سوڭعى جىلدارى رەسپۋبليكامىزدا ەلباسى تاپسىرماسىنا سايكەس ىشكى ءتۋريزمدى دامىتۋعا ەرەكشە كوڭىل ءبولىنىپ كەلەدى. ءبىر سوزبەن ايتقاندا, مۇنى ەرەسەكتەر ءتۋريزمى دەسە دە بولادى. سونىمەن بىرگە, بالالار مەن جاسوسپىرىمدەر ءتۋريزمى دەگەن دە ۇعىم بار. الدىڭعىسىنا قاراعاندا ءتۋريزمنىڭ بۇل ءتۇرىن دامىتۋ الدەقايدا جاۋاپتىراق ءارى الدەقايدا كۇردەلىرەك. ويتكەنى, بالالار ءتۋريزمى جەتكىنشەك ۇرپاقتاردى, ەلىمىزدىڭ ەرتەڭىن تاربيەلەۋ مەن قالىپتاستىرۋدا ايرىقشا ورىن الادى.
ورال وڭىرىندە اتالمىش تۋريزم ءتۇرىنىڭ ەجەلگى ءداستۇرى مەن تاريحى بار. مىسالى, مۇندا بالالار ءتۋريزمىن ۇيىمداسترۋ ءىسى بۇدان ەلۋ بەس جىل بۇرىن, ياعني وتكەن عاسىردىڭ الپىسىنشى جىلدارىنىڭ باس كەزىندە قولعا الىنا باستاپتى. سول ۋاقىتتان بەرى وبلىستا بۇل ىستە كوپتەگەن وڭ تاجىريبەلەر جيناقتالىپ, باتىل باستامالار جۇزەگە استى. سونىڭ ناتيجەسىندە اقجايىق اۋماعىنداعى بالالاردىڭ ىشكى ءتۋريزمىن دامىتۋ مەن وركەندەتۋ جونىندەگى ومىرشەڭ ءىس-شارالار مەن وڭ تاجىريبەلەر ەلوردامىز استانا مەن الماتى قالالارىنا جانە رەسپۋبليكانىڭ بارلىق وبلىستارىنا ۇلگى-ونەگە رەتىندە ۇسىنىلدى. تاعىلىم الاتىن جايت رەتىندە تاراتىلدى. بۇل جونىندە مەملەكەتتىك حاتشىنىڭ ارنايى شەشىمى دە قابىلداندى.
مۇنىڭ ءبارى, ارينە, وبلىستاعى بالالار مەن تۋريزم ورتالىعى, سونىڭ ىشىندە ونىڭ ديرەكتورى ۆيكتور فومين ءۇشىن ۇلكەن ابىروي. سونىمەن بىرگە, جوعارى جاۋاپكەرشىلىك پەن مەرەيلى ءمىندەت ەكەنى كامىل. وڭىردە جانە تۇتاستاي ەلىمىزدەگى بالالار مەن جاسوسپىرىمدەر ءتۋريزمىنىڭ كەڭىنەن وركەندەۋىنە ورتالىق جانىنان شىعاتىن جانە رەسپۋبليكا كولەمىنە تارالاتىن «سوقپاق» جۋرنالىنىڭ دا تيگىزگەن سەپتىگى مول.
ورتالىق باسشىسى ۆ.پ.فوميننىڭ باستاماسىمەن داستۇرگە ەنىپ ۇلگەرگەن «حرۋستالدى شوقىر» جۇلدەسىنىڭ ورنى بولەك. بالالار مەن جاسوسپىرىمدەر ءتۋريزمىن دامىتۋعا قولداۋ كورسەتىپ, جاناشىرلىق تانىتىپ جۇرگەن ءىس باسىنداعى ازاماتتار سوڭعى بەس جىل بەدەرىندە وسى جۇلدەمەن ماراپاتتالىپ ءجۇر. تالاس جوق, ولكە مەن ەل تاريحىن زەردەلەۋگە, ونى ەل-جۇرتتىڭ جۇرەكتەرىنە جەتكىزىپ, سانالارىنا جەتكىزۋگە تۋريزم جاناشىرلارىنىڭ قوسقان ۇلەسى قوماقتى.
بيىلعى جىلى «حرۋستالدى شوقىر» جۇلدەسى ونىڭ يەگەرلەرىنە ون ەكى اتالىم بويىنشا تابىس ەتىلدى. ولاردىڭ قاتارىندا ساياحاتتىق-ولكەتانۋ قىزمەتى مەن قوسىمشا ءبىلىم بەرۋ ءجۇيەسىنىڭ ۇزدىك ۇيىمداستىرۋشىلارى, تاڭداۋلى ءادىستەمەلىك ەڭبەكتەردىڭ اۆتورلارى, كۇركەلىك جانە ستاتسيونارلىق لاگەرلەردىڭ جانە تۋريستىك جورىقتار مەن ەكسپەديتسيالاردىڭ كوشباستاۋشىلارى, بىرقاتار اۋدان اكىمدەرى مەن ولاردىڭ ورىنباسارلارى, باق وكىلدەرى بار.
مىنە, ورال وڭىرىندە بالالار ءتۋريزمىنىڭ بۇگىنگە جەتكەن بيىك بەلەستەرى وسىنداي.
تەمىر قۇسايىن,
«ەگەمەن قازاقستان»
باتىس قازاقستان وبلىسى
سۋرەتتە: «حرۋستالدى شوقىر» جۇلدەسى وسىلاي مارەگە جەتتى
سۋرەتتى تۇسىرگەن
رافحات حالەلوۆ