اقتوبەدە بالالاردىڭ دەمالۋىنا جاعداي جاسالادى

اقتوبە. 7 ماۋسىم. وبلىس اكىمى بەردىبەك ساپارباەۆ «اقبوبەك — ۆوستوك» بالالاردى ساۋىقتىرۋ مەكەمەسىنە باردى. بۇل تۋرالى egemen.kz ءتىلشىسى حابارلادى. ول اقتوبەدەگى لاگەرلەردە كورشى ايماقتاردان كەلگەن بالالاردىڭ دا دەمالۋى كەرەكتىگىن ايتتى. «اقبوبەك» ساۋىقتىرۋ ورتالىعىنىڭ قۇرىلتايشىسى كۇلپارشىن ايدارحانوۆانىڭ ايتۋىنشا, بۇل مەكەمە 16 جىلدان بەرى بالالاردىڭ جازعى دەمالىسىن ۇيىمداستىرىپ كەلەدى. وسى ۋاقىت ىشىندە لاگەردە 15 مىڭ بالا دەمالعان. «اقبوبەك — ۆوستوك» لاگەرىنە تيەسىلى اۋماق تۇندە جارىقتاندىرىلىپ, تاۋلىك بويى كۇزەتىلەدى. جازدا التى كەزەڭ بويىنشا لاگەر ۇيىمداستىرىلىپ, ءار كەزەڭدە 250 بالا دەمالا الادى.  جىل سايىن جاز مەزگىلىندە مۇعالىمدەر مەن ستۋدەنتتەر ءۇشىن 50 جۇمىس ورنى اشىلادى. وبلىس اكىمى بەردىبەك ساپارباەۆ مۇندا وقۋشىلاردىڭ جازعى دەمالىستى جاقسى وتكىزۋى ءۇشىن بارلىق جاعداي جاسالعانىن, لاگەرگە ايماقارالىق كووپەراتسيا اياسىندا باتىس قازاقستان, قىزىلوردا, ماڭعىستاۋ, اتىراۋ وبلىستارىنىڭ وقۋشىلارىنىڭ دا كەلىپ, دەمالۋلارى كەرەكتىگىن اتاپ ءوتتى. لاگەردە ءدارى-دارمەكپەن قامتاماسىز ەتىلگەن مەديتسينالىق بلوك, كينوزال, كونتسەرت, سپورت الاڭدارى, بەينەلەۋ ونەرى, ديزاين, ەكستريم, دويبى-شاحمات ۇيىرمەلەرى بار. 2015 جىلى مۇندا اعاشتار مەن تىرەكتەرگە ورنالاستىرىلعان اتتراكتسيوندار ساياباعى اشىلدى, بيىل ساياباقتىڭ ەكىنشى كەزەڭى ىسكە قوسىلادى. ساتىبالدى ءساۋىرباي. دەرەك, فوتو: egemen.kz