وبلىس اكىمى بەردىبەك ساپارباەۆ استانا قالاسىنداعى «ۇلتتىق عىلىمي مەديتسينالىق ورتالىق» اق باسقارما توراعاسى, مەديتسينا عىلىمدارىنىڭ دوكتورى اباي بايگەنجين باستاعان عالىم-دارىگەرلەرمەن كەزدەستى. وتكەن جىلى ەلىمىزدە «سالاماتتى قازاقستان» مەملەكەتتىك باعدارلاماسىن جۇزەگە اسىرۋ قورىتىندىلانىپ, سونىڭ ءناتيجەسىندە تاياۋداعى ءتورت جىلعا ارنالعان «دەنساۋلىق» باعدارلاماسى قابىلدانعانى بەلگىلى.
ءوڭىر باسشىسى وسى باعدارلاما اياسىندا وبلىستا «اقتوبە مەديكال تسەنتر» مەديتسينالىق كلاستەرى قۇرىلاتىنىن, ونىڭ ەلىمىزدىڭ باتىس اۋماعىن مەديتسينالىق قىزمەتپەن تولىق قامتاماسىز ەتۋگە مۇمكىندىك بەرەتىنىن جەتكىزدى.
تۇرىك ينۆەستورىنىڭ ايماقتىڭ مەديتسينالىق جەدەل جاردەم كومەگىن دامىتۋعا 5,5 ميلليارد تەڭگە سالۋدى جوسپارلاپ وتىرعانىن ايتۋ ورىندى. بۇل قارجىعا تولىق جاراقتاندىرىلعان باس بەكەت سالىنادى, 35 سۋ جاڭا رەانيموبيل جەتكىزىلەدى جانە بىرىڭعاي ديسپەتچەرلىك قىزمەت قۇرىلادى. بۇدان باسقا, جەدەل جاردەم ماشيناسىن جينايتىن زاۋىت سالىنادى, قاتەرلى ىسىك اۋرۋلارى ءۇشىن دارىلەر ءوندىرىسى جولعا قويىلادى دەپ كۇتىلۋدە.
وبلىس اكىمى مەملەكەت جانە جەكەمەنشىك ارىپتەستىگى اياسىندا «دارۋ» كلينيكاسىندا قالىپقا كەلتىرۋ جانە ساۋىقتىرۋ كومەكتەرى كورسەتىلەتىنىن جەتكىزدى.اۋرۋلاردى انىقتاۋ جانە ەمدەۋ ءۇشىن ءتيىمدى زەرتحانالىق قىزمەت قۇرىلاتىنىن, مەديتسينالىق كلاستەر اياسىندا وبلىستىڭ بارلىق مەديتسينالىق مەكەمەلەرى بولاشاقتا ءتيىستى باعىتتار بويىنشا قايتا مامانداناتىنىن اتاپ ءوتتى.
ءوز كەزەگىندە «ۇلتتىق عىلىمي مەديتسينالىق ورتالىق» اق باسقارما توراعاسى اباي بايگەنجين ەكى كۇن ىشىندە دەلەگاتسيا مۇشەلەرى بىرقاتار مەديتسينالىق مەكەمەلەردە بولعانىن, ولاردىڭ ماتەريالدىق-تەحنيكالىق بازالارىنا جانە كادرلىق قۇرامىنا ءتانتى بولعانىن ايتتى. ول وبلىستاعى وسىنداي مۇمكىندىك بولا تۇرا, وبلىستىڭ جۇرەك-قان تامىرلارى اۋرۋلارى بويىنشا سوڭعى ورىنداردا كەلە جاتقانىن دا جاسىرمادى. ەمدەۋ مەكەمەلەرىندەگى وسى زامانعى وزىق مەديتسينالىق قوندىرعىلاردى تولىق قۋاتىندا پايدالانۋ, وتا جاساۋدىڭ نورماتيۆتىك ولشەمدەرىن ساقتاۋ ماسەلەلەرىن قوزعادى. وبلىستىڭ دەنساۋلىق سالاسىمەن بايلانىستى الدا دا نىعايتا تۇسەتىندەرىن ايتا كەلىپ, الداعى ۋاقىتتا وسىندا شەبەرلىك كلاستارىن وتكىزەتىندەرىن, سكرينينگ ءجۇرگىزىلەتىنىن, تەز مەديتسينالىق كومەكتى قاجەت ەتەتىن جۇرەك-قان تامىرلارى اۋرۋلارىمەن اۋىراتىنداردى وزدەرىندە ەمدەيتىندەرىن جەتكىزدى. سونىڭ ءبارى جەرگىلىكتى بيۋدجەتكە سالماق تۇسىرمەي, ءوز قارجىلارىنا ءجۇرگىزىلەتىنىن اتاپ ءوتتى.
كەزدەسۋ سوڭىندا وبلىستىق دەنساۋلىق ساقتاۋ باسقارماسى مەن «ۇلتتىق مەديتسينالىق ورتالىق» اق اراسىندا ءوزارا ارىپتەستىك تۋرالى مەموراندۋمعا قول قويىلدى.
ساتىبالدى ءساۋىرباي,
«ەگەمەن قازاقستان»
اقتوبە وبلىسى