردىڭ اراسىنان كەلەشەكتە التىن شايقاپ, مىس قازاتىن مەتاللۋرگيا مايتالماندارى كوپتەپ شىعۋى عاجاپ ەمەس.
دۋمان اناش,
«ەگەمەن قازاقستان»
وسكەمەن
