سولتۇستىك قازاقستان وبلىسىنىڭ اكىمى شۆەتسيا ەلشىسىمەن كەزدەستى

پەتروپاۆل. 7 ماۋسىم. سولتۇستىك قازاقستان وبلىسىنىڭ اكىمى ەرىك سۇلتانوۆ شۆەتسيانىڭ قازاقستانداعى توتەنشە جانە وكىلەتتى ەلشىسى حريستيان كاميللمەن كەزدەستى. ونىمەن بىرگە Business Sweden شۆەتسيالىق ساۋدا جانە ينۆەستيتسيالىق كەڭەس توراعاسى يگور ۆلاسيۋك بولدى. بۇل تۋرالى وبلىس اكىمدىگىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. ەرىك سۇلتانوۆ رەسپۋبليكامىز تارتىمدى ينۆەستيتسيالىق احۋالمەن ەرەكشەلەنەتىنىن, بيزنەس جۇرگىزۋ ءۇشىن قاجەتتى جاعدايلار جاسالعانىن جەتكىزدى. «سولتۇستىك قازاقستان – اگرارلى ءوڭىر. ءبىز ەلىمىزدەگى استىقتىڭ ۇشتەن ءبىرىن وندىرەمىز. قايتا وڭدەۋ سالاسىندا الەۋەت مول. ءىرى قىتايلىق كومپانيانىڭ قارجى قۇيۋىمەن ماي وڭدەۋ زاۋىتىنىڭ قۇرىلىسى باستالدى. ءبىز نەمىس, يتالياندىق, فينليانديالىق, قىتايلىق جانە رەسەيلىك كومپانيالارمەن جۇمىس ىستەيمىز. شۆەتسيالىق فيرمالارمەن دە بىرلەسكەن جوبالاردى اتقارۋعا دايىنبىز», – دەدى وبلىس اكىمى. ءوز كەزەگىندە حريستيان كاميلل ونىڭ قىزىلجار وڭىرىنە ءۇشىنشى جۇمىس ساپارى ەكەنىن اتاپ ءوتتى. «بۇل قازان ايىندا بولاتىن ۇلكەن كەزدەسۋ الدىنداعى ازىرلىك دەپ بىلەمىز. ءبىزدىڭ ەلىمىز دە سولتۇستىكتە ورنالاسقان, كاسىپكەرلەر ءتىل تابىسا الادى دەپ ويلايمىن», – دەدى شۆەتسيا ەلشىسى. ايتا كەتەيىك, وسى جىلدىڭ قازان ايىندا شۆەتسيانىڭ اۋىل شارۋاشىلىعىن دامىتۋ جانە وڭىرلىك دامۋ ءمينيسترى سەەن ەر بۋحت باستاعان دەلەگاتسيا كەلەدى دەپ كۇتىلۋدە. ءومىر ەسقالي. دەرەك, فوتو: سولتۇستىك قازاقستان وبلىسى اكىمدىگىنىڭ ءباسپاسوز قىزمەتى.