استانا. 14 ءساۋىر. بۇگىن فۋتبولدان ۋەفا چەمپيوندار ليگاسىنىڭ شيرەك فينالدىق ماتچتارى ودان ءارى جالعاستى. بۇل تۋرالى egemen.kz ءتىلشىسى حابارلادى.
«اتلەتيكو» (مادريد, يسپانيا) – «بارسەلونا» (بارسەلونا, يسپانيا) 2:0 (1:0)
كەشە مادريد اسپانىندا ءتۇنى بويى «رەالدىڭ» جەڭىسىنىڭ بۋى باسىلماي جاتقاندا قالانىڭ ەكىنشى شەتىندە جەرگىلىكتى «اتلەتيكو» كومانداسى دا جانكۇيەرلەرىنە تاعى ءبىر قۋانىش سىيلادى. «اتلەتيكو» ۋەفا چەمپيوندار ليگاسىنىڭ شيرەك فينالىندا يسپانيا چەمپيوناتىنداعى ەجەلگى قارسىلاستارىنىڭ ءبىرى سانالاتىن «بارسەلونا» كلۋبىن جەڭىپ, جارتىلاي فينالعا شىقتى.
بۇل جەڭىستى شىنى كەرەك, بۇرىننان فۋتبولمەن «اۋىراتىن» جانكۇيەرلەردىڭ ءوزى كۇتپەدى. ولاي دەيتىنىمىز, الەمنىڭ تۇكپىر-تۇكپىرىندە «اتلەتيكو» جەڭەدى-اۋ دەگەن ادامدارعا قاراعاندا كاتالوندىق كوماندانىڭ جەڭىسىنە ءباس تىككەن ادامدار كوپ بولعان. الايدا, سپورت دەگەن ءبىر سيقىر الەم جاسىل الاڭدا عانا شىن مىقتىنىڭ انىقتالاتىنىن كورسەتتى.
كەزدەسۋ اسا تارتىستى ءوتتى. وندا «اتلەتيكوعا» الاڭ يەسى رەتىندە جانكۇيەرلەرىن جەرگە قاراتپاۋ ءۇشىن بارسەلونادا كەتكەن ەسەنى قايتارىپ, تازا ەكى دوپ ايىرماشىلىعىمەن جەڭۋ كەرەك بولاتىن. الاڭ يەلەرى وسى ماقساتپەن الاڭعا شىقتى. ارگەنتينالىق تالانتتى فۋتبوليست, قازىر بىرنەشە جىلدان بەرى «اتلەتيكونىڭ» باس جاتتىقتىرۋشىسى قىزمەتىن ابىرويمەن اتقارىپ جۇرگەن ديەگو پابلو سيمەونە ويىنشىلارىن تاعى ءبىر رەت قايراپ, الاڭعا «باتاسىن» بەرىپ شىعاردى. بۇل ويىندا «اتلەتيكو» بارلىق قىرىنان كورىندى. ولار قورعانىستا تا شابۋىلدا دا ارگەنتينالىق ماماننىڭ تاكتيكاسىن ۇستانىپ, «بارسەلونادان» باسىمدىق تانىتتى.
ماتچتا ءبىرىنشى بولىپ ەسەپتى الاڭ يەلەرى اشتى. 36 مينۋتتا شابۋىلشى انتۋان گريزمانن قارسى جاقتىڭ ايىپ دوپ الاڭىنا اۋەلەتىپ بەرىلگەن پاستى پايدالانىپ, باسپەن دوپتى تورعا توعىتتى. وسىدان كەيىن ويىن بويى «بارسەلونانىڭ» نەيمار, سۋارەس, ينەستا, مەسسي مەن باسقا دا ويىنشىلارى قاۋىپتى شابۋىلدار ۇيىمداستىرعانىمەن ودان ەشتەڭە شىقپادى. وعان قاراعاندا, «اتلەتيكونىڭ شابۋىلدارى ناتيجەسىن بەرىپ جاتتى. سونداي شابۋىلداردىڭ بىرىندە «بارسەلونانىڭ» ايىپ دوپ الاڭىنا جاقسى پاس شىعارىلعاندا ينەستا دوپتى قولمەن توقتاتىپ قالدى. سوعان تورەشى ريتسوللي نيكولا كوپ ويلانباستان «بارسانىڭ» قاقپاسىنا بىردەن 11 مەترلىك پەنالتي بەردى. بۇل پەنالتيدى انتۋان گريزمانن شەبەرلىكپەن ورىندادى. ەسەپ – 2:0. وسى گولدان كەيىن «بارسا» ەسىن جيىپ, تاعى بىرنەشە رەت قاۋىپتى جاعداي جاسادى. لەونەل مەسسيدىڭ الىستان شىرەنە تەپكەن دوبى دا جاعدايدى قۇتقارا المادى. ءسويتىپ, يسپانيا چەمپيوناتىندا «بارسەلونانىڭ» وكشەسىن باسىپ ەكىنشى ورىندا كەلە جاتقان «اتلەتيكو» ەجەلگى قارسىلاستارىنىڭ ءبىرىن ۋەفا چەمپيوندار ليگاسىنان شىعارىپ سالدى.
ۋەفا چەمپيوندار ليگاسى 1/4 فينالىنداعى قارسىلاستاردىڭ ەكىنشى ماتچتارى.
14 ءساۋىر. مادريد. «ۆيسەنتە كالدەرون» ستاديونى.
تورەشى: ريتسوللي نيكولا
«اتلەتيكو م»: وبلاك, حۋانفران, گودين, لۋكاس, لۋيس, كوكە, اۋگۋستو (ساۆيچ 90’), گابي, نيگەس, فەررەيرا-كارراسكو (توماس74’), گريزمانن (كوررەا 90’)
«بارسەلونا»: تەر شتەگەن, الۆەس (اردا 64’), پيكە, ماسكەرانو, البا, راكيتيچ (روبەرتو 64’), سەرحيو, ينەستا, مەسسي, سۋارەس, نەيمار
گولدار: انتۋان گريزمانن 36’, 88’
ەسكەرتۋ الدى: گابي 69’, گودين 85’ , كوررەا 90’ , كوكە 90’ — سۋارەس 70’ , نەيمار 76’ , ينەستا 87’ , اردا 90’
«بەنفيكا» (ليسسابون, پورتۋگاليا) – «باۆاريا» (ميۋنحەن, گەرمانيا) 2:2 (1:1)
بۇل كەزدەسۋ تەڭ ەسەپپەن اياقتالعانىمەن, «باۆاريا» ەكى ويىننىڭ ناتيجەسى بويىنشا جارتىلاي فينالعا شىقتى. ءبىرىنشى ماتچتا گەرمانيا كلۋبىنىڭ جالعىز سوققان گولى ەكىنشى ويىننىڭ تاعدىرىن شەشتى. ءسويتىپ, «باۆاريا» اتاعىنا شاڭ جۋىتپاي, تاعى دا چەمپيوندار ليگاسىنىڭ كۋبوگىنا دامەلى ەكەندەرىن كورسەتتى.
كەزدەسۋدە الاڭ يەلەرى دە جاقسى وينادى. ولاردى سول ءۇشىن دە ماقتاۋعا بولادى. ءبىرىنشى ماتچتا 1:0 ەسەبىمەن جەڭىلگەنىمەن, «بەنفيكا» قولدى ءبىر سىلتەي الاتىن كوماندا ەمەستىگىن تانىتتى. ويىندا ءبىرىنشى بولىپ گولدى دا پورتۋگالدىقتار سوقتى. 27 مينۋتتا راۋل حيمەنەس قاقپاشىدان ايلاسىن اسىرا الدى. وسى گول «باۆارياعا» ءبىر شاپالاق بولىپ تيگەندەي كورىندى. ودان كەيىن ولار تەز ەسىن جيىپ, «بەنفيكانىڭ» قاقپاسىنا ەكى گول سوعىپ, العا شىقتى. 38 جانە 52 مينۋتتاردا ارتۋرو ۆيدال مەن توماس ميۋللەر گولداردىڭ اۆتورى اتاندى. بۇل گولدان كەيىن «بەنفيكانىڭ» جاعدايى قيىنداي ءتۇستى. ويتكەنى, ولارعا جارتىلاي فينالعا شىعۋ ءۇشىن ەندى ەكى گول ەمەس, ءۇش دوپ سوعۋ كەرەك بولدى. الايدا, الاڭ يەلەرىنىڭ شاماسى تەك ءبىر گول سوعۋعا عانا جەتتى. «بەنفيكا» ەسەپتى ماتچتىڭ بىتۋىنە 15 مينۋت قالعاندا عانا تەڭەستىرە الدى.
ەندى جارتىلاي فينالدا «رەال» (مادريد) مەن «باۆاريا» (ميۋنحەن), «اتلەتيكو» (مادريد) مەن «مانچەستەر سيتي» (مانچەستەر) كوماندالارى كەزدەسەدى.
14 ءساۋىر. ليسسابون. «ەشتاديۋ دا لۋش» ستاديونى.
تورەشى: كەيپەرس بورن
«بەنفيكا»: ەدەرسون, المەيدا, ليندەلەف, جاردەل, ەليزەۋ (يوۆيچ 88’), فەيسا, سانچەس, سالۆيو (تاليسكا 68’), پيتستسي (گۋەدەش 58’), كارسەلا-گونسالەس, حيمەنەس
«باۆاريا»: نويەر, لام, كيمميح, مارتينەس, الابا, ۆيدال, الونسو (بەرنات 90’), الكانتارا, كوستا, ميۋللەر (لەۆاندوۆسكي 84’), ريبەري
گولدار: حيمەنەس 27, تاليسكا 76’– ۆيدال 38’, ميۋللەر 52’
ەسكەرتۋ الدى:كارسەلا-گونسالەس 70’, المەيدا 90’ – مارتينەس 74’
داستان كەنجالين.
دەرەك, فوتو: eurosport, euro-football.ru
ۆيدەو: vkontakte الەۋمەتتىك جەلىسى.