كوكتەم وڭتۇستىكتەن باستالادى دەگەن ءسوز بۇگىندە تامسىلگە اينالىپ كەتكەندەي تىلگە ەرىكسىز ورالادى. كوكتەم – قىستا ىلگەن جاباعى ءجۇندى سىپىرىپ تاستاپ, كوڭىلگە شاتتىق ۇيالاتاتىن كوگىلدىر كويلەك كيگەندەي عاجاپ مەزگىل عوي.
ناۋرىزدا رەسپۋبليكالىق اقىندار ايتىسىن وتكىزگەن ءوڭتۇستىك ەندى «تەاتر كوكتەمى-2016» وبلىستىق فەستيۆالىن دە جوعارى دارەجەدە وتكىزىپ ۇلگەردى.
قازاقتا راقىمجان وتارباەۆتاي اسا تالانتتى قالامگەر بار. وبلىستىق مادەنيەت باسقارماسىنىڭ باسشىسى كۇليا ايداربەكوۆا فەستيۆالدىڭ رەپەرتۋارىن شىعارمالارىنىڭ تىنىسى بولەك, شوقتىعى بيىك جازۋشىنىڭ تۋىندىلارىنا ارناپ, دۇرىس ءىس قىلدى.
ويتكەنى, «بارماساڭ, كەلمەسەڭ جات بولاسىڭ» دەگەندەي, قازاقستان اتتى قۇتتى شاڭىراقتىڭ استىندا وتىرىپ, ەلباسى ايتقانداي, ءار وبلىستىڭ جەكە حاندىق قۇرعانداي ءبىر-بىرىمەن ارالاسپاۋى ءوز-وزىمەن بۇيىعىلانۋعا الىپ كەلەرى حاق قوي.
ەل تاۋەلسىزدىگىنىڭ 25 جىلدىعىنا وراي ۇيىمداستىرىلعان سالتاناتتى شاراعا وبلىستىڭ توعىز تەاترى قاتىستى. بارلىعى ارناۋلى جۇلدەلەرمەن ماراپاتتالدى. ءاسانالى ءاشىموۆ, ەسمۇحان وباەۆ سىندى تەاتر تارلاندارى قازىلىق ەتكەن فەستيۆالدا ءار تەاتر ءوز بويى, تالانتىنا لايىق سىباعالارىنا يە بولدى.
ايتسە دە باس جۇلدەگە اۆتور ارنايى تىككەن اۆتوكولىك – بىرەۋ. «قينالعان جامبىل جەرى وسى» بولعان.
فەستيۆالدىڭ جابىلۋ سالتاناتىندا جۇلدە قورى 1 ملن. تەڭگە بولاتىن «ەڭ ۇزدىك قويىلىم» اتالىمىمەن ج.شانين اتىنداعى وبلىستىق اكادەميالىق قازاق دراما تەاترى ماراپاتتالسا, «ەڭ ۇزدىك رەجيسسۋرا» اتالىمىمەن وبلىستىق ورىس دراما تەاترىنىڭ رەجيسسەرى ي.ۆەربيتسكي (جۇلدە قورى 500 مىڭ تەڭگە), «اكتەرلىق انسامبلدىك تۇتاستىق» اتالىمىمەن وبلىستىق ءازىل-سىقاق جانە ساتيرا تەاترى (500 000 تەڭگە), «تاريحي تاقىرىپتى ۇزدىك مەڭگەرگەنى ءۇشىن» اتالىمىمەن تۇركىستان قالاسىنىڭ سازدى-دراما تەاترى (300 مىڭ تەڭگە), «ءپاتريوتيزمدى ۇزدىك بەينەلەگەنى ءۇشىن» اتالىمىمەن وبلىستىق قۋىرشاق تەاترى (300 000 تەڭگە), «ەڭ ۇزدىك ەر ادام» اتالىمىمەن ق.جانداربەكوۆ اتىنداعى جەتىساي دراما تەاترىنىڭ اكتەرى س.ءارىپحانوۆ (200 مىڭ تەڭگە), «ەڭ ۇزدىك ايەل ادام» اتالىمىمەن وبلىستىق وزبەك دراما تەاترىنىڭ اكتريساسى د.حالمەتوۆا (200 مىڭ تەڭگە), «ەكىنشى پلانداعى ەر ادام» اتالىمىمەن وبلىستىق وزبەك دراما تەاترىنىڭ اكتەرى ۇ.ناسىروۆ (100 مىڭ تەڭگە), «ەكىنشى پلانداعى ايەل ادام» اتالىمىمەن ج.شانين اتىنداعى وبلىستىق اكادەميالىق قازاق دراما تەاترىنىڭ اكتريساسى ا.نۇرتازينا (100 مىڭ تەڭگە) ماراپاتتالدى.
ۇلى ابايعا ارنالعان, قازاقتىڭ ادەبيەتى, تەاترى الەمىندەگى كلاسسيكتەرى مۇحتار اۋەزوۆ, لاتيف حاميدي جانە احمەت جۇبانوۆتىڭ قالامى تيگەن, ۇلى ءجۇرەكتەرىنەن تۋعان شىعارما وسىلايشا كوش باستاپ, سالتاناتتى شارانىڭ شىمىلدىعىن جاپتى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى