استانا. 14 ءساۋىر. ءساۋىر ايىنىڭ 9-ى كۇنى استانا قالاسىنداعى جامبىل جاباەۆ اتىنداعى №4 مەكتەپ-گيمنازياسىندا «ءتىلىم مەنىڭ – تىرلىگىمنىڭ ايعاعى» اتتى IV قالالىق وليمپيادا ءوتتى. بۇل تۋرالى egemen.kz ءتىلشىسى حابارلادى.
نۇرشا ورازاحىنوۆانىڭ «ساتىلاي كەشەندى وقىتۋ» تەحنولوگياسى بويىنشا وتكەن ءبىلىم سايىسىنا ەلوردا بويىنشا «ءمولدىر» بالاباقشاسىنان – 2, قازاق ۇلتتىق ونەر ۋنيۆەرسيتەتىنەن – 1, سونداي-اق, 8 مەكتەپتەن 57 كوماندا قاتىستى. قالالىق اۋىزشا كوماندالىق وليمپيادادا بارلىعى 296 بالا بىلىمدەرىن سىنعا سالسا, ولارعا قازاق ءتىلى, ادەبيەت, ورىس ءتىلى, اعىلشىن ءتىلى, تاريح, ماتەماتيكا, گەوگرافيا, بيولوگيا, فيزيكا پاندەرى بويىنشا 72 مۇعالىم جەتەكشىلىك ەتتى.
استانا قالاسى ءبىلىم باسقارماسىنىڭ مۇرىندىق بولۋىمەن وتكەن وليمپيادانى ۇيىمداستىرۋعا №71 «ءمولدىر» بالاباقشاسى, №4 ج.جاباەۆ اتىنداعى مەكتەپ-گيمنازياسى, №81 جالپى ءبىلىم بەرەتىن ورتا مەكتەپ, №66 مەكتەپ-ليتسەيى, سونىمەن قاتار, №74 مەكتەپ-گيمنازياسى دا ءبىر كىسىدەي اتسالىستى. ال, ۇيىمداستىرۋ القاسىنىڭ قۇرامىنا – ەلوردالىق ءبىلىم باسقارماسى باستىعىنىڭ ورىنباسارى باعلان سماتاەۆا, تەحنولوگيا اۆتورى, قازاقستان رەسپۋبليكاسى كىشى عىلىم اكادەمياسىنىڭ ۆيتسە-پرەزيدەنتى, قازاق ۇلتتىق پەداگوگيكالىق ۋنيۆەرسيتەتى فيلولوگيالىق پاندەردى وقىتۋ ادىستەمەسى كافەدراسىنىڭ پروفەسسورى, پەداگوگيكا عىلىمدارىنىڭ دوكتورى, رەسەي جاراتىلىستانۋ عىلىمدار اكادەمياسىنىڭ مۇشە كوررەسپوندەنتى نۇرشا ورازاحىنوۆا جانە استانا قالاسى بويىنشا «ساتىلاي كەشەندى وقىتۋ» تەحنولوگياسىنىڭ تاجىريبەلىك الاڭ پەداگوگتارى ەندى.
ءجۇز جىلدىق تاريحى بار ءبىلىم وشاعىندا وتكەن دودا قاتىسۋشىلاردىڭ «ساتىلاي كەشەندى وقىتۋ» تەحنولوگياسىنىڭ ءانۇرانىن ورىنداۋىمەن باستالدى. كەيىن ءار كوماندا كورەرمەندەر الدىندا وزدەرىن تانىستىردى.
وليمپياداعا قازىلىق جاساعان استانا قالاسى ءبىلىم باسقارماسىنىڭ عىلىمي-ادىستەمەلىك جۇمىستار جونىندەگى ادىسكەرى روزا قاسقاباەۆا شارا شىمىلدىعىن قۇتتىقتاۋ سوزىمەن اشىپ, سايىسقا قاتىسۋشىلارعا ساتتىلىك تىلەدى. «ەلىمىز ءۇش تۇعىرلى ءتىل ساياساتىن قولعا العالى بەرى قازاق ءتىلىنىڭ قاسيەتىن تانىتار ءىس-شارالار كوپتەپ ۇيىماستىرىلىپ كەلەدى. انا ءتىلىنىڭ قادىرىن قانىنا ءسىڭىرىپ وسكەن جاس ۇرپاق ورىس جانە اعىلشىن تىلدەرىن جەتىك مەڭگەرۋ ارقىلى بولاشاققا سەنىمدى, نىق قادام جاساي الادى. بۇگىنگى سايىس – سونىڭ ءبىر ايعاعى. ءبىلىم بايگەسىندە تەك ۇزدىكتەر وزىق شىقسىن!», – دەدى روزا قاسىمقىزى.
بىلىكتى ماماندار قازىلىق جاساعان وليمپيادادا 300-گە جۋىق وقۋشى «ساتىلاي كەشەندى وقىتۋ» تەحنولوگياسى بويىنشا بىلىمدەرىن ساراپقا سالدى. بالاباقشانىڭ دايارلىق توبىنداعى بۇلدىرشىندەردەن باستاپ, 7-سىنىپ وقۋشىلارىنا دەيىنگى ارالىقتى قامتىعان ءبىلىم باسەكەسىندە بالالار قازاق, ورىس, اعىلشىن ءتىلى پاندەرىنەن بولەك, جاراتىلىستانۋ پاندەرى بويىنشا دا بەرىلگەن تاپسىرمالاردى اۋىزشا ورىنداپ شىقتى.
دوداعا تىڭعىلىقتى دايىندىقپەن كەلىپ, تەحنولوگيانى ءار ءپان بويىنشا ساۋاتتى قولدانا بىلگەن جۇلدەگەر كوماندالار سىنىپتىق دارەجەلەرى بويىنشا 1 جانە 2-ورىنداردى جەڭىپ السا, سايىسقا قاتىسقان ءار بالاعا استانا قالاسى ءبىلىم باسقارماسىنىڭ اتىنان ماقتاۋ گراموتاسى تابىس ەتىلدى. سونداي-اق, اتالعان سىنعا شاكىرتتەرىن جان-جاقتى دايىنداپ, جەتەكشىلىك ەتكەن ۇستازدار مەن بايگەنىڭ جوعارى دەڭگەيدە وتۋىنە اتسالىسقان القا مۇشەلەرى دە ماراپاتتالدى.
ماراپاتتاۋ راسىمىندە نۇرشا الجانبايقىزى: «جىل وتكەن سايىن تەحنولوگياعا قىزىعۋشىلىق ءبىلدىرىپ, ۇيرەنىپ, بىلىمدەرىن جەتىلدىرىپ جۇرگەن وقۋشىلاردىڭ دا, مۇعالىمدەردىڭ سانى دا ارتىپ كەلەدى. بۇل, ارينە, قۋانارلىق جاعداي. زاماناۋي ءبىلىم بەرۋدىڭ تەتىگىنە اينالعان وقىتۋ ءتاسىلىن الداعى ۋاقىتتا ءالى دە جەتىلدىرە, تولىقتىرا تۇسەمىز دەگەن سەنىمدەمىن», – دەپ, بارلىق قاتىسۋشىعا العىس ءبىلدىردى.
ايتا كەتەيىك, وليمپيادا بارىسىندا وزگەلەردەن وزىق شىعىپ, كوپ ۇپاي جيناعان كوماندالار بيىل مامىر ايىندا الماتى قالاسىندا وتەتىن رەسپۋبليكالىق سايىسقا قاتىسىپ, ءبىلىم وردالارىنىڭ نامىسىن قورعاماق.
ەلامان قوڭىر.
دەرەك: egemen.kz.
فوتو: bilim.astana.kz.