ەلباسى نۇرسۇلتان نازارباەۆ «تازا قالا – باقىتتى قالا» اتتى جالپىقالالىق سەنبىلىككە قاتىستى, دەپ حابارلادى پرەزيدەنتتىڭ ءباسپاسوز قىزمەتى.
نۇرسۇلتان نازارباەۆ اعاش ەگۋ جۇمىسىنا قاتىسىپ, سەنبىلىككە شىققاندارمەن جانە قالا جاستارى وكىلدەرىمەن اڭگىمەلەستى.
قازاقستان پرەزيدەنتى بۇقارالىق اقپارات قۇرالدارىنا ارنالعان بريفينگتە تاياۋدا بىرقاتار شەت مەملەكەتتەرگە جاساعان ساپارى جونىندە ايتىپ بەردى.
– ءبىر اي ىشىندە مەن جەتەكشى ەلدەر باسشىلارىنىڭ بارىمەن دەرلىك كەزدەسۋ وتكىزدىم. ۆاشينگتوندا يادرولىق قاۋىپسىزدىك جونىندەگى سامميت ءوتتى, وعان 50-گە جۋىق ەلدىڭ مەملەكەت باسشىلارى مەن ۇكىمەت باسشىلارى قاتىستى. سولاردىڭ كوپشىلىگىمەن كەزدەستىم. جاقىندا ىستانبۇلدا يسلام ىنتىماقتاستىعى ۇيىمىنىڭ ءسامميتى ءوتتى, وعان 57 مەملەكەتتىڭ كوشباسشىسى قاتىستى. ولارمەن دە كەزدەسۋلەر بولدى. وسى ءىس-شارالاردا قازاقستاننىڭ ءتۇرلى ماسەلەلەر بويىنشا ۇستانىمى مەن ەلدە جۇرگىزىلىپ جاتقان رەفورمالار بايان ەتىلدى. بۇل رەتتە ءبىزدىڭ ەلىمىز بەن ونىڭ باستامالارى تۋرالى بۇكىل الەم بىلەتىنىن اتاپ وتكەن ءجون, – دەدى نۇرسۇلتان نازارباەۆ.
سونىمەن قاتار, مەملەكەت باسشىسى ەلوردانى كوگالداندىرۋ اياسىندا قالانىڭ اينالاسىندا 70 مىڭ گەكتار اعاش وتىرعىزىلعانىن, ال ونىڭ ىشكى بولىگىندە جىل سايىن ساياباقتار مەن گۇلزارلار پايدا بولىپ جاتقانىن اتاپ ءوتتى.
– قازاقستانمەن بىرگە استانا دا اجارلانىپ كەلەدى. ونى بۇكىل الەم جۇرتى بىلەدى. كەلەر جىلى, ەكسپو-2017 حالىقارالىق كورمەسىنىڭ اشىلۋىنا وراي قالامىزدىڭ حالقى 1 ميلليونعا جەتەدى دەپ ويلايمىن. بۇل – ەلوردا عانا ەمەس, بۇكىل رەسپۋبليكا بويىنشا تۋ كورسەتكىشىنىڭ جوعارى بولۋىنىڭ ناتيجەسى. استانادا تۇرعىندار سانى 3-4 ميلليونعا جەتسە, عىلىم مەن ءبىلىمنىڭ, تەحنولوگيانىڭ, مەديتسينانىڭ ودان ءارى دامۋىنا بۇدان دا زور ۇلەس قوسىلادى, – دەدى قازاقستان پرەزيدەنتى.
سونداي-اق, نۇرسۇلتان نازارباەۆ بارشا قازاقستاندىقتاردى اباتتاندىرۋ ىسىنە بەلسەنە قاتىسۋعا شاقىردى.
– ەگەر ءاربىر ازامات, اسىرەسە, جاستار ەلدى مەكەندەردى تازارتۋ جانە اعاش وتىرعىزۋ جۇمىستارىنا قاتىساتىن بولسا, وندا ءار اۋىل, اۋدان, قالا جانە ولارمەن بىرگە بۇكىل ەلىمىز دە كوركەيە تۇسەدى. تۇرمىسى تومەندەر مەن جەتىمدەرگە كومەك كورسەتۋ دە اسا ماڭىزدى. قازاقستان تاۋەلسىزدىگىنىڭ 25 جىلدىعىن ءبىز وسىنداي ناقتى ءىس-قيمىلمەن قارسى الۋعا ءتيىسپىز. ءبىزدىڭ كەرەمەت بايتاق ەلىمىز بار, ونىڭ جەرىنە اعاشتى كوپ ەگۋىمىز قاجەت, ول حالىقتىڭ دەنساۋلىعىنا وڭ ىقپالىن تيگىزەدى. ءوز ەلىن سۇيەتىن ادام ونىڭ يگىلىگى ءۇشىن جۇمىس ىستەپ, بولاشاعىن ويلايدى, – دەدى مەملەكەت باسشىسى.
* * *
سەنبىلىك قالانىڭ سانيتارلىق تازالىق, اباتتاندىرۋ جانە كوگالداندىرۋ جونىندەگى ەكولوگيالىق ايلىعى اياسىندا وتكىزىلىپ وتىر. وعان 4 مىڭعا جۋىق كاسىپورىن مەن ۇيىمنان, 200-دەن اسا دەنساۋلىق ساقتاۋ جانە ءبىلىم بەرۋ مەكەمەسىنەن, 130 مەملەكەتتىك مەكەمە مەن ۆەدومستۆودان جانە ۇلتتىق كومپانيالاردان 100 مىڭنان استام ادام قاتىستى.
سەنبىلىك بارىسىندا 16 مىڭداي اعاش ەگىلدى. سونىمەن قاتار, ەسىل, اقبۇلاق جانە سارىبۇلاق وزەندەرى ارنالارىن قوقىس پەن تۇرمىستىق قالدىقتاردان تازارتۋ ماقساتىمەن ەكولوگيالىق اكتسيا وتكىزىلدى.
قالانى سانيتارلىق تازارتۋ, اباتتاندىرۋ جانە كوگالداندىرۋ جونىندەگى ەكولوگيالىق ايلىق 18 ساۋىردەن 18 مامىرعا دەيىن جالعاسادى.
سۋرەتتەردى تۇسىرگەندەر
س.بوندارەنكو, ب.وتارباەۆ