بەيبىت كۇندە دە ەرلىككە ورىن بار

ەرلىك – مايدان شەبىندە, ۇرىس دالاسىندا عانا جاسالمايدى. شىنتۋايتىندا, ەرلىكتىڭ ءتۇرى كوپ. سونىڭ ءبىرى – بەيبىت ومىردەگى ەرلىك پەن باتىرلىقتىڭ ۇلگىسىنە باس يمەۋ, قۇرمەت تۇتپاۋ مۇمكىن ەمەس. اسىرەسە, كۇندەلىكتى ءومىرى تاۋەكەلمەن تىعىز بايلانىستى اسكەري قىزمەتشىلەردىڭ ءاربىر باتىل ارەكەتى, تاباندى ءىس-قيمىلى قوعامنىڭ تىكەلەي نازارىندا بولارى داۋسىز. وسىدان بىرەر جىل بۇ­رىن ورالداعى «باتىس» ءوڭىر­لىك قولباسشىلىعىنىڭ اعا وفيتسەرلەرى, مايورلار سالاۋات قابدىقۇلوۆ پەن رينات جۇما­ليەۆ ءتىلسىز جاۋ – ورتتەن ءبىر­نەشە ادامدى قۇتقارىپ, ەرلىك جاسادى. ارينە, ولاردىڭ وزدەرى بۇل قادامدارىن ەرلىك ەمەس, وتان الدىنداعى, حالىق الدىنداعى اسكەري, ازاماتتىق بورىشىمىز دەپ تۇسىندىرەدى. دەيتۇرعانمەن, سىن ساعاتى تۋعاندا كوزدى جۇمىپ كومەككە ۇمتىلاتىن ەرىك-جىگەر, با­تىلدىق بارشانىڭ بويىنا بەرىلمەگەن قاسيەت ەكەندىگىن دە مويىنداۋىمىز قاجەت-اق. ەندى قوس سارداردىڭ باسىنان وتكەن سول ءبىر توتەنشە وقيعالاردىڭ قالاي وربىگەندىگىنە توقتا­لايىق. جەر-انا جاسىل جەلەگىن جامىلىپ, تىرشىلىك اتاۋلى تۇلەپ سالا بەرگەن مامىر ايىنىڭ ورتا شەنى بولاتىن. وسى ءبىر جاي­ماشۋاق, جايدارى قالىپتى اياق استىنان شىققان اششى ايقاي بۇزىپ جىبەرگەندەي بولدى. «ءورت! ءورت! ءۇي ورتەنىپ جاتىر!» دەگەن جاندارمەن داۋىستار تۇستىك ىشۋگە ۇيىنە كەلە جاتقان سالاۋات قابدىقۇلوۆتى دا سەلت ەتكىزدى. ويلانۋعا, تولعانۋعا ۋاقىت جوق. بۇعان دەيىن دە تالاي وقىس وقيعالاردىڭ ورتاسىندا بولىپ, ابدەن شىنىققان  اسكەري وفيتسەر دەرەۋ داۋىس شىققان جاققا جۇگىرىپ جەتتى. بەس قاباتتى ءۇيدىڭ بەسىنشى قاباتىنداعى پاتەردىڭ تەرەزەسىنەن جالىننىڭ قىزىل ءتىلى سۋماڭدايدى. بۋداقتاعان تۇتىننەن تىنىستارى تارىلعان تۇرعىندار كوشەگە قاشىپ شىق­قان. – ۇيدە كىم قالدى؟! – ءبارىمىز شىقتىق...جوق, تۇرا تۇرىڭىز, ورتەنىپ جاتقان ءپا­تەردىڭ يەسى ۇلكەن كىسى ەدى. سول كورىنبەيدى. شاماسى ىشتە... سوڭعى ءسوزدى جۇرە تىڭداعان مايور باسپالداق بويىمەن بەسىنشى قاباتقا ۇمتىلدى. ءپا­تەر­دە شىنىمەن دە 77 جاستاعى ەگدە كىسى قالىپ قويعان ەكەن. قول­قانى قاپقان يىسكە ۋلانىپ, تالىقسىپ كەتكەن ءۇي يەسىن سالاۋات كوتەرىپ سىرتقا الىپ شىقتى. ىلە-شالا جەتكەن ءورت سوندىرۋشىلەر الاپات­تى اۋىزدىقتاپ, «جەدەل جاردەمنىڭ» دارىگەرلەرى قۇتقارىلعان ادام­نىڭ ءومىرىن امان ساقتاپ قالدى... ارادا تۋرا ەكى  اي ۋاقىت وتكەندە ءدال وسىعان ۇقساس جاعداي تاعى قايتالاندى. «باتىس» ءوڭىر­لىك قولباسشىلىعىنا قاراس­تى 5517 اسكەري ءبولىمى شتابىنىڭ باستىعى, مايور رينات جۇما­ليەۆ تۇزەۋ مەكەمەسىنەن كەلە جاتقان جولىندا چاگانو-نا­بەرەجنايا كوشەسىندەگى ۇيلەردىڭ ءبىرى وتقا ورانعانىن بايقايدى. جۇرگىزۋشىسىنە قىزمەتتىك كولىگىن تۋرا ءۇي جانىنا توقتاتۋعا بۇي­رىق بەرگەن ساردار تەز ارادا جالىن شارپىعان ۇيدەن 12 ادام­نىڭ ءدىن امان شىعۋىن ساۋاتتى ۇيىمداستىردى. ءورت ءسوندىرۋ بولىمىنە شۇعىل حابار بەرىپ, كورشى ۇيلەردەن تۇرعىنداردىڭ مۇلكىن شىعارۋعا جاردەمدەستى. قوس وفيتسەردىڭ قىسىل-تاياڭ شاقتا كورسەتكەن ەرلىگى, اسپاي-ساسپاي جاساعان باتىل ارەكەتى مەملەكەت تاراپىنان جوعارى باعا­لانعاندىعىن ايتۋىمىز كەرەك. ناقتى ايتقاندا, سا­لاۋات قابدىقۇلوۆ پەن رينات جۇماليەۆ ءورت كەزىندە ادامداردى قۇتقارعانى ءۇشىن قازاقستان رەسپۋبليكاسى پرەزيدەنتىنىڭ 2015 جىلعى 4 مامىرداعى №7 جارلىعى نەگىزىندە «جاۋىن­گەرلىك ەرلىگى ءۇشىن» مەدالىمەن ناگرادتالدى. مايور س.قابدىقۇلوۆ جو­عارى ناگرادانى اقوردادا مەم­لەكەت باسشىسى نۇرسۇلتان نازارباەۆتىڭ تىكەلەي ءوز قولى­نان السا, ر.جۇماليەۆكە مە­دالدى ۇلتتىق ۇلاننىڭ باس قول­باسشىسى, گەنەرال-لەيتەنانت رۋسلان جاقسىلىقوۆ تاپسىردى. توقتار كەنجەعاليەۆ, جۋرناليست باتىس قازاقستان وبلىسى سۋرەتتە (سولدان وڭعا قا­راي): س.قابدىقۇلوۆ جانە ر.جۇ­ماليەۆ