جۋىردا سەمەي قالاسىنا ءىس-ساپارىمىزدىڭ اياسىندا تۇرعىن ءۇي قۇرىلىسى سالاسىندا جەمىستى جۇمىس ىستەپ جاتقان كاسىپورىنداردىڭ ءبىرى – «ءسات ترانس» جشس-ءنىڭ قىزمەتىمەن تانىسقان ەدىك. يندۋستريالاندىرۋ كارتاسى شەڭبەرىندە 2013 جىلدىڭ جەلتوقسان ايىندا ىسكە قوسىلعان كومپانيا قۇرىلىس الاڭدارىنا قاجەتتى تەمىر-بەتون ونىمدەرىن شىعارادى.
تۇرعىن ءۇي قۇرىلىسى كومبيناتى جوباسى رەتىندە جۇزەگە اسىرىلعان كاسىپورىن بازاسىندا وندىرىلگەن ونىمدەر جىلىنا 50 مىڭ شارشى مەتر كولەمىندەگى قۇرىلىس الاڭىن قامتاماسىز ەتە الادى. مەملەكەت باسشىسىنىڭ تاپسىرماسى بويىنشا تۇرعىنداردى قولجەتىمدى باسپانامەن قامتۋ جانە وسى سالاداعى الەۋمەتتىك سۇرانىستى قامتاماسىز ەتۋ ماقساتىندا قۇرىلعان كومبيناتتا شيكىزات ماتەريالدارىن دايارلاۋدان باستاپ, دايىن ءونىم تۇرلەرىن وندىرۋگە دەيىنگى بارلىق تەحنولوگيالىق ۇدەرىس جەلىسى جولعا قويىلعان.
جوبانىڭ جالپى قۇنى – 1, 224 ميلليارد تەڭگە. بۇل قارجىنىڭ 30 پايىزى «بيزنەستىڭ جول كارتاسى-2020» باعدارلاماسى اياسىندا الىنعان نەسيە بولسا, قالعانى جەكە قاراجات. زاۋىتتا 20-دان استام تەمىر-بەتون ونىمدەرىنىڭ تۇرلەرى وندىرىلەدى. اتاپ ايتقاندا, باعانا, تاقتا جابىندىلارى, باسپالداق ساتىلارى, تىرەك, بەلارقا, جەلدەتكىش ارنالار, قىرلى ماڭدايشالار, ىرگەتاس, قابىرعا بلوكتارى, جيەكتاس, تەكشەتاس, پاتەرارالىق, بولمەارالىق قابىرعالار جانە مەتالدى پلاستيك بۇيىمدار بار. وسى ونىمدەر ارقىلى قۇراستىرمالى ءمونوليتتى قاڭقا نەگىزىندە قۇرىلىستى جەدەل ءارى 9 بالدىق جەر سىلكىنىسىنە شىدامدى قاۋىپسىزدىك تالابىنا ساي جۇرگىزۋگە بولادى, دەيدى «ءسات ترانس» جشس باس ديرەكتورى نۇرلان بايبەكوۆ.
كاسىپورىن تەحنولوگياسىنىڭ ءبىر ەرەكشەلىگى, قالىپسىز ءونىم تۇرلەرىن ءوندىرىپ, ونى قاجەتتى بولىككە بولۋىندە. ياعني, بۇعان دەيىن تۇرعىن ءۇي قۇرىلىسى كومبيناتتارىندا بەلگىلى قالىپقا قۇيىلعان ونىمدەر شىعارىلىپ كەلسە, اتالعان زاۋىت قازىرگى زامانعا ساي ساۋلەتتىك ۇيلەسىمگە وڭاي يلىگەتىن قالىپسىز ءونىم تۇرلەرىن وندىرۋگە كوشكەن.
جاڭا تەحنولوگيا قۇرىلىس شىعىنىن ازايتۋعا, تۇرعىن ءۇي ماسسيۆىندە قولدانىلعان ماتەريالدان وزگە ارتىق سالماقتى بولدىرماۋعا جانە عيماراتتىڭ ىشكى-سىرتقى جوبالاۋىندا ەركىن شەشىمدەر قابىلداۋعا مۇمكىندىك بەرەدى. بۇل تەحنولوگيا ەلىمىزدە العاش رەت اقتاۋ قالاسىندا قولدانىلسا, ەكىنشى كەزەكتە سەمەيلىك كاسىپورىن جالعاستىرىپ وتىر.
زاۋىتتىڭ تەمىر-بەتون ونىمدەرى وندىرىلەتىن تسەحى اۋماعى ات شاپتىرىمداي جابىق عيمارات. مۇندا يتاليالىق-رەسەيلىك وزىق قوندىرعىلار ماتەريالداردى قاجەتتى پىشىمدە, ءتۇرلى پوشىمدا قۇيادى. بارلىق قوندىرعىلار كومپيۋتەرلىك باعدارلامالارمەن باسقارىلادى. ال تەكشە جانە تاقتاتاستار, جيەكتاستار, پورەبريكتەر سىندى اباتتاندىرۋ ەلەمەنتتەرى يسپانيالىق-رەسەيلىك قوندىرعىلار قويىلعان جەكە تسەحتا قۇيىلادى. سونداي-اق, بارلىق ونىمدەردىڭ بەرىكتىلىگىن ارتتىرا تۇسەتىن ارماتۋرا تسەحىندا دا جۇمىس قىزۋ. جۇمىسشىلار بىلەكتەي تەمىرلەردى جىپشە ەسىپ, كىلەمشە ىسپەتتى توقىپ جاتسا, الدەبىر بۇرىشتا جارقىلداتىپ دانەكەرلەۋ جۇمىستارى ءجۇرىپ جاتىر. زاۋىت جانىندا ەسىك-تەرەزە جاساۋعا ارنالعان مەتالدى پلاستيك تسەحى جۇمىس ىستەيدى. كاسىپورىندا شىعارىلاتىن بارلىق ونىمدەردىڭ ساپاسىن ارنايى زەرتحانا قاداعالايدى. زاۋىت اۋماعىنا ەنگەندە تۇيىق تەمىرجول جەلىسىن كوزىمىز شالدى. بۇل قويمالاردا جيناقتالعان دايىن ونىمدەردى ۆاگوندارمەن تاسىمالداۋعا وتە قولايلى, دەيدى كاسىپورىن جەتەكشىلەرى. سونداي-اق, قالا ىشىندە ورنالاسقاندىقتان رەسپۋبليكالىق دارەجەدەگى اۆتوكولىك جولدارىنان دا الىس ەمەس. كاسىپورىن قاجەتتى جاعدايدا كەلىسىمشارت نەگىزىندە قۇرىلىس ماتەريالدارىن كەز كەلگەن باعىتقا جەتكىزىپ بەرە الاتىن لوگيستيكالىق قىزمەت كورسەتۋمەن دە شۇعىلدانادى.
كاسىپورىننىڭ جەكە قازاندىعى بار. بۇل ونەركاسىپتى قاجەتتى جىلۋمەن, ىستىق سۋمەن قامتاماسىز ەتىپ وتىر. ايتا كەتكەن ابزال, «بيزنەستىڭ جول كارتاسى-2020» باعدارلاماسىنىڭ ءبىرىنشى باعىتى بويىنشا ۇكىمەت جاڭا كاسىپورىنعا ەلەكتر قۋاتىن تەگىن جەتكىزىپ بەردى. ال زاۋىت جۇمىسشىلارىنىڭ كيىنۋ-جۋىنۋ, شەبەرلىك ساعاتتارى وتكىزىلەتىن كابينەتتەرى مەن اسحانا, دەمالىس بولمەلەرى جەكە عيماراتتا ورىن تەپكەن. اپاتتى جاعدايدا نەمەسە ەلەكتر قۋاتىنان اجىراعان جاعدايدا اۆتوماتتى تۇردە قوسىلاتىن شاعىن ديزەل ەلەكتر ستانساسى دا ۇزدىكسىز ءونىم ءوندىرۋدى قامتاماسىز ەتۋگە ۇلەس قوسادى.
قازىرگى كەزدە كاسىپورىن بازاسىندا 200-گە جۋىق ادام جۇمىسپەن قامتىلعان. ولار سەرىكتەستىكتىڭ زاۋىت, لوگيستيكا جانە تۇرعىن ءۇي قۇرىلىسى الاڭدارىندا ەڭبەك ەتەدى. قازاقستاندا العاش ەنگىزىلگەن قۇرىلىس تەحنولوگياسى بولعاندىقتان, كاسىپورىننىڭ قۇرىلىسشى-مونتاجداۋشىلارى بىلىكتىلىكتەرىن جەتىلدىرىپ, ەكاتەرينبۋرگ قالاسىنداعى رەسەيلىك ارىپتەستەرىمەن ءوزارا تاجىريبە الماسىپ كەلەدى.
كومپانيانىڭ از جىلدا العان اسۋى از ەمەس. 2014 جىلى استانا قالاسىنداعى ەكسپو نىساندارىنىڭ قۇرىلىسىنا قاتىستى. 2015 جىلى كومپانيانىڭ ءاۋ باستاعى ماقساتى – تۇرعىن ءۇي قۇرىلىسى كومبيناتى جوباسى جۇزەگە اسىرىلا باستادى. ياعني, سەرىكتەستىكتە وندىرىلگەن ونىمدەر ارقىلى تۇرعىن ۇيلەر سالۋ جوباسىنىڭ تۇساۋى كەسىلدى. وسى رەتتە كومپانيانىڭ ءوز ونىمدەرى ارقىلى سالىنعان تۇرعىن ءۇي كەشەنىن كورمەككە قۇرىلىس الاڭىنا ارنايى بارعان ەدىك. سەمەي قالاسىنىڭ «مەلكومبينات» الاڭىندا 54 پاتەرلى توعىز قاباتتى تۇرعىن ءۇيدىڭ قۇرىلىسى اياقتالۋعا جاقىن ەكەن. پاتەرلەر جارىق, ەڭسەلى ءارى زاماناۋي. اتالعان نىسان بيىل مامىر ايىندا «قولجەتىمدى باسپانا-2020» باعدارلاماسى بويىنشا «تۇرعىنۇيقۇرىلىسجيناقبانكى» اق سالىمشىلارىنا پايدالانۋعا بەرىلمەك. وتكەن جىلى جەلتوقسان ايىندا وسى اۋماقتا 81 پاتەرلى ەكىنشى ءۇيدىڭ قۇرىلىسى باستالىپتى. جوسپاردا تۇرعان ءۇشىنشى ۇيمەن قوسا ەسەپتەگەندە جىل سوڭىنا دەيىن مۇندا بارلىعى 189 پاتەر تاپسىرىلاتىن بولادى.
قازىرگى كەزدە زاۋىتتا وندىرىلگەن ماتەريالدار وبلىس ورتالىعى – وسكەمەندە جاڭادان بوي كوتەرىپ كەلە جاتقان 19-شاعىن اۋدانداعى تۇرعىن ءۇي قۇرىلىستارىنا دا پايدالانىلۋدا. سونداي-اق, پاۆلودار قالاسىنداعى قۇرىلىس جوبالارىنا قولدانىلىپ جاتىر. سوڭعى ۋاقىتتا ەلىمىزدىڭ باتىس ايماعىنداعى كاسىپورىندارمەن دە كەلىسىمشارت جاسالدى.
– ءبىز ءىس جۇزىندە ءوز ءونىمىمىزدىڭ ساپالى ءارى جەدەل قۇرىلىس جۇرگىزۋگە قولايلى ەكەنىنە كوز جەتكىزدىك. ماسەلەن, العاشقى تۇرعىن ءۇي قۇرىلىسىن باستاعانىمىزدا قولىمىزدا سىزبا عانا بولدى. دەگەنمەن, جەتىلدىرىلگەن ونىمدەردىڭ قولايلىلىعىنىڭ ارقاسىندا العاشقى كەزەكتىڭ وزىندە ايىنا تۇرعىن ءۇي الاڭىنىڭ 3 قاباتىن سالۋعا قول جەتكىزدىك, – دەيدى جوبا جەتەكشىسى ادىلەت بورداتقانوۆ.
دۋمان اناش,
«ەگەمەن قازاقستان»
سەمەي