اتىراۋ وبلىسىنداعى قيعاش وزەنى ارناسىن بۇزىپ كەتكەلى تۇر

اتىراۋ. 21 مامىر. وبلىستىڭ قۇرمانعازى اۋدانىندا قيعاش وزەنى ارناسىنان تاسىپ, جاعاداعى بوگەتتى بۇزىپ ءوتۋدىڭ قاۋپىندە تۇر. بۇل تۋرالى كتك تەلەارناسىنىڭ اقپارىنا سۇيەنگەن egemen.kz ءتىلشىسى حابارلادى. ەدىلدىڭ ءىرى سالاسى بولىپ كەلەتىن قيعاش وزەنى بويىندا ورنالاسقان جىلاندى اۋىلىنىڭ حالقى سوڭعى 3-4  كۇننەن بەرى كۇنى-ءتۇنى داريا جاعاسىندا كەزەكشىلىككە ۇيىمداستىرىپ, ەلدى مەكەندى تاسقىن سۋ باسىپ قالماۋى جاعىن قاراستىرىپ جاتىر. وسىعان وراي ءتىپتى مەكتەپتە ساباق تا توقتاتىلىپ, جوعارى سىنىپ وقۋشىلارى ارنا توعانىن كۇشەيتۋ جۇمىستارىنا قاتىستىرىلىپ جاتىر. جىلاندى اۋىلىندا 2,5 مىڭعا جۋىق حالىق تۇرادى. ولاردىڭ ىسكە جارامدى كىسىلەرىنىڭ ءبارى قازىر وسى توعان بەكەمدەۋ ناۋقانىنا تارتىلعان. ال قيعاش وزەنى تاياق تاستام جەردە بۋىرقانىپ اعىپ جاتىر. «ەلگە قاۋىپ ءتونىپ تۇرعان جوق, ءبارى حالىقتىڭ كۇشىمەنەن ساعات 6-عا دەيىن وسى ۇستاپ شىقتى. ەكى كۇننەن بەرى وسى مەكتەپ دامبى سالۋدا. كەشەدەن بەرى ساباق توقتاتىلدى. مۇعالىمدەر دە بەرى وسىنىڭ باسىندا. بىراق جەرگىلىكتى باسشىلار مۇنىڭ ءبارىن جوققا شىعارىپ, جايباراقات وتىر. بۇلاردىڭ سوزىنە سەنسەك, ەش مەكەمە جۇمىسىن توقتاتپاعان, ال قاۋىپ سەيىلگەن», - دەيدى اۋىل تۇرعىندارى. «سۋدى توقتاتا الماساق, قۇجاتتارىڭىزدى دايىنداپ كوشۋگە دايىن وتىرۋدى ەسكەرتتىك. بىراق جاستار جاعى تاڭعى 4 جارىمعا دەيىن ەكى كۇن جۇمىس جاسادى. سونىڭ ناتيجەسىندە ەلدى مەكەندى قورعاپ قالدى», - دەيدى اۋدان اكىمى بيبوز شاياحمەتوۆ. قازىر قيعاشقا ۆولگوگراد قويماسىنان سەكۋندىنا 26 مىڭ تەكشە مەتر سۋ كەلىپ تۇسۋدە. رەسەي جاعى سونىمەن قاتار مۇنداي مولشەردەگى سۋدىڭ 6 ماۋسىمعا دەيىن جىبەرىلەتىنىن ەسكەرتكەن ەكەن. سوعان قاراعاندا, قيعاشتىڭ تاسۋى قاۋپى جاقىن ارادا سەيىلە قويمايتىن سياقتى. جولداسبەك شوپەعۇل. دەرەك, فوتو: كتك.