وڭتۇستىك ءوڭىردىڭ اكىمى ءبىرىنشى رەت كوشپەلى القا جيىنىن وتكىزدى

شىمكەنت. 5 ماۋسىم. وڭتۇستىك قازاقستان وبلىسىنىڭ اكىمى بەيبىت اتامقۇلوۆتىڭ توراعالىق ەتۋىمەن ءبىرىنشى رەت كوشپەلى القا ءماجىلىسى ءوتتى. سارىاعاش اۋدانىندا ۇيىمداستىرىلعان وعان وبلىس اكىمدىگى اپپاراتىنىڭ, بارلىق اۋداندار مەن قالالار اكىمدەرى, وبلىستىق باسقارمالار باسشىلارى قاتىستى. بۇل تۋرالى وبلىس اكىمدىگىنىڭ ءباسپاسوز قىزمەتى دەرەگىنە سۇيەنگەن egemen.kz ءتىلشىسى حابارلادى. كۇن تارتىبىندە بەس ماسەلە قارالدى. ونىڭ ءبىرى 2015-2019 جىلدارعا ارنالعان «نۇرلى جول» ينفراقۇرىلىمدىق دامىتۋدىڭ مەملەكەتتىك باعدارلاماسىنىڭ ىسكە اسىرىلۋ بارىسىن تالقىلاسا, ەكىنشىسى رەسپۋبليكالىق جانە وبلىستىق جولدار بويىنداعى ينفراقۇرىلىم دامۋى تۋرالى بولدى. جيىندا سونداي-اق اۋىل شارۋاشىلىعى ماقساتىنداعى جەرلەردى تۇگەندەۋ جانە سەگمەنتتەلگەن جەرلەردى قالپىنا كەلتىرۋ بويىنشا جۇرگىزىلگەن جۇمىستار بارىسى, مەملەكەتتىك قىزمەت كورسەتۋ ماسەلەلەرى جونىندە دە اڭگىمە ايتىلدى. كوشپەلى جيىن بۇلاردان بولەك سارىاعاش اۋدانىنىڭ دامۋ جايىنا دا بارلاۋ جاسادى. اتالعان تاقىرىپتار اياسىندا وبلىس اكىمىنىڭ ءتيىستى سالاعا جاۋاپتى ورىنباسارلارى مەن ءتيىستى قۇرىلىمدار باسشىلارى بايانداما جاسادى. جيىن بارىسىندا ايماق باسشىسى «نۇرلى جول» باعدارلاماسىن ورىنداۋدا قۇرىلىس نىساندارىنىڭ نورماسىن بۇزعان جانە كەستەدەن كەشىككەن تۇركىستان, قازىعۇرت, سارىاعاش اۋداندارى مەن شىمكەنت قالاسىنىڭ اكىمدەرىنىڭ جۇمىسىن سىنعا الدى. وبلىس اكىمى بەيبىت اتامقۇلوۆ كەيبىر مەملەكەتتىك قىزمەتتەردى كورسەتۋ سالاسىنا دا كوڭىل تولماستىق ءبىلدىردى. ول بۇل رەتتە تۇركىستان قالاسى اكىمىنىڭ جۇمىسىنا ايرىقشا ءۇڭىلىپ, جيىندا ايتىلعان سىنداردان ءتيىستى قورىتىندى شىعارۋدى تاپسىردى. وتىرىستا ايماق باسشىسى كەيبىر اۋداندار مەن باسقارمالاردىڭ دامۋ ستراتەگياسىنىڭ جوقتىعىنا قىنجىلىس تانىتتى. ەنلدى بەرىلىپ وتىرعان تاپسىرمالارعا سايكەس كەمشىلىكتەر جىلدىڭ ءبىرىنشى جارتىسىندا جويىلۋى ءتيىس. سارىاعاش اۋدانىنا ساپارى كەزىندە ايماق باسشىسى وسى كۇنى جاڭادان اشىلعان «ياسسى نان» جشس مەن اۋداندىق سوت عيماراتىنىڭ, سونىمەن بىرگە, جەرگىلىكتى پوليتسيا ءبولىمى مەن سۋدان قۇتقارۋ قىزمەتىنىڭ عيماراتىن ارالاپ, جۇمىسىمەن تانىستى. ول بۇدان ءارى وزبەكستانمەن شەبىندەگى «جىبەك جولى» شەكارا بەكەتىنە ارنايى باردى. جۇمىس ساپارى اياسىندا وبلىس باسشىسى ونداعى كەدەندىك قىزمەت كورسەتۋدى, باقىلاۋ جۇيەسىن جاڭارتۋدى جانە ينفراقۇرىلىم ماسەلەسىن رەتتەۋدى تاپسىردى. ايتا كەتۋ كەرەك, اۋداندار مەن قالالار اراسىندا تاجىريبە الماسىپ, ونداعى اكىمدەرگە قاتىستى وزەكتى ماسەلەلەردى قاراستىرۋدى ماقسات تۇتقان مۇنداي كوشپەلى جيىندار الداعى ۋاقىتتا دا وتەتىن بولادى. باقتيار تايجان. دەرەك, فوتو: وڭتۇستىك قازاقستان وبلىسى اكىمدىگىنىڭ ءباسپاسوز قىزمەتى.