الماتىدا قازاقستان دزيۋدوشىلارى ءبىر التىن, ءۇش كۇمىس جانە ەكى قولا يەلەندى

استانا. 16 مامىر. الماتىدا Grand Prix ءتۋرنيرى اياقتالدى. بۇل تۋرالى egemen.kz ءتىلشىسى حابارلادى. تۋرنيردە قازاقستان دزيۋدوشىلارى ءبىر التىن, ءۇش كۇمىس جانە ەكى قولا يەلەندى. جارىس قورىتىندىسى بويىنشا ەلىمىزدىڭ ۇلتتىق قۇراماسى جالپىكوماندالىق ەسەپتە ءتورتىنشى ورىنعا ورنالاستى. بۇل سىنعا 80-نەن استام ەلدىڭ 400-گە تارتا دزيۋدوشىسى قاتىستى. گران پري ءتۋرنيرى الماتىدا العاش رەت 2004 جىلى وتكىزىلگەن بولاتىن. ودان كەيىن 2010 جانە 2011 جىلدارى الەم كۋبوگى جارىسى, 2012 جىلى الماتى قالاسىندا «الەم شەبەرلەرى» وتكىزىلدى. سوڭعىسىنا حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەر كەلىپ, ەلىمىزدە وتكىزىلىپ جاتقان جارىستارعا جوعارى باعاسىن بەرىپ كەتكەن ەدى. سودان بەرى ەلىمىز دزيۋدو ءتۋرنيرىن وتكىزۋگە لايىق مەملەكەتتەر قاتارىنا قوسىلدى. دزيۋدو كۇرەسى دۇنيەجۇزى بويىنشا ەڭ كەڭ تارالعان سپورت ءتۇرى. بۇل كۇرەسپەن تاڭ ەرتە اتاتىن جاپونيا ەلىنەن باستاپ, كۇن كەش باتاتىن برازيلياداعى بالالارعا دەيىن اينالىسادى. ءسويتىپ, قازاقستان 2013 جىلدان باستاپ گران پري جارىسىن وتكىزۋ قۇقىعىنا يە بولدى. 2013 جىلى گران پري الماتىدا وتكىزىلسە, 2014 جىلى استانادا ۇيىمداستىرىلدى. ال 2015 جىلى ەلىمىز الەم چەمپيوناتىن وتكىزىپ, حالىقارالىق دزيۋدو قاۋىمداستىعى تاراپىنان جوعارى باعا الدى. داستان كەنجالين. دەرەك, فوتو: fdk.kz