ەلىمىزدىڭ سولتۇستىك وڭىرلەرىنە جاسىرىن ەسىرتكى تاسىمالداپ كەلگەن قىرعىزستان, قازاقستان ازاماتتارىنان تۇراتىن حالىقارالىق قىلمىستىق توپتىڭ 15 مۇشەسىنىڭ ۇستالۋىنا وراي ءباسپاسوز ءماسليحاتى بولدى. وندا قر ءىىم ەسىرتكى بيزنەسىمەن كۇرەس جونىندەگى دەپارتامەنت باستىعى سۇلتان كۇسەتوۆ ۇستىمىزدەگى جىلعى 7 ساۋىردەگى قوستاناي, رۋدنىي, ليساكوۆسك جانە قاراعاندى قالالارىندا اۋقىمدى شارا جۇرگىزۋدىڭ بارىسىنا توقتالدى.
دەپارتامەنت باسشىسى اتاپ وتكەندەي, كورشىلەس قىرعىزستان اۋماعىنان گەرويننىڭ ءىرى پارتياسىن زاڭسىز جەتكىزۋمەن اينالىسقان 36 جاسار وش تۇرعىنى ەسىرتكى بارونىنىڭ كۇيەۋ بالاسى ەكەن. كريمينالدىق ورتادا «ءبىرىنشى قارلىعاش» رەتىندە تانىلعان ول, كونتراباندانىڭ ترانسۇلتتىق جەلىسىن قۇرىپ, ورتالىق ازيادا ەسىرتكى تاراتۋمەن اينالىسىپتى. وسى ۇيىمداسقان قىلمىستىق توپ قۇرامىندا بۇرىن وسىنداي قىلمىستارى ءۇشىن سوتتالعان قازاقستان, قىرعىزستان جانە رەسەي ازاماتتارى بولعان. «ونى تەرەڭ جانە مۇقيات تەكسەرۋ ءۇشىن ءىىم, باس پروكۋراتۋرانىڭ جانە قم قارجى مونيتورينگى كوميتەتىنىڭ قىزمەتكەرلەرى قۇرامىنان ارنايى جەدەل-تەرگەۋ توبى قۇرىلدى. سونداي-اق, ورتالىق ازيا وڭىرلىك اقپاراتتىق ۇيلەستىرۋ ورتالىعىنىڭ اقپاراتتىق-ساراپتامالىق جانە ۇيلەستىرۋ مۇمكىندىگى قولدانىلدى», دەدى سۇلتان تۇرلى ۇلى.
ونىڭ ايتۋىنشا, قىلمىستىق توپ جارتى جىل بۇرىن ىشكى ىستەر ورگاندارىنىڭ نازارىنا ىلىككەن. جەدەل تالداۋ ناتيجەسى كورسەتكەندەي, توپ مۇقيات جاسىرىنا ءبىلىپ جانە ءاربىرىنىڭ وزىندىك ءرولى بەلگىلەنىپ, جەكە توپتار وزىندىك ارەكەتتەر جاساپ كەلگەن. سوندىقتان دا اقپاراتتىڭ قۇپيالىلىعى قاتاڭ ساقتالىنعان. جانە سويلەسۋ مەن حابارلاسۋ كەزىندە تەك شارتتى لەبىزدەر مەن تەرميندەر قولدانىلىپتى. ال گەرويندى جەتكىزۋ ءۇشىن تۇراقتى تەكسەرىلگەن تاكسيستەر مەن پويىز جولسەرىكتەرى عانا تارتىلعانى بەلگىلى بولىپ وتىر. دەپارتامەنت باسشىسى بۇل رەتتە قىلمىستىق توپ مۇشەلەرى ەسىرتكى ساقتاۋ ورىندارىن جاسىرۋ ءۇشىن ەكى ەل اۋماعىندا جالدامالى پاتەرلەردى ۋاقىتشا جالعا العان جانە ولاردى ءاربىر ون كۇن سايىن اۋىستىرىپ وتىرعان, دەيدى. سونداي-اق, ول اتالعان قىلمىستىق توپتىڭ ەسىرتكى زاتتارىن ساتۋدان تۇسكەن اقشالاي قاراجاتتاردى زاڭداستىرۋ ارنالارىن اشقاندىعىن تىلگە تيەك ەتتى. ونىڭ مالىمەتىنە قاراعاندا, قىلمىستىق ءىستى تەرگەۋ شەڭبەرىندە سوڭعى ەكى جىلدا زاڭسىز وپەراتسيالار جاساۋ ارقىلى ولاردىڭ 558 ميلليون تەڭگە كولەمىندە تابىس تاپقانى جانە زاڭداستىرعانى انىقتالعان. قازىرگى تاڭدا وسى ارالىقتا قىلمىستىق جولمەن تاپقان جىلجىمايتىن م ۇلىكتەرگە, بيزنەس قۇرىلىمدارعا قاتىستى مالىمەتتەر تەكسەرىلۋدە ەكەن.
كەڭ اۋقىمدى وپەراتسيا جۇرگىزۋ بارىسىندا قىلمىستىق توپ قۇرامىندا وزگە ەلدەردىڭ ازاماتتارىنىڭ بولۋىنا وراي قىرعىز ۇكىمەتىنىڭ جانىنداعى ەسىرتكىنى باقىلاۋ مەملەكەتتىك قىزمەتىنىڭ ارىپتەستەرىمەن ارنايى كەزدەسۋ ۇيىمداستىرىلىپ, ءوزارا ءىس-قيمىل بارىسى دا پىسىقتالىپتى. سونىڭ ناتيجەسىندە اۋعان گەروينىن قازاقستانعا جانە وزگە دە ەلدەرگە جەتكىزۋدىڭ حالىقارالىق ارناسى جويىلىپ وتىر. تەك ۇستاۋ كەزىندە قىلمىسكەرلەردەن باعاسى 100 ملن. تەڭگەدەن استام سومانى قۇرايتىن 3 كيلوگرامم گەروين الىنعاندىعىن ايتقان. س.كۇسەتوۆ, ەندى حالىقارالىق قىلمىستىق توپتىڭ ەسىرتكىنى تاراتۋدا قازاقستان جانە قىرعىزستان ازاماتتارى اراسىندا تاعى 11 سىبايلاسىنا قاتىستى انىقتاۋ شارالارى جۇرگىزىلىپ جاتقاندىعىنان حاباردار ەتتى.
جالپى, جىل باسىنان بەرى ءىىم ەسىرتكى بيزنەسىنە قارسى كۇرەس ءبولىمدەرى ەسىرتكى ساۋداسىنا قاتىستى 2903 قىلمىستىق فاكتىنى انىقتاعان. تارقاتىپ ايتقاندا, 826 ەسىرتكى وتكىزۋدىڭ فاكتىسى, ال ولاردىڭ كونترابانداسىنىڭ 48 فاكتىسى تىركەلىپ وتىر. سونىڭ ناتيجەسىندە 1 توننا 305 كيلوگرامم ەسىرتكى, سونىڭ ىشىندە 30,7 كيلوگرامم گەروين تاركىلەنگەن. بۇدان باسقا دا ەسىرتكى بيزنەسى سالاسىنداعى 6 ۇيىمداسقان قىلمىستىق توپ ارەكەتىنىڭ جولى كەسىلىپ, ەسىرتكى تابىستارىن زاڭداستىرۋ فاكتىسى بويىنشا 2 قىلمىستىق ءىس قوزعالىپ وتىر.
اسقار تۇراپباي ۇلى,
«ەگەمەن قازاقستان»