قازاقستاندىق 8 جاسار وقۋشى قىزعا بۇيىردى
اتا-اناسى ابۋ-دابيدە جۇمىس جاسايتىن قازاقستاندىق سايورا شوتپاقوۆا ەسىمدى 8 جاسار وقۋشى قىز مەكتەپتە ءبىر جىل تەگىن ءبىلىم بەرەتىن گرانتتىڭ يەگەرى اتاندى. وعان بۇل جولدامانى بىرىككەن اراب ءامىرلىكتەرى مادەنيەت, جاستار جانە قوعامدىق دامۋ ءمينيسترى شەيح ناحايان يبن مۇباراك ءال ناحايان تابىس ەتتى.
وقۋشى قىزدىڭ جەڭىسى جونىندە جەتكىزگەن اكەسى اسلان شوتپاقوۆ گرانتتى 37 مەكتەپتى قامتيتىن GEMS Education قورىنىڭ بەرگەنىن ايتادى. مەكەمە ءباا ءبىرىنشى پرەزيدەنتىنىڭ ايەلدەر قۇقىعى ءۇشىن كۇرەسكەن زايىبى فاتيما بين مۇباراكتىڭ قۇرمەتىندەگى كورولدىك گرانت يەگەرلەرىن انىقتايدى. ول ءار مەكتەپتەن ءبىر عانا وقۋشى قىزعا تاپسىرىلادى. سوعان دەيىن 30 سىنىپتىڭ ۇمىتكەرلەرى مەكتەپ كوميسسياسىنىڭ سىناعىنان ءوتۋى ءتيىس.
– گرانت شەڭبەرىندە اكادەميالىق تابىس, تابيعاتقا جانە قوعامعا قوسقان ۇلەستەر, لايىقتى ازامات بولا ءبىلۋ سەكىلدى ءتورت ءتۇرلى ولشەمى قاراستىرىلادى. تاريحي گرانت نەگىزىنەن جوعارى سىنىپ وقۋشىلارىنا تابىس ەتىلەدى. بىراق بيىلعى جىلى, سوعان قاراماستان, گرانتتى سايوراعا بەرۋ جونىندە شەشىم قابىلداندى. مەنىڭشە, ول وسى گرانت تاريحىنداعى ونىڭ ەڭ جاس يەگەرى بولۋى كەرەك, – دەدى اسلان شوتپاقوۆ.
ول قىزىنىڭ قازىر ءۇشىنشى سىنىپتا وقىپ جۇرگەنىن, ال گرانتتى وتكەن جىلى جەڭىپ العانىن, بىراق ونى تاپسىرۋدىڭ مەرزىمى ەندى عانا جەتكەنىن ايتتى.
مۇرات ايتقوجا