شىعىس پەن باتىستىڭ دامىعان ەلدەرىنىڭ كوبىندە كەڭىنەن تاراعان تابىستى بيزنەس فيلوسوفياسى دەگەن تۇسىنىك بار. ونىڭ ءمانىسى مىنادا ەكەن: ءاربىر كاسىپكەر ءوزىنىڭ تابىسىنىڭ بەلگىلى ءبىر مولشەرىن قايىرىمدىلىققا قيۋى كەرەك. سوندا ونىڭ تاسى ورگە دومالاپ, شارۋاسى شالقيتىن كورىنەدى.
ال ءبىزدىڭ كەيىپكەرىمىز كاسىپكەر ءاليا سادىرباەۆا ارىپتەسى مۇرات ابەنوۆپەن بىرىگىپ «راقمەت. سپاسيبو» قايىرىمدىلىق بەكەتىن اشقاندا, وسى ىستەن ءبىر پايدا كورەيىكشى دەپ استە ويلاماعان ەدى. كەنشىلەر استاناسىندا بۇلار جۇزەگە اسىرعان بۇل جوبا ءبىراز ۋاقىتتان بەرى جەمىستى جۇمىس ىستەپ تۇر. بۇل جەردە مۇقتاج جاندار تەگىن نان الادى, قايىرىمدى جاندار اكەلىپ تاپسىرعان كيىم-كەشەك, باسقا دا ۇساق-تۇيەك زاتتارعا يە بولىپ جاتادى.
«اۋەلى الەۋمەتتىك جەلىدە حابارلاما جاريالادىم. ءسويتىپ, كۇن سايىن 20 بولكە ناندى تەگىن تاراتىپ تۇردىم. مەنىڭ بۇل ىسىمدە ەشقانداي بوتەن وي جوق. تەك قانا مۇقتاج جاندارعا كومەك قولىن سوزسام دەيمىن. وسى ىسكە دەپ جۇمساعان ەكى جارىم مىڭ تەڭگەدەن مەن كەدەي بولىپ قالمايمىن. مۇمكىن بۇل نان كەيبىر جاننىڭ داستارقانىنداعى جالعىز عانا ءدام بولۋى ابدەن مۇمكىن عوي», – دەيدى مۇرات.
قايىرىمدىلىق بەكەتىنە كەلەتىن جانداردىڭ باسىم بولىگى زەينەتاقىسى جەتىڭكىرەمەيتىن ەگدە ادامدار مەن كوپ بالالى انالار. زەينەتكەرلەر نەگىزىنەن نان الادى, ال جالعىزباستى انالار بالالارىنا دەپ كيىم-كەشەك قاراستىرادى.
مۇندا ءجيى باس سۇعاتىن جاننىڭ ءبىرى – ءلايلا يسمايلوۆا. جەتى بىردەي بالاسى بار جالعىزباستى انانىڭ جاعدايى شىنىمەن دە قيىن. ويدا جوق جەردەن وتاعاسىنان ايىرىلىپ, جەسىرلىكتىڭ قامىتىن كيگەن ايەلدى اۋىر تۇرمىس ابدەن قاجىتقان. «راقمەت. سپاسيبو» جوباسى تۋرالى ەستىگەندە ول ءوز قۇلاعىنا ءوزى سەنبەپتى. سوندا دا بارىپ, كوزبەن كورمەكشى بولعان. كەلدى. كوردى. «راقمەت. سپاسيبو» قايىرىمدىلىق بەكەتىندە بالالارعا ارنالعان نەشەمە ءتۇرلى كيىم-كەشەك, زاتتار مەن بۇيىمدار بار ەكەن.
«ۇلكەن بالالارىم مەكتەپتە وقيدى. ەڭ كىشىم – ءبىر جاستا. ءوزىم ەدەن جۋشى بولىپ ىستەيمىن. جاسىراتىنى جوق, ەڭبەكاقىم بىردە جەتسە, بىردە جەتپەي جاتادى. وتكەن جولى قولىما جاپ-جاڭا بالالار ارباشاسى ءتيدى. 15 مىڭ تەڭگەدەن جوعارى تۇراتىن مۇنداي ارباشانى مەن عۇمىرى ساتىپ الا الماس ەدىم. بۇل بەكەت مەن سياقتىلاردىڭ قۇتقارۋشىسى», – دەپ سىر اقتاردى ءلايلا.
«راقمەت. سپاسيبو» قايىرىمدىلىق بەكەتىنە كۇنىنە جيىرماشاقتى ادام كەلەدى. بوس كەتپەيدى. ايتەۋىر, قولدارىنا ءبىر زاتتى ۇستاپ قايتادى. البەتتە, ولار ءاليا مەن مۇرات سىندى جانى جومارت, قولى اشىق قايىرىمدى جاندارعا العىستارىن جاۋدىرىپ كەتەدى.
قايرات ءابىلدينوۆ,
«ەگەمەن قازاقستان»
قاراعاندى