استانا. 14 ءساۋىر. الماتىنىڭ «قايرات» فۋتزال كلۋبى «الەمنىڭ ەڭ ۇزدىك كلۋبى – 2015» اتاعىنا ۇمىتكەرلەر تىزىمىنە قوسىلدى. بۇل تۋرالى egemen.kz ءتىلشىسى حابارلادى.
«قايرات» كلۋبىنىڭ ءباسپاسوز قىزمەتى سپورت سۇيەر قاۋىمعا قۋانىشتى حاباردى جەتكىزدى. كلۋبتىڭ رەسمي سايتى AGLA Futsal Awards 2015 by futsalplanet.com تۇجىرىمى بويىنشا «قايراتتىڭ» الەمنىڭ ەڭ ۇزدىك كلۋبى اتاعىنا ۇمىتكەر كوماندالار تىزىمىنە قوسىلعانى تۋرالى حابارلادى.
«قايرات» بىلتىر ەلىشىلىك جارىستاردىڭ بارلىعىن جەڭىپ العان بولاتىن. كوماندا وتكەن جىلى قازاقستان چەمپيونى, قازاقستان كۋبوگى مەن سۋپەركۋبوگىنىڭ يەگەرى اتاندى. ودان كەيىن ۋەفا كۋبوگىن جەڭىپ الىپ, الەمنىڭ كلۋبتىق چەمپيوناتىندا ەكىنشى ورىندى يەلەنگەن بولاتىن.
داستان كەنجالين.
دەرەك, فوتو: kairat-futsal.kz