ءبىر بەيتانىس اپاي «الماتى- ماسكەۋ» جۇردەك پويىزىنىڭ ۆاگونىنا كىردى. وسى كەزدە جولسەرىك ول كىسىنىڭ جول قۇجاتىن قاراپ كوردى دە, ونىڭ ءدال بۇگىنگى كۇنگە سايكەسپەيتىنىن ايتتى. ياعني, ول كۇنىلگەرى العان بيلەتىمەن بۋىنىپ-ءتۇيىنىپ كەلىپ تۇر ەكەن. جولسەرىكتەن جاڭاعىداي ءسوزدى ەستىگەن كەزدە اڭ-تاڭ بولىپ, ابىگەرگە ءتۇستى دە قالدى. قولىنداعى بيلەتىنىڭ قاتە ەكەنىنەن بەيحابار. ءبىز دە اپايدىڭ جانايقايىنا ەلەڭ ەتە قالدىق. ەندى قايتپەك؟ سالدەن سوڭ جۇردەك پويىز ءجۇرىپ كەتەدى. سول ەكى ارادا ونىڭ قاسىنا پويىز باستىعى نەسىبەلى نارماعامبەتقىزى كەلدى دە, بيلەتكە ۇڭىلە قاراپ باسىن شايقادى. ءويتكەنى, بيلەتتىڭ ايىن اۋىستىرىپ جازىپ جىبەرگەن كاسسيردىڭ شالاعايلىعىن بىردەن بايقادى. دەرەۋ جولاۋشىعا اقىل-كەڭەسىن بەرىپ, جول كورسەتتى.
اپاي, ازىرگە پويىز جۇرمەي تۇرعاندا تەزدەتىپ كاسساعا بارىڭىز دا, ءمان-جايدى ءتۇسىندىرىڭىز. كەيبىر بيلەت ساتۋشىلار تاراپىنان مۇنداي كەلەڭسىزدىكتەر بولىپ تۇرادى. ءسىز سەكىلدى جولاۋشىلاردى كورىپ ءجۇرمىز. ابىرجىماي, تەزىرەك جول قۇجاتىڭىزدى اۋىستىرىڭىز. پويىز ءسىزدى كۇتە تۇرادى, دەدى. ايتقانداي-اق, ارادا ون-ون بەس مينۋت وتپەي جاڭاعى جولاۋشى اپاي ەكى وكپەسىن قولىنا الىپ, جانۇشىرىپ قايتا كەلدى. وسى ەكى ارادا الگى قاتە ساتىلعان بيلەتتى كەرى تاپسىرىپ, باسقاسىن الىپ ۇلگەرگەن ەكەن. قۋانىشى قوينىنا سىيماي, پويىز باستىعى نەسىبەلى قازكەنوۆاعا انالىق العىسىن جاۋدىرىپ جاتىر. سول پويىزدىڭ «مىڭ بولعىر» جولسەرىكتەرى ءارلى-بەرلى جۇگىرەمىن دەپ وكپەسى قىسىلعان اپايدىڭ جۇكتەرىن كوتەرىپ, بيلەتتە كورسەتىلگەن ۆاگونعا قاراي اكەتتى. ويلاماعان جەردەن باراتىن ستانساسىنا جەتە الماي, جولىنان كەشىگىپ قالا جازداعان بەيتانىس جان قاتتى ابىرجىپ كەتكەن بولۋى كەرەك, ءتىپتى كەمسەڭدەپ جىلاپ تا الدى.
– اپا, بۇدان بىلاي بيلەتتى العان بويدا ونىڭ دۇرىستىعىن مۇقيات تەكسەرىپ, قاراپ الىڭىز. كۇنىن, ايىن, ۆاگونىن, ساعاتىن دۇرىستاپ قاراڭىز. ەشكىمگە سەنبەي, ءوز كوزىڭىزگە عانا سەنىڭىز. ءسىز سەكىلدى تالاي جولاۋشىنى كورىپ كەلەمىز. كاسسادا بيلەت ساتىپ وتىرعان قىزمەتكەرگە ءبىز مۇنداي جاعدايدا مىندەتتى تۇردە ەسكەرتەمىز. ەندى, ءبارى ارتتا قالدى. ىستىق شاي ءىشىپ, ءوز-وزىڭىزگە كەلىڭىز. قام جەمەڭىز. بۇل جاعداي ءسىز ارقىلى باسقا دا جولاۋشىلارعا دا ساباق بولادى, – دەپ نەسىبەلى حانىم الگى جولاۋشىنى جۇباتا ءتىل قاتتى.
«جاقسى ءسوز – جارىم ىرىس» دەمەكشى, اپايدىڭ دا كوڭىلى جادىراپ, قاس-قاعىم ساتتە باسىنان وتكەرگەن جايتتى ۇمىتا باستادى. ءومىردىڭ ساتتىلىگى مەن ساتسىزدىگى قاتار جۇرەدى دەگەن وسى عوي. جاڭا عانا ابىر-سابىر بولعان ۆاگون ءىشى تىنىشتالىپ, جولاۋشى بىتكەن ۆاگوندا ەمەس, بەينەبىر ۇيىندە جاتقانداي ءتاتتى ۇيقىعا بەرىلە باستادى. بايقايمىن, ءتۇن ورتاسى اۋعاندا پويىز باستىعى عانا ءار ۆاگوندى سىرتىنان باقىلاپ, ءوز قىزمەتىن ودان ءارى جالعاستىرۋدا. ۇزاق ساپارعا شىققان پويىزدىڭ رەلستەرىمەن بىرگە قوزعالىپ, بىرگە تەڭسەلىپ ايلى تۇنگە تاستاي قاراڭعى تەرەزەدەن وقتىن-وقتىن قاراپ قويادى.
اقتوبە وبلىسىنىڭ شۇبارقۇدىق اۋدانىندا تۋىپ-وسكەن نەسىبەلى قازكەنوۆانىڭ نەگىزگى ماماندىعى مۇعالىم كورىنەدى. اقتوبە قالاسىنان پەداگوگيكالىق ينستيتۋتتى تامامداعان ول جۇرەگىنىڭ قالاۋىمەن 1996 جىلى تەمىرجول سالاسىنا ءبىرجولاتا بەت بۇرادى. ءدال وسى سالا ءۇشىن 1994 جىلى ۇلكەن قالا الماتىعا ارنايى بارىپ, كۇردەلى ماماندىقتىڭ قىر-سىرىنا قانىعادى. ءبىلىمىن جەتىلدىرىپ, ارنايى سىناقتاردان سۇرىنبەي وتەدى. ءسويتىپ, ەكى جىل بويى جولسەرىك قىزمەتىن جان-جاقتى اتقارىپ, باسشىلىقتىڭ سەنىمىن اقتايدى. ءسويتىپ اسقار تاۋداي اكەسى نارماعامبەت پەن اياۋلى اناسى زيباگۇل ىلياسقىزىنىڭ ءىزىن جالعاۋعا بەل بايلايدى. جارتى عاسىرعا جۋىق ۋاقىت بويى اتا-اناسى اقتوبەنىڭ تەمىرجولىندا تىنىمسىز ەڭبەك ەتىپ, كەشەگى ۇلى وتان سوعىسى كەزىندە دە تەمىرجول ارقىلى مايدانداعى سولداتتارعا كيىم-كەشەك, قارۋ-جاراق تاسيدى. 1942-1944 جىلدارى جەڭىستى جاقىنداتۋعا قوسقان قاجىرلى ەڭبەكتەرى ءۇشىن كەۋدەلەرىنە مەدال تاققان اياۋلى اتا-انانىڭ جولىن قۋعان نەسىبەلى, مىنەكي, جيىرما جىل بويى جاقسى ءۇردىستى جالعاستىرىپ كەلەدى.
جاۋاپتى دا كۇردەلى جۇمىستى ابىرويمەن اتقارۋدى ەر مىنەزدى نەسىبەلى قازكەنوۆاعا تاعدىردىڭ ءوزى ارقالاتىپ قويعان ءتارىزدى. نازىك جاندى ايەل زاتىمىن دەمەي, ەر-ازاماتتار اتقاراتىن قىزمەتتى ۇرشىقتاي ءۇيىرىپ اكەتكەنىنە ارىپتەستەرى دە ءدان ريزا.
– نەسىبەلى نارماعامبەتقىزىمەن بىرگە قىزمەتتەس بولۋدىڭ ءوزى ءبىز ءۇشىن بيىك مارتەبە. ول كىسىنىڭ باسشى رەتىندە قوياتىن تالابى مەن ءتارتىبىن بۇلجىتپاي ورىندايمىز. اۋىزبىرلىك پەن ءوزارا تۇسىنىستىك بولماسا, جۇمىس العا جۇرمەيدى. ءبىزدىڭ №7 «الماتى-ماسكەۋ» پويىزىنىڭ ورنى ايرىقشا. تىكۇشاقتان كەيىنگى جىلدام ءارى ىڭعايلى كولىكتىڭ ءبىرى بولىپ سانالادى. سان ءتۇرلى ۇلتتىڭ وكىلدەرى ماسكەۋ مەن قازاقستاننىڭ اراسىنا وسى پويىزبەن قاتىنايدى. سوندىقتان, ءبىز ءاربىر جولاۋشىنىڭ جاعدايىن جاساۋعا تىرىسىپ باعامىز. كىرگەن-شىققان جولاۋشىنىڭ بيلەتىن تەكسەرۋمەن شەكتەلمەيمىز. ۆاگون ءىشىن ۋاقتىلى ءسۇرتىپ-تازارتامىز. اۋاسىن جاڭارتامىز. جالپى, كوزگە كورىنبەيتىن ۇساق-تۇيەك جۇمىستارمەن ءوزىمىز اينالىسامىز. ماسەلەن, ۆاگوندا جارىق ءسونىپ قالسا, ەلەكتريكتەرگە جۇگىنەمىز. تەحنيكانىڭ اتى – تەحنيكا. ءتۇرلى جاعدايلار بولىپ تۇرادى. سوندىقتان, جولسەرىك يەلەرى بارلىق جاعدايعا دايىن وتىرادى, – دەيدى اتالمىش پويىزدىڭ №6 ۆاگونىنىڭ جولسەرىگى زيراش تاپەەۆا.
ءيا, «جاقسىمەن جولداس بولساڭ, جولدا قالمايسىڭ» دەيدى دانا حالقىمىز. شامادانىن قولىنا الىپ جولعا شىققان ءار ادام الدىمنان ءجون بىلەتىن, ءسوزى ءتۇزۋ جولسەرىك كەزدەسسە ەكەن دەپ تىلەيدى. ايتقانداي-اق, نەسىبەلى نارماعامبەتقىزىنداي ارى تازا, ادامگەرشىلىگى مول مامان تاپ بولسا, ولاردىڭ باعى بار ەكەن دەي بەرىڭىز. جۇمىس كەستەسىنە بايلانىستى مەرەكەلەردى دە جول ۇستىندە قارسى الاتىن نەسىبەلى حانىم 2008 جىلى قىرعىز ازاماتشاسىن ءوز پويىزىندا بوساندىرىپ الىپتى.
جيىرما جىل بويى جول ۇستىندە ءجۇرىپ, تالاي ءساتتى دە ءساتسىز وقيعالاردىڭ كۋاسى بولعان كورگەنى كوپ جان بيىلعى 2016 جىلدىڭ جاڭا جىل كەشىن, ياعني تۇنگى ساعات 12.00-دە ءوزى كوش باستاعان №7 «الماتى-ماسكەۋ» پويىزىمەن كەتىپ بارا جاتىپ, ساراتوۆ قالاسىنىڭ ماڭىندا قارسى الىپتى.
– ماسكەۋگە 1 قاڭتار كۇنى جەتتىك. قانشا جىلدان بەرى مەيرامداردى, جىل باسىن وتباسىمەن جىراقتا وتكىزىپ جۇرگەنىمدى ساناماپپىن. جۇمىستىڭ اتى – جۇمىس. ەگەمەن ەلىمىزدىڭ ابىرويى ءۇشىن ايانباي ەڭبەك ەتىپ, جولاۋشىلارىمدى امان-ەسەن جەتكىزسەم بولعانى. ويتكەنى, ءبىزدىڭ قۇرام ءار جولاۋشىنىڭ جولداعى ءومىرى مەن تاعدىرىنا جاۋاپتى, – دەدى نەسىبەلى نارماعامبەتقىزى ۇيالى تەلەفونىم ارقىلى حال-جاعدايىن ءبىلىپ, جاڭا جىلىمەن قۇتتىقتاعان ساتىمدە.
ءيا, جىلدىڭ ءار كۇنى مەن ءار ساعاتىندا جولاۋشىنىڭ العىسىن ارقالاعان قازاقتىڭ مۇنداي ىسكەر دە ءىلتيپاتتى, جىگەرلى دە جايدارى قىزىنان اينالىپ كەتپەسسىڭ بە.
ميرا شۇيىنشاليەۆا,
قازاقستان جازۋشىلار وداعىنىڭ مۇشەسى
الماتى
سۋرەتتە: نەسىبەلى قازكەنوۆا