13-14 ءساۋىر كۇندەرى وزبەكستاننىڭ استاناسى – تاشكەنت قالاسىندا شانحاي ىنتىماقتاستىق ۇيىمىنا مۇشە مەملەكەتتەر قاۋىپسىزدىك كەڭەستەرى حاتشىلارىنىڭ 11-ءشى كەزدەسۋى بولىپ ءوتتى. كەزدەسۋگە پرەزيدەنتتىڭ كومەكشىسى – قاۋىپسىزدىك كەڭەسىنىڭ حاتشىسى نۇرلان ەرمەكباەۆ قاتىستى.
شىۇ كەڭىستىگىندە قاۋىپسىزدىك سالاسىنداعى جاعداي تۋرالى پىكىر الماسۋلار ءوتىپ, تەرروريزممەن, سەپاراتيزممەن جانە ەكسترەميزممەن, قارۋ-جاراق پەن ەسىرتكىنىڭ زاڭسىز اينالىمىمەن كۇرەستە ءوزارا ءىس-قيمىلداردى جەتىلدىرۋدىڭ تەتىكتەرى, ترانسشەكارالىق ۇيىمداسقان قىلمىسپەن كۇرەس جايى جان-جاقتى تالقىلاندى.
قازاقستان دەلەگاتسياسىنىڭ باسشىسى كەزدەسۋگە قاتىسۋشىلاردى ءبىزدىڭ مەملەكەتىمىز تاراپىنان شىۇ جەلىسى بويىنشا اتالعان باعىتتاردا قابىلدانىپ جاتقان شارالار, سونداي-اق, شانحاي ىنتىماقتاستىق ۇيىمىنا مۇشە مەملەكەتتەرمەن ەكىجاقتى ىقپالداستىق شەڭبەرىندە قابىلدانىپ جاتقان ءىس-شارالار تۋرالى قۇلاعدار ەتتى.
دەلەگاتسيالار باسشىلارى ءوزبەكستان رەسپۋبليكاسىنىڭ پرەزيدەنتى يسلام كارىموۆ تاراپىنان قابىلداۋدا بولدى.
سونداي-اق, تاشكەنتتە ن.ەرمەكباەۆتىڭ وزبەكستان رەسپۋبليكاسى پرەزيدەنتىنىڭ جانىنداعى قاۋىپسىزدىك كەڭەسىنىڭ حاتشىسى ۆ.ماحمۇدوۆپەن, قىتاي حالىق رەسپۋبليكاسى مەملەكەتتىك كەڭەسىنىڭ مۇشەسى – قىتايدىڭ قوعامدىق قاۋىپسىزدىك ءمينيسترى گو شەنكۋنمەن كەلىسسوزدەرى ءوتتى.
اتالعان كەزدەسۋلەر بارىسىندا تاراپتار قاۋىپسىزدىك سالاسىنداعى ءوزارا ءىس-قيمىلدىڭ ناقتى ماسەلەلەرىن تالقىلادى.
قاۋىپسىزدىك كەڭەسى حاتشىلارىنىڭ كەزدەسۋىندە ۇستىمىزدەگى جىلدىڭ 23-24 ماۋسىمىندا تاشكەنت قالاسىندا بولاتىن شىۇ-عا مۇشە مەملەكەتتەر باسشىلارى كەڭەسىنىڭ ماجىلىسىنە ماتەريالدار دايىنداۋ ماسەلەسىنە ەرەكشە نازار اۋدارىلدى.
«ەگەمەن-اقپارات»