جاراسىم تاپقان وتباسىلاردان الار ۇلگى-ونەگە كوپ
جۇرتشىلىق تاراپىنان كەڭ قولداۋ تاپقان, وتباسىلىق قۇندىلىقتار مەن ۇلگى-ونەگەلەردى, ۇلتتىق سالت-داستۇرلەردى, ادەت-عۇرىپتاردى, اتا-اناعا دەگەن بەرىك سىيلاسىمدىلىق پەن كىشىپەيىلدىلىك قاسيەتتەردى ناسيحاتتاۋدى, تاراتۋدى, تاجىريبەگە اينالدىرۋدى باستى ماقسات ەتكەن «مەرەيلى وتباسى» بايقاۋى قىزىلجار وڭىرىندە دە كەڭىنەن اتاپ ءوتىلدى.
جىل وتكەن سايىن يگى شاراعا قاتىسۋشىلاردىڭ قاتارى كوبەيىپ, ساپالىق جاعىنان دا قۋاتتانا تۇسكەنىن اڭعارۋ قيىن ەمەس. ەلباسى جاستاردى بەرىك وتباسى ينستيتۋتى شاڭىراقتاعى جاراسىمدىق پەن تاتۋلىق ارقىلى ورنايتىنىن ۇنەمى ايتىپ كەلەدى. سول سەبەپتى بولار, جاقسى باستاما ءداستۇرلى ارناسىن تاۋىپ, وسىمەن ءۇشىنشى رەت كەڭ قانات جايىپ وتىر. سايىسقا بارلىق اۋداندار مەن پەتروپاۆل قالاسىنان شاشاسىنا شاڭ جۇقتىرماعان كىلەڭ وزىق وتباسىلار قاتىستى. ولاردىڭ قاي-قايسىسى بولسىن ەڭبەكتە دە, تۇرمىستا دا ءوز ورنىن تاپقان, تامىرلارىن تەرەڭگە جايعان ماۋەلى بايتەرەك ىسپەتتەس.
ن.پوگودين اتىنداعى ورىس دراما تەاترىنا جينالعاندار الدىندا سويلەگەن سوزىندە ايماق باسشىسى ەرىك سۇلتانوۆ پرەزيدەنتتىڭ «وتباسى – ءبىزدىڭ قوعامىمىزدىڭ قۇندىلىقتارىن ساقتاۋدىڭ اسا ماڭىزدى ينستيتۋتى», دەگەن پايىمىن العا تارتا وتىرىپ, ءار ادام العاشقى تاربيەنى التىن دىڭگەك وتباسىنان الاتىنىن, اكە-شەشەگە, تۋعان-تۋىستارعا دەگەن قۇرمەت, ەلگە, جەرگە دەگەن ماحاببات وتباسى, وشاق قاسىنان باستاۋ الاتىنىن جەتكىزدى. وتباسى ەڭبەككە, جاۋاپكەرشىلىككە, بەرەكە-ءبىرلىككە, ىزگى تاتۋلىققا, دوستىقتى, جولداستىقتى قادىرلەي بىلۋگە, مەيىرىم مەن يناباتتىلىققا ءۇيرەتەدى. كوپبالالى, ەڭبەكقور وتباسىلار قاي كەزدە بولسىن ەلدىڭ ماقتانىشى سانالادى. وسكەلەڭ ۇرپاق اتا-بابالارىمىزدان جالعاسىپ كەلە جاتقان وسىنداي ساباقتاستىقتاردى بويلارىنا ءسىڭىرىپ وسسە, قازاقستاننىڭ ماقتان تۇتار ازاماتتارى بولىپ وسەرى كامىل, دەدى ەرىك حامزا ۇلى.
بايقاۋعا قاتىسۋشىلاردىڭ جاقسى دايىندىقتارمەن كەلگەنى, جەڭىستەن ءۇمىتتى ەكەندىكتەرى ءسوزدەرىنەن دە, ءىس-قيمىلدارىنان دا انىق بايقالىپ تۇردى. بيىلعى سايىستىڭ ەرەكشەلىگى سول, جەكەلەگەن اتالىمدار بويىنشا 28 وتباسىنىڭ اراسىنان كىل مىقتىنى انىقتاۋ قازىلار القاسىنا وڭاي سوققان جوق.
ماعجان جۇماباەۆ اۋدانىنان كەلگەن پولياكوۆتار, شالاقىندىق راحىمبەرليندەر, ءۋاليحانوۆ اۋدانىنىڭ نامىسىن قورعاعان كۋحارەنكو وتباسىلارى «جاسامپاز ۇستاز» اتالىمى بويىنشا جۇلدەگەر اتاندى. «سپورت سالاسىنداعى كورسەتكىشتەر» اتالىمىندا پەتروپاۆل قالاسىنان دروبيازكو, عابيت مۇسىرەپوۆ اتىنداعى اۋداننان قالىقوۆتار وتباسىلارى توپ جاردى. «ەڭبەكسۇيگىش وتباسى» اتالىمىندا تيميريازەۆ اۋدانىنان اليەۆتەر, ماعجان جۇماباەۆ اۋدانىنان قۇسايىنوۆتار, اققايىڭ اۋدانىنان قاسىموۆتار, جامبىل اۋدانىنان مامەدوۆتار وتباسىلارى ەرەكشەلەندى. «ۇزدىك ەڭبەك اۋلەتى» اتالىمىندا تيميريازەۆ اۋدانىنان بالسەيىتوۆتەر, تايىنشا اۋدانىنان جومارتوۆتار وتباسىلارىنىڭ مەرەيى ۇستەم بولدى. «وتباسىلىق دارىندار» اتالىمى بويىنشا اقجار اۋدانىنان زاكاريندەر, اققايىڭ اۋدانىنان امانجولوۆتار اۋلەتتەرى ماراپاتتالدى. «كوپبالالى وتباسى» اتالىمىندا 10 بالانى ومىرگە اكەلىپ, ۇلىن – ۇياعا, قىزىن – قياعا قوندىرعان ايىرتاۋ اۋدانىنىڭ تۇرعىندارى ناشارباەۆتار ءجانە ەسىل اۋدانىنىڭ ءۇمىتىن ارقالاعان جانىبەكوۆتەر وتباسى ەرەكشە ىلتيپاتقا بولەندى. «ينتەرناتسيونال وتباسى» اتالىمىندا ايىرتاۋ اۋدانىنان مۋسيەنكو, ەسىل اۋدانىنان كريۆورۋچكو, قىزىلجار اۋدانىنان نۇرمۇقانوۆتار, جامبىل اۋدانىنان سوبولەۆتەر, مامليۋت اۋدانىنان جاركەنوۆتەر وتباسىلارى جەڭىمپاز اتاندى. «جۇرەك جىلۋىن بالالارمەن بولىسەمىن» اتالىمىندا قىزىلجار اۋدانىنان كۋرباتوۆتار, تايىنشا اۋدانىنان ەسينەەۆتەر وتباسىلارىنىڭ اسىعى الشىسىنان ءتۇستى. «مەرەيلى وتباسى» بايقاۋىندا ءۋاليحانوۆ اۋدانىنان كەلگەن نۇرباەۆتار جانە پەتروپاۆل قالاسىنان مارتەميانوۆتار وتباسىلارى ءۇشىنشى ورىنعا لايىق دەپ تانىلدى. ەكىنشى ورىندى عابيت مۇسىرەپوۆ اتىنداعى اۋداننىڭ نامىسىن قورعاعان سۇلتانوۆتار جانە مامليۋت اۋدانىنان كەلگەن قارابالاەۆتار وتباسىلارى يەلەندى.
ولاردىڭ اراسىنان كۋرباتوۆتار جايلى ەرەكشە ايتا كەتكەن ءجون. ءۇش بالانى قامقورلىعىنا العان اندرەي مەن ۆيكتوريا جۇرەك مەيىرىمىن, الاقان جىلۋىن اياعان ەمەس. وزدەرى دە, بالالارى دا شەتتەرىنەن ونەرلى, سالاماتتى ءومىر سالتىن سەرىك ەتكەن. ۆەرونيكا سۋرەتتى جاقسى سالادى, كۇرەسپەن اينالىسادى. ستاس تاەكۆوندونىڭ شەبەرى بولۋدى ارماندايدى. ماكسيمنىڭ ارمانى – مۋزىكانت بولۋ. نۇرباەۆتار اۋلەتىن بيىل گاۋھار تويلارىن اتاپ وتۋگە نيەت ەتىپ وتىرعان ولجاباي اقساقال مەن ساقىپجامال اجەي باستاپ كەلدى. ولار ءبىر كىندىكتەن 11 ۇل-قىز, 21 نەمەرە, 4 شوبەرە ءوربىتىپ, قىزىعىن كورىپ وتىرعان جايلارى بار.
ءبىرىنشى جۇلدەلى ورىن وكۋنەۆتەر مەن جاندوس ماديقاجىنىڭ اۋلەتىنە بۇيىردى. وكۋنەۆتەر شال اقىن اۋدانىندا اۋىل شارۋاشىلىعىمەن اينالىسسا, 5 بالا ءوسىرىپ وتىرعان جاندوس وتباسىمەن بىرگە قولونەر ءداستۇرىن جالعاستىرىپ كەلەدى.
اتامەكەننىڭ تۇتاستىعىن, اعايىننىڭ تاتۋلىعىن, اتا-انا مەن بالا اراسىنداعى ءوزارا سىيلاستىقتى پاش ەتكەن بايقاۋ جەڭىمپازدارى ديپلوممەن جانە سەرتيفيكاتتارمەن ماراپاتتالدى. بايقاۋدا جەڭگەن ۇزدىك وتباسىلار استانا قالاسىندا وتەتىن رەسپۋبليكالىق كەزەڭدە وبلىس نامىسىن قورعايتىن بولادى.
ىرىسى مەن ىنتىماعى سۇتتەي ۇيىعان, شاڭىراعى شالقىعان مۇنداي وتباسىلار وڭىردە از ەمەس. ولار مەملەكەتىمىزدىڭ دامۋىنا ءوز ۇلەستەرىن قوسىپ, وزگەلەرگە ۇلگى كورسەتۋدى باستى مۇرات ەتكەن. دەمەك, جوعارى قوعامدىق جانە رۋحاني-ادامگەرشىلىك ءمانى زور مۇنداي بايقاۋلاردان كوكەيگە تۇيەرىمىز از بولماسا كەرەك.
ءومىر ەسقالي,
«ەگەمەن قازاقستان»
پەتروپاۆل
سۋرەتتەردى تۇسىرگەن تالعات تانىباەۆ
