جۋىردا استاناداعى «قازاقستان» كونتسەرت زالىندا ەل تاۋەلسىزدىگىنىڭ 25 جىلدىعىن مەرەكەلەۋ اياسىندا قازاقستان رەسپۋبليكاسى مەملەكەتتىك كۇزەت قىزمەتىنىڭ قۇرىلعانىنا 2 جىل تولۋىنا وراي تاماشا كەش بولىپ ءوتتى.
كونتسەرتتى پرەزيدەنتتىك وركەستر ءان جانە ەسترادا ءانسامبلىنىڭ باستىعى, قازاقستاننىڭ ەڭبەك سىڭىرگەن قايراتكەرى جانات شىبىقباەۆ ۇرمەلى اسپاپتار وركەسترىنىڭ سۇيەمەلدەۋىمەن ا.ەسمۇحاننىڭ «وتانىم» اتتى تانىمال انىمەن اشتى. قاشاندا ءوز تىڭدارماندارىن قايتالانباس رەپەرتۋارىمەن تاڭعالدىرىپ كەلگەن قر مكق شىعارماشىلىق ۇجىمى بۇل جولى دا پرەزيدەنتتىك وركەستر مۋزىكانتتارىنىڭ اۆتورلىعىنداعى تىڭ تۋىندىلارىمەن قۋانتتى. كونتسەرتتە تۇساۋى كەسىلگەن «اقبەرەن» كۇيىن دە حالىق ەرەكشە ىقىلاسپەن قابىلدادى. كومپوزيتسيا اۆتورى پرەزيدەنتتىك وركەستر حالىقتىق مۋزىكا ءانسامبلىنىڭ دومبىراشىسى, كومپوزيتور باقىتجان دۇيسەنعازيەۆ.
وعان « ۇلى دالا» كۇيىن قوسىڭىز. اتالعان شىعارما اۆتورى – پرەزيدەنتتىك وركەستر حالىقتىق مۋزىكا انسامبلىنىڭ جەتەكشى ءسوليسى, دومبىراشى جاندوس مۇحتاروۆ. بۇل كۇي وتكەن جىلى مەملەكەت باسشىسىنىڭ يدەياسىن قولداۋ ماقساتىندا تۋىنداعان بولاتىن. « ۇلى دالا» اتاۋى مەن سارىنى قازاق دالاسىنىڭ شەكسىزدىگىن, ءبىزدىڭ اتامەكەننىڭ وتكەنى مەن بۇگىنگىسىن, بولاشاعىن كورسەتەدى. وسى كۇيدىڭ سۇيەمەلدەۋىمەن پرەزيدەنتتىك وركەستردىڭ بي ءانسامبلى العاش رەت تالانتبەك شورۋكوۆ پەن ءمادينا اليەۆا-شورۋكوۆا جاڭا قويىلىمىن ورىندادى. كەش بارىسىندا قۇراما وركەستردىڭ سۇيەمەلدەۋىمەن پرەزيدەنتتىك وركەستردىڭ سوليستەرى, قازاقستاننىڭ ەڭبەك سىڭىرگەن قايراتكەرلەرى ارداق بالاجانوۆا, دوسىمجان تاڭاتاروۆ, حالىقارالىق جانە رەسپۋبليكالىق كونكۋرستاردىڭ لاۋرەاتتارى نۇربولات قۇسايىنوۆ, قايبار اللاجار, اسەل مادەكەشوۆا, بيبىگۇل ساۋىتوۆا, ايمان ۋدانوۆا, الىبەك ءىزباساروۆ, گۇلسانىم جۇماعاليەۆانىڭ جانە باسقالاردىڭ ورىنداۋىندا وتاندىق جانە شەتەلدىك كومپوزيتورلاردىڭ شىعارمالارى شىرقالدى.
راۋشان تاۋىرحانقىزى,
«ەگەمەن قازاقستان»