استانا. 4 ماۋسىم. ءۇندىستاننىڭ شىعىس جاعىنداعى پروۆينتسيالاردىڭ بىرىندە 4 قولى, ەكى اياعى بار سيام ەگىزدەرى دۇنيەگە كەلدى. ولاردىڭ ىشكى ورگاندارى تۇگەل دەرلىك بىرگە جاراتىلعان بولىپ شىقتى. بۇل تۋرالى ras.kz-كە سىلتەمە جاساعان egemen.kz ءتىلشىسى حابارلادى.
قارىندارى بىرگە جاراتىلىپ, ءبىر-بىرلەرىمەن جابىسىپ تۋعان پەرزەنتتەردىڭ ءبىرى ۇل, ەكىنشىسى قىز ەكەن. ولاردىڭ 24 جاستاعى اناسى شيۆرادجو دەۆي ەكىقابات كەزىندە دارىگەردىڭ كەڭەسىنە قايتا-قايتا بارىپ, تەكسەرىلىپ ءجۇرىپ, ەگىز بالالار تۋاتىنىن بىلمەپتى. ال سيام ەگىزدەرى جايىندا وي ءۇش ۇيىقتاسا دا تۇسىنە كىرمەگەن. تەكسەرىلۋ كەزىندە كەلىنشەك ءتىپتى بىرنەشە رەت ۋزي جابدىعىنان دا وتكەن كورىنەدى. سوندا ىشتە ەگىز بالالار جاتقانىن, ولاردىڭ ءبىر-بىرلەرىمەن جابىسىپ قالعانىن ەشكىم دە بايقاماعان.
ايەل بالالارىن جەكە كلينيكالاردىڭ بىرىندە بوسانىپتى. بىراق سيام ەگىزدەرى تۋىلعاننان كەيىن دارىگەرلەر ولاردى بۇدان گورى الەۋەتى جوعارى, جاعدايى جاقسى ەمحاناعا اۋىستىرعان. سودان كەيىن بالالاردىڭ جاعدايلارى جاقسارعان.
جاس اتا-انانىڭ وكىنىشىنە وراي, سوڭىنان بالالاردى دەليگە اكەتىپ ەمدەتۋ كەرەكتىگى ايتىلعاندا, بۇلار سوعان باراتىن جانە ەم-دومعا جۇمسايتىن اقشا تاۋىپ بەرە الماعان. سول سەبەپتى دە ولار بالالارىن ۇيلەرىنە الىپ قايتۋعا ءماجبۇر بولعان.
«مەنىڭ جۇرەگىم قاتتى جارالى, – دەيدى بالالاردىڭ اناسى. – دارىگەرلەر ءبىراز ءۇمىت كۇتىپ ەدىم, ولاردىڭ ومىرلەرىن ساقتاپ قالا الادى عوي دەۋشى ەدىم. سول دارىگەرلەر بىزدەن تەرىس اينالدى. مەن ەندى نە ىستەرىمدى, بالالارعا نە بولارىن بىلمەيمىن».
سيام ەگىزدەرىنىڭ 30 جاستاعى اكەسى چحوتا سينگح بۇدان بۇرىن مۇنداي ەگىزدەر بولاتىنى جايلى ەستىپ كەلگەنىمەن, وزدەرىن كورمەگەنىن ايتادى. بۇلاردىڭ مۇنىڭ الدىندا ەكى بالاسى بار ەكەن. ولار سولاردىڭ قاتارىنا تاعى ءبىر بالا قوسىلادى دەپ ۇمىتتەنىپتى. الايدا, سيام ەگىزدەرىن كورگەندە, كوزدەرى تاس توبەلەرىنە شىققان.
ءۇندى دارىگەرلەرى بالالاردىڭ ىشتەرى بىرگە جاراتىلعانىن, ونداعى ورگانداردىڭ ەكەۋىنە ورتاق ەكەنىن ايتادى. ەندى ولاردىڭ ءتىرى قالاتىندارىنا نەمەسە ەكىگە ءبولىپ الۋعا ءۇمىتتىڭ وتە از ەكەنىن اتا-انالارى دا سەزىپ وتىر.
تالعات رايىمبەك.
دەرەك, فوتو: ras.kz.
