كەشە «اقتوبە اقپارات» ورتالىعىندا وبلىس اكىمى بەردىبەك ساپارباەۆ باق وكىلدەرىمەن بريفينگ وتكىزىپ, تەرروريستىك وقيعاعا بايلانىستى مالىمدەمە جاسادى, ناقتى جاعدايدان حاباردار ەتتى.
ءوڭىر باسشىسى قازىرگى كەزدە وبلىستاعى جاعدايدىڭ جەرگىلىكتى اتقارۋشى بيلىك پەن قۇقىق قورعاۋ ورگاندارىنىڭ باقىلاۋىندا ەكەنىن, وبلىس اكىمدىگىندە وڭىرلىك جەدەل شتاب جۇمىسى ۇيىمداستىرىلعانىن, ۇلتتىق قاۋىپسىزدىك دەپارتامەنتىنىڭ جەتەكشىلىگىمەن تەررورعا قارسى ورتالىق جۇمىس ىستەۋدە ەكەنىن جەتكىزدى. بارلىق قۇقىق قورعاۋ جانە ارنايى ورگاندارمەن تىعىز بايلانىس ورناتىلعانىن اتاپ ءوتتى.
– قارۋ-جاراق دۇكەنى مەن ۇلتتىق گۆارديا اسكەري بولىمىنە جاسالعان شابۋىلعا قاتىسى بار قالعان قىلمىسكەرلەردى جويۋ بويىنشا ءىس-شارالار جالعاسۋدا. قازىرگى كەزدە 12 قىلمىسكەردىڭ كوزى جويىلىپ, 5-ەۋى ۇستالدى, قالعان قىلمىسكەرلەردىڭ جەكە باسىنىڭ مالىمەتتەرى انىقتالىپ, ولاردى ۇستاۋ بويىنشا جەدەل ءىس-شارالار ءجۇرىپ جاتىر. بۇگىن مەديتسينالىق مەكەمەلەرگە بىرنەشە جارالانعاندار اكەلىندى, ولاردىڭ اراسىندا بەيبىت تۇرعىندار مەن قۇقىق قورعاۋ ورگاندارىنىڭ قىزمەتكەرلەرى جوق, نەگىزىنەن اكەلىنگەندەر قىلمىسكەرلەر. كەشە قازا تاپقان اسكەري قىزمەتكەرلەردىڭ وتباسىلارىنا ماتەريالدىق كومەك كورسەتىلەتىن بولدى. بارلىق كوممۋنالدىق قىزمەتتەر, قوعامدىق كولىكتەر مەن مەديتسينالىق مەكەمەلەر شتاتتىق رەجىمدە جۇمىس جاساۋدا.
سونىمەن قاتار, ءبىز تۇرعىنداردىڭ انتيتەرروريستىك وپەراتسيالاردى ءجۇرگىزۋ بارىسىندا حالىق كوپ شوعىرلاناتىن جەرلەر مەن كوڭىل كوتەرۋ ورىندارىنا بارماۋىنا كەڭەس بەرەمىز. مەملەكەتتىك ورگانداردىڭ جۇرگىزىپ جاتقان جۇمىستارىنا, ونىڭ ءىشىندە قۇقىق قورعاۋ ورگاندارىنىڭ قۇجاتتاردى تەكسەرۋ ارەكەتىنە تۇسىنىستىكپەن قاراپ, قاجەتتىلىگىنە قاراي ءتيىستى قولداۋ كورسەتۋلەرىڭىزدى سۇرايمىز. ءتۇرلى اڭگىمەلەرگە بوي الدىرماي, تەك قانا مەملەكەتتىك ورگانداردىڭ رەسمي اقپاراتتارىن باسشىلىققا الۋلارىڭىزدى سۇرايمىز, – دەدى بەردىبەك ماشبەك ۇلى.
قازىر قالادا لاڭكەستەردى قۇرىقتاۋ وپەراتسياسى جالعاسۋدا. وبلىس ورتالىعىندا تەررورلىق ارەكەتكە قارسى كۇشەيتىلگەن رەجىم ەنگىزىلدى.
ساتىبالدى ءساۋىرباي, «ەگەمەن قازاقستان» اقتوبە وبلىسى
